ඉදිකිරීම් කර්මාන්තය මෙරට දළ දේශීය නිෂ්පාදිතයට දළ වශයෙන් 7%ක දායකත්වයක් දක්වනු ලබන නමුත්, මෙම ආණ්ඩුව විසින් නිර්මාණය කළ ආර්ථික අර්බුදය හේතුවෙන් ඉදිකිරීම් ක්ෂේත්රය දැඩි ලෙස කඩා වැටීමට ලක්ව ඇතැයි විපක්ෂ නායක සජිත් ප්රේමදාස මහතා පැවසීය. මේ නිසා ඉදිකිරීම් ක්ෂේත්රයේ නියැලුණු ලක්ෂ 11කට ආසන්න පිරිසක් මෙන්ම, ඔවුන්ගෙන් යැපෙන්නන්ට ද අදටත් මුහුණ දීමට සිදුව ඇත්තේ ඉතා අසීරු තත්ත්වයකට බව පැවසූ විපක්ෂ නායකතුමා , කඩා වැටී ඇති ඉදිකිරීම් කර්මාන්තය පිලිබදව ගැටලු රැසක් 27/2යටතේ ඉදිරිපත් කරනු ලැබීය.
ඉදිකිරීම් කර්මාන්තය මෙරට දළ දේශීය නිෂ්පාදිතයට දළ වශයෙන් 7%ක දායකත්වයක් දක්වනු ලබයි. කෙසේ නමුත්, මෙම ආණ්ඩුව විසින් නිර්මාණය කළ ආර්ථික අර්බුදය හේතුවෙන් ඉදිකිරීම් ක්ෂේත්රය දැඩි ලෙස කඩා වැටීමට ලක්විය. මේ නිසා ඉදිකිරීම් ක්ෂේත්රයේ නියැලුණු ලක්ෂ 11කට ආසන්න පිරිසක් මෙන්ම, ඔවුන්ගෙන් යැපෙන්නන්ට ද අදටත් මුහුණ දීමට සිදුව ඇත්තේ ඉතා අසීරු තත්ත්වයකටයි.
මේ සම්බන්ධයෙන් 2022.06.07 දිනයේ දී මවිසින් ස්ථාවර නියෝග 27(2) යටතේ පාර්ලිමේන්තුවේ ප්රශ්නයක් ඉදිරිපත් කෙරුණි. එසේම, මීට අමතරව 2021.03.24 වැනි දින ටයිල් ආනයනකරුවන් මුහුණ දෙනු ලබන ගැටලු සම්බන්ධයෙන් ද මෙම සභාවේ අවධානය යොමු කරන ලදී. එසේ වුව ද පැවති ආණ්ඩුව හෝ පවතින ආණ්ඩුව ඉදිකිරීම් ක්ෂේත්රයේ ගැටලු වලට සාධනීය විසඳුමක් ලබා දීමට මෙතෙක් අපොහොසත් වී තිබේ.
ඒ අනුව, මෙය ජාතික වැදගත්කමකින් යුතු ගැටලුවක් වශයෙන් සලකා පහත සඳහන් ප්රශ්න වලට නිශ්චිත පිළිතුරු හා පැහැදිලි කිරීම් රජයෙන් බලාපොරොත්තු වෙමි.
- ගොඩනැගිලි ද්රව්යවල හිඟය, අධික මිල ඉහළ යාම හා ප්රවාහන වියදම් සීඝ්ර ලෙස ඉහළ යාම නිසා ඉදිකිරීම් ක්ෂේත්රය දරුණු පසුබෑමකට ලක්ව තිබේ. මෙම කර්මාන්තය සම්පූර්ණයෙන්ම බිඳවැටීම වැළැක්වීමට රජය හඳුනාගෙන ඇති ක්රියාමාර්ග මොනවාද? ඒ සඳහා රජය සතු සැලසුම් කවරේ ද යන්න මෙම සභාවට ඉදිරිපත් කරන්නේ ද?
- පසුගිය කාලය තුළ රජය වෙනුවෙන් ඉටුකළ කොන්ත්රාත් කටයුතු වෙනුවෙන් රුපියල් බිලියන 195 ක පමණ මුදලක් මේ වනවිට ඉදිකිරීම් කොන්ත්රාත්කරුවන්ට ගෙවීමට ඇති බවට තොරතුරු වාර්තා වේ. මෙවර අයවැය තුළින් මෙම හිඟ මුදල් ගෙවීම සඳහා ප්රතිපාදන වෙන් කර තිබේ ද? නොඑසේනම්, ඒ සඳහා රජය සතු වැඩපිළිවෙල කුමක්ද? එමෙන්ම, කොන්ත්රාත්කරුවන්ට මුදල් ගෙවීමේ දී රජය සාධාරණ ක්රමවේදයක් අනුගමනය නොකරන බවත්, භාණ්ඩාගාරයෙන් මුදල් ලැබීමෙන් අනතුරුව ඇතැම් දේශපාලන බලපෑම් මත යම් පිරිසකට ප්රථමයෙන්ම ගෙවීම් සිදු කරන බවටත් චෝදනා එල්ල වේ. කොන්ත්රාත්කරුවන්ට ප්රමාද වූ ගෙවීම් සිදු කිරීමේ දී අනුගමනය කරන නිශ්චිත ක්රමවේදයක් පවතී ද? නොඑසේනම්, ඒ සඳහා විධිමත් ක්රමවේදයක් සකස් කිරීමට රජයට නොහැකිද?
- බොහෝවිට එක් ආණ්ඩුවක් සමයේ ආරම්භ කරන ලද සංවර්ධන ව්යාපෘති ඊළඟ ආණ්ඩුව බලයට පත්වූ පසු අතරමඟ නවතා දැමීම මේ වනවිට සාමාන්ය තත්ත්වයක් බවට පත්ව තිබේ. බොහෝ තාක්ෂණික ඇගයීම්වලින් පසු ආරම්භ කරන මෙවන් මහා පරිමාණ රාජ්ය ආයෝජන ආණ්ඩු මාරුවීම නිසාම වෙනස් වීම තුළින් අති විශාල සම්පත් නාස්තියක් සිදුවේ. මේ සම්බන්ධයෙන් නිශ්චිත ප්රතිපත්තියක් සකස් කළ නොහැකි ද? ඒ සඳහා රජය සතු වැඩපිළිවෙල කුමක් ද?
- රජයේ තීරණය අනුව රාජ්ය සංවර්ධන ව්යාපෘති බොහොමයක් මේ වනවිටත් මුළුමනින්ම නතර කර ඇත. එසේම, යෙදවුම්වල අධික පිරිවැය සහ ඉදිකිරීම් ද්රව්ය හිඟය හේතුවෙන් පෞද්ගලික අංශය ද තම ව්යාපෘති නතර කොට තිබේ. දැනට සිදු කරමින් පවතින සීමිත ව්යාපෘති සංඛ්යාව ද නුදුරු අනාගතයේ දී අවසන් වනු ඇත. එම තත්ත්වය හමුවේ මෙම ක්ෂේත්රයේ රැකියාවල නියුතු සේවකයින් බහුතරයකට සිය ජීවනෝපාය අහිමිවීමේ අවධානමක් මතුව තිබේ. මේ සම්බන්ධයෙන් රජයේ අවධානය යොමු වී තිබේ ද? එසේනම්, ඒ සඳහා රජය විසින් ගෙන ඇති පියවර කවරේ ද?
- විදේශ රටවල ඉදිකිරීම් ක්ෂේත්රයේ රැකියා අවස්ථා රැසක් පවතින අතර, එම විදේශ රැකියා සඳහා විදෙස් ගතවීමට ද විශාල පිරිසක් බලාපොරොත්තු සහිතව සිටින බව ද නොරහසකි. නමුත්, බොහෝ ශ්රමිකයන්ට සිය වෘත්තීය සුදුසුකම් සහතික කර ගැනීමේ ගැටලු නිසා විදේශ විනිමය ඉපයීමට ඇති අවස්ථා අහිමි වී ඇත. ඔවුන්ට වෘත්තීය ප්රායෝගික පුහුණු සහතික (Trade Certificate) ලබා ගැනීම සඳහා රජය පහසුකම් සලසන්නේ ද? ඒ සඳහා මේ වන විට ගෙන ඇති පියවර කවරේ ද?
- උපාධි හා අනෙකුත් වෘත්තීය පාඨමාලා හදාරා ප්රායෝගික පුහුණු සඳහා ඉදිකිරීම් ක්ෂේත්රයේ රැකියා අවස්ථා අපේක්ෂාවෙන් වාර්ෂිකව 20,000ක පමණ පිරිසක් මෙම ක්ෂේත්රයට පිවිසෙයි. ක්ෂේත්රයේ බිඳවැටීමත් සමඟ පුහුණුලාභීන්ට සිය පුහුණු අවශ්යතා අහිමි වීම වෙනුවෙන් ලබාදිය හැකි විසඳුම් රජය හඳුනාගෙන තිබේද? ඒ මොනවාද?
සජිත් ප්රේමදාස (පා.ම.)
විපක්ෂ නායක
