බටලන්ද වධකාගාර සිද්ධිය සම්බන්ධයෙන් චෝදනා එල්ල වී සිටින හිටපු ජනාධිපති රනිල් වික්රමසිංහ මහතාට එරෙහිව, අදාළ චෝදනා සම්බන්ධයෙන් නීතිය ක්රියාත්මක කළ හැකි ආකාරය පිළිබඳ මානව හිමිකම් ක්රියාකාරී, නීතිඥ, මහාචාර්ය ප්රතිභා මහානාම හේවා මහතා අදහස් දක්වා තිබෙනවා. පහත පළවන්නේ, මහනාම හේවා මහතා සිදුකරන එම පැහැදිලි කිරීමයි.Sri Lanka Latest News
‘ශ්රී ලංකාවේ මූලික වශයෙන්ම පරීක්ෂණ කොමිෂන් සභාවක් පත්කරලා තිබෙනවා. මේ පරීක්ෂණ කොමිෂන් සභා පත්කරනවා පනත් දෙකකින්. එකක් තමයි 1948 අංක 7 දරන පරීක්ෂණ කොමිෂන් සභා පනත. ඒ වගේම 1978 අංක 14 දරන ජනාධිපති විශේෂ කොමිෂන් සභා විශේෂ ප්රතිපාදන පනත. මේ පනත් දෙකෙන් තමයි මූලික වශයෙන්ම ජනාධිපති කොමිෂන් සභා පත්කරන්නේ. 1978 විශේෂ ජනාධිපති කොමිෂන් සභා විශේෂ ප්රතිපාදන පනත යටතේ පූර්ණ බලතල තියෙනවා ජනාධිපතිවරයා විසින් ඒ කොමිෂන් සභාව යටතේ යම්කිසි විදියකට පරීක්ෂණ කොමිෂන් සභාවක් පත්කළොත් ඒතැනදී ඒක පාර්ලිමේන්තුවට ඉදිරිපත් කරලා, ඡන්දේ විමසලා කෙනෙක්ගේ ප්රජා අයිතිය, නැත්නම් ප්රජා සිවිල් අයිතිය අහෝසි කරන්න පුළුවන්. හිටපු අගමැතිනි සිරිමාවෝ බණ්ඩාරනායක, හිටපු නගරාධිපති ෆවුසි මහත්මයා, හිටපු අධිකරණ ඇමැති ෆීලික්ස් ඩයස් බණ්ඩාරනායක මහත්මයාගේ ප්රජා අයිතිය අහෝසි කළා. ඒ පනත යටතේ විශේෂ බලතල තියෙනවා ප්රජා අයිතිය සිවිල් අයිතිය අහෝසි කරන්න යම්කිසි කෙනෙක් ඒ යටතේ විමර්ශනය කරනවා නම්. ඒක පාර්ලිමේන්තුව විසින් තමයි සිදුකරන්නේ.
1948 අංක 14 දරන පරීක්ෂණ කොමිෂන් සභා පනත යටතේ ජනාධිපතිවරයා පරීක්ෂණ කොමිෂන් සභාවක් පත්කරනවා එවැනි කොමිෂන් සභාවක් තමයි බටලන්ද නිවාස සංකීර්ණයේ පවත්වාගෙන ගිය නීති විරෝධී මධ්යස්ථාන හා එහිදී සිදුවූ අමානුෂික වධ හිංසාවලට ලක්වූ අය පිළිබඳ හොයන පරීක්ෂණ සභාව. මේ පරීක්ෂණ කොමිෂන් සභාව පත්කළා ඉතා දීර්ඝ සාක්ෂි විමසීමක්, ලිඛිත, කථික, ආවේශ සියලු දෙයක්ම සොයාගත්තා. මේ පනත යටතේ දැන් ඒ පරීක්ෂණ කොමිෂන් සභා වාර්තාව හදලා නිර්දේශ හදලා තියෙනවා. මේ පරීක්ෂණ කොමිෂන් සභා වාර්තාව පාර්ලිමේන්තුගත කළේ නෑ. මොකද ඒ පනත යටතේ පරීක්ෂණ කොමිෂන් සභා වාර්තාව පාර්ලිමේන්තුවේ සභාගත කරනවා. හැබැයි මේ පරීක්ෂණ කොමිෂන් සභාවේ තියෙන බලතල නිර්ණය ගත්තම මේ බටලන්ද කොමිෂන් සභා පරීක්ෂණ වාර්තාව අනුව කෙනෙක්ගේ ප්රජා අයිතිය හෝ සිවිල් අයිතිය අහෝසි කිරීමට බලතලයක් නෑ. ඒ නිසා මේ පරීක්ෂණ කොමිෂන් සභාව ඉතා හොඳින් කළා. සාක්ෂි රැස්කළා. සාක්ෂි මෙහෙයෙව්වා. දැන් නිර්දේශ දීලා තියෙනවා. දැන් පාර්ලිමේන්තුවට අවස්ථාවක් තියෙනවා දීලා තියෙන නිර්දේශ මත ඉදිරියේදී යම් යම් දේවල් වෙනස් කරන්න.
මූලික වශයෙන්ම බටලන්ද කොමිෂන් සභා වාර්තාව නීතිපතිවරයා වෙත යොමු කරලා නීතිපතිවරයාගේ උපදෙස් අනුව එහිදී අපරාධ වැරැදි සිදුවෙලා තියෙනවා නම්, අපරාධ සම්බන්ධ නඩු පැවරීමේ සම්පූර්ණ කාර්යභාරය නීතිපති කාර්යාලය හරහා සිදුවෙනවා. නමුත් මේකේ තව නිර්දේශ තියෙනවා, දවස් දෙකක් පාර්ලිමේන්තුවේ කතා වෙනවා. ඒක බොහොම හොඳයි. මොකද මේකේ දීලා තියෙන වැදගත්ම නිර්දේශයක් තමයි 1978 ආණ්ඩු ක්රම ව්යවස්ථාවෙන්, මූලික මිනිස් අයිතිවාසිකම් පරිච්ඡේදය සම්පූර්ණයෙන් වෙනස් වෙන්න ඕනේ. ඒකට ප්රධාන හේතුව ජීවත්වීමේ අයිතිය අපේ ව්යවස්ථාවේ නෑ. ඔන්න දැන් අවස්ථාවක් තියෙනවා ඒ නිර්දේශ ක්රියාත්මක කරන්න. ඒ වගේම තවත් වැදගත් නිර්දේශයක් තියෙනවා මහෙස්ත්රාත්තුමාලාට, බන්ධනාගාරයක් වෙන්න පුළුවන්, රැඳවුම් ස්ථානයක් වෙන්න පුළුවන්, කොහේ හරි ගිහිල්ලා ඕනේ වෙලාවක ඒවා සොයාබැලීම සඳහා. මෙකී නොකී නිර්දේශ ගණනාවක් තියෙනවා. ඒ නිර්දේශවල ඉතා වැදගත් තත්ත්වය තමයි ඒවා ක්රියාත්මක කරන්න. නමුත් පාර්ලිමේන්තුවට මේ බටලන්ද පරීක්ෂණ වාර්තාව දැම්මේ නැති නිසා ඒක සාකච්ඡා වුණේ නෑ. ඉතින් ඒක යම්කිසි අඩුපාඩුවක්. පරීක්ෂණ කොමිෂන් සභාවක වාර්තාව ජනාධිපතිවරයාට දුන්නාම ඒක සභාගත කළ යුතුයි. ඒ ඓතිහාසික වරද දැන් නිවැරැදි කරලා තියෙනවා. ඉතින් මූලික වශයෙන්ම මේ බටලන්ද පරීක්ෂණ වාර්තාවේ තියෙන නිර්දේශ ගොඩක් ඒවා මේ පාර්ලිමේන්තුවට සාකච්ඡා කරලා ජනතාවගේ මූලික මිනිස් අයිතිවාසිකම් ආරක්ෂා කිරීම සඳහා ක්රියාත්මක කරන්න පුළුවන්. මේ පරීක්ෂණ වාර්තාව නීතිපතිවරයා වෙත යවලා එතැනදී උපදෙස් අරගෙන ඒ අපරාධ නඩු පැවරීම් කරනවා නම් අපරාධ නඩු පැවරීම් කරන්න පුළුවන්. හැබැයි බටලන්ද පරීක්ෂණ කොමිසම දාලා තියෙන්නේ 1978 අංක 14 දරන ජනාධිපති විශේෂ කොමිෂන් සභා විශේෂ ප්රතිපාදන යටතේ නෙවෙයි. ඒ නිසා කෙනකුගේ ප්රජා අයිතිය හෝ සිවිල් අයිතිය අහෝසි කිරීම සඳහා මේ පරීක්ෂණ කොමිෂන් සභාවට ඒ බලයක් දීලා නෑ. නමුත් මම කලින් කියපු ආකාරයට ඒ බලතල ක්රියාත්මක කරන්න පුළුවන්. මේ පිළිබඳ දැන් හෝ ඇස් ඇරීම හොඳම කරුණක්.
ලංකාවේ තවත් පරීක්ෂණ කොමිෂන් සභා වාර්තා තියෙනවා. උදුලාගම පරීක්ෂණ කොමිෂන් සභා වාර්තාව, මැක්ස්වල් පරණගම පරීක්ෂණ කොමිෂන් සභා වාර්තාව වගේ ඒවා. ඉතින් ඒවත් සභාගත කරන්න. ඒවත් ඉදිරියේදී සභාගත කරලා ලංකාවේ ජනතාවගේ ජීවත් වීමේ අයිතිය, නිදහස මූලික මිනිස් අයිතිවාසිකම් ආරක්ෂා කරන්න ඕනේ. හැකි ඉක්මනින් මේ නඩු විභාග කිරීම සඳහා ක්රමවේදයකුත් හදන්න ඕනේ….’
