ජනාධිපති රනිල් වික්රමසිංහ මහතා සහ ස්වාධීන මැතිවරණ කොමිසමේ නිලධාරීන් අතර ජනාධිපති ලේකම් කාර්යාලයේදී පසුගිය බ්රහස්පතින්දා (05) පැවැත්වූ සාකච්ඡාවකදී සිදුවූ බවට සියලු මාධ්ය වාර්තා කොට ඇති පුවත සම්පූර්ණයෙන් අසත්ය එකක් බව මේ වන විට තහවුරු වී තිබේ.
පහත පළවන්නේ එම සාකච්ඡාව සම්බන්ධයෙන් මාධ්ය පළකොට තිබූ පුවතය.
එක මතයකට එන්න ජනපති මැතිවරණ කොමිසමට කියයි!
පළාත් පාලන මැතිවරණය පැවැත්වීම සම්බන්ධයෙන් මත හතරක් නොදරමින් එක මතයකට පැමිණ කටයුතු කරන්නැයි ජනාධිපති රනිල් වික්රමසිංහ මහතා මැතිවරණ කොමිසමේ සාමාජිකයන් සිව්දෙනාට අද (5) දැනුම් දුන්නේය.
මැතිවරණ කොමිසමේ සාමාජිකයන් සිව්දෙනා අද සවස ජනාධිපති ලේකම් කාර්යාලයට පැමිණ ජනාධිපතිවරයා හමු වූ අවස්ථාවේදී ජනාධිපතිවරයා මේ බව සඳහන් කළේය.
මෙම සාකච්ඡාවට අග්රාමාත්ය දිනේෂ් ගුණවර්ධන,නීතිපති සංජය රාජරත්නම්,අතිරේක සොලිස්ටර් ජනරාල් නෙරිල් පුල්ලේ,මැතිවරණ කොමිසමේ අධ්යක්ෂ ජනරාල් සමන් ශ්රී රත්නායක මහතා ඇතුළු කොමිසමේ සාමාජිකයෝ හතර දෙනෙක් ද සහභාගී වූහ.
පළාත් පාලන මැතිවරණය සම්බන්ධයෙන් මැතිවරණ කොමිසමේ සාමාජිකයන් මත හතරක් දැරීම සම්බන්ධයෙන් අදහස් දක්වමින් ජනාධිපතිවරයා පැවසූයේ කොමිසමේ නිදහස කොමිසමට බාර දී ඇති අතර බහුතර ඒකමතික මතයකට පැමිණ තීරණයක් ගන්නා ලෙසයි.
මැතිවරණ කොමිසමට ස්වාධීනව කටයුතු කිරීමට කිසිදු බාධාවක් නොමැති බව කී ජනාධිපතිවරයා කොමිසමට අවශ්ය නම් නීතිපතිගෙන් ලිඛිත උපදෙස් ලබා ගන්නා ලෙසද දැනුම් දී දුන්නේය. නීතිපති දෙපාර්තමේන්තුව අදාල නීති සහයෝගය ලබාදෙනු ඇති බව ද ජනාධිපතිවරයා වැඩිදුරටත් පවසා තිබේ.
එහිදී අදහස් දක්වමින් නීතිපතිවරයා පැවසූයේ මැතිවරණ කොමිසමේ කටයුතු පිළිබද යම් නීති ගැටලූවක් ඇතොත් සෘජුවම තමාගෙන් ඒ පිළිබඳව විමසන ලෙසයි.
මැතිවරණ කොමිසමේ සාමාජිකයන් එක් මතයක් නොදැරීම නිසා අදාළ සාකච්ඡාව එකඟතාවකින් තොරව අවසන් වූ බව දේශපාලන ආරංචි මාර්ග සඳහන් කරයි.
පුවතේ මේ ආකාරයෙන් සඳහන්ව තිබුණත් මෙහිදී සිදුව ඇත්තේ හාත්පසින්ම වෙනස් දෙයකි.
පළමුව මෙම පුවතේ කොමිසමේ සාමාජිකයන් හතර දෙනකු පමණක් සහභාගි වූ බව සඳහන්ව තිබුණද, එම සාකච්ඡාවට කොමිසමේ සභාපති නිමල් පුංචිහේවා මහතා ඇතුළු සියලු සාමාජිකයන් සහභාගි වීමට පියවර ගෙන ඇත. මෙහිදී සාකච්ඡාව ආරම්භයේදී ජනාධිපතිවරයා කොමිසමේ සාමාජිකයන්ගෙන් විමසා ඇත්තේ ‘දැන් ඡන්දය කරන්නේ කෙසේදැ’යි කියාය. ඊට කොමිසමේ සාමාජිකයන් පිළිතුරු දී ඇත්තේ, මේ වන විට එහි වැඩකටයුතු සියල්ල සිදුවෙමින් පවතින බවත්, අධිකරණයමය හෝ ව්යවස්ථාමය ගැටලුවක් මතු නොවුණහොත් තීරණය කරගත් ආකාරයට මැතිවරණය පැවැත්වීමට පියවර ගන්නා බවය.
කොමිසමේ නිලධාරීන් මෙසේ පිළිතුරු දෙද්දී ජනාධිපතිවරයා ඊට කිසිදු වචනයක් ප්රකාශ කර නොමැති බව දැනගන්නට ඇත.
ඉන් අනතුරුව ජනාධිපතිවරයා, ‘ඔක්කොම එක මතයක නේද ඉන්නේ?’ යනුවෙන් විමසීමට පියවර ගෙන තිබේ. ඊටද කොමිසමේ සභාපතිවරයා පිළිතුරු දී ඇත්තේ, කොමිසමේ සියලු නිලධාරීන් එක මතයක සිටින බවත්, ඔවුන් අතර කිසිදු ගැටලුවක් නොමැති බවටය.
ඒ අනුව ඊටද ජනාධිපතිවරයා කිසිදු ප්රතිචාරයක් දක්වා නොමැති බව දැනගන්නට තිබේ.
එමෙන්ම මාධ්යවල පළවූ පුවතෙහි නීතිපතිවරයාද සාකච්ඡාවට සම්බන්ධ වී උපදෙස් ලබාදුන් බවක් සඳහන්ව තිබුණද, නීතිපතිවරයා කිසිදු මතයක් එහිදී ප්රකාශ කර නොමැති බවද දැනගන්නට තිබේ.
ඒ අනුව මෙම පුවත සියලු මාධ්යවලට යොමුකොට ඇත්තේ එක් ස්ථානයකින් බව මැතිවරණ කොමිසමේ නියෝජිතයන් හට මේ වන විට තහවුරු වී ඇත.
එමෙන්ම මෙවැනි සාකච්ඡාවලට ස්වාධීන මැතිවරණ කොමිසමේ නියෝජිතයන්ට සහභාගි විය නොහැකි බවට සිකුරාදා දිනයේදී විපක්ෂය මාධ්ය හමුවක් කැඳවා සිදුකරනු ලැබූ විවේචනයෙන් පසු ඉදිරියේදී ජනාධිපතිවරයා කැඳවන කිසිදු සාකච්ඡාවකට සහභාගි නොවීමටද මැතිවරණ කොමිසම තීන්දු කොට ඇති බව දැනගන්නට තිබේ.
