ජනාධිපති ගෝඨාභය රාජපක්ෂ මහතා මෙම මස තුන්වන සතියේ ඇමරිකාව බලා පිටත් වීමට නියමිතව තිබේ.
එක්සත් ජාතීන්ගේ සංවිධානය මෙවර සැසිවාරය ඇමතීම සඳහා එ් මහතා එම නිල සංචාරයේ යෙදීමට නියමිතය.
සමුළුව සැප්තැම්බර් මස 21 සිට 23 දක්වා නිව්යෝක් නුවර එක්සත් ජාතීන්ගේ මූලස්ථානයේ දී පැවැත්වේ.
ජනාධිපතිවරයා සමඟ මේ සමුළුව සඳහා තවත් සීමිත පිරිසක් සහභාගි වීමට නියමිතව ඇත.
කෙසේවෙතත් ජනාධිපතිවරයාගේමෙම අමෙරිකානු සංචාරය පිළිබදව පළමු වරට රටට හෙළිකළේ අප වෙබ් අඩවිය මගින් ඉකුත් අගෝස්තු මස 2 දිනය. ඒ, ‘සමුලු 2කට සහභාගී වෙන්න ජනපති බ්රිතාන්යයට-අමෙරිකාවට!’ යන සිරස්තලය යටතේය.
අප පළ කළ එම සම්පූර්ණ පුවත මෙසේය.
ජනාධිපති ගෝඨාභය රාජපක්ෂ මහතා ලබන සැප්තැම්බරයේ විදෙස්ගත වීමටද සූදානමින් සිටින බව වාර්තා වේ.
ඒ අනුව ජනාධිපතිවරයා පළමුවෙන්ම යෑමට නියමිතව ඇත්තේ බ්රිතාන්යයටය. ඒ, ලන්ඩන්වල පැවැත්වීමට නියමිත පාරිසරික සමුළුවකට සහභාගි වීම සඳහා බව පැවසේ.
ජනාධිපතිවරයා රසායනික පොහොර භාවිතය තහනම් කිරීමට තීන්දු කිරීමත් සමග මෙම සමුළුවේ සංවිධායකයන් විසින් ජනාධිපතිවරයාට ලිපියක් එවමින් එම තීන්දුව මහත් ඇගැයීමකට ලක්කිරීමට පියවර ගෙන තිබිණ. එපමණක් නොව මෙම සමුළුවට සහභාගි වී දේශනයක් පවත්වන ලෙසද එම ලිපිය මගින් ඔවුන් ජනාධිපතිවරයාට ආරාධනා කොට තිබිණ.
මුල් අදියරේදී එම ආරාධනාව බාර නොගෙන සිටියත් පසුව එම ආරාධනාව බාර ගැනීමට ජනාධිපතිවරයා තීරණය කර ඇති බව වාර්තා වේ.
ඒ අනුව ලබන සැප්තැම්බරයේ ලන්ඩනය බලා යෑමට ජනාධිපතිවරයා සැලැසුම් කර ඇති බවක් දැනගන්නට ඇත.
එම ලන්ඩන් සමුළුවෙන් පසු ජනාධිපතිවරයා කෙළින්ම ඇමෙරිකාව බලා යෑමටද සැලැසුම් කර ඇති බව වාර්තා වේ.
ඒ, වොෂින්ටනයේ පැවැත්වීමට නියමිත එක්සත් ජාතීන්ගේ මහා මණ්ඩල සැසිවාරයට සහභාගි වීම සඳහාය.
ජනාධිපති ධුරයට පත්වීමෙන් පසුව ජනාධිපතිවරයා සභභාගී වන පළමු එක්සත් ජාතීන්ගේ මහ මණ්ඩල සැසිවාරය වන්නේ මෙයය.
එම සංචාරයේදී ජනාධිපතිවරයා තම මිණිපිරියද පළමු වතාවට දැකබලා ගැනීමට සූදානමින් සිටින බවත් දැනගන්නට ඇත.
