වැව්තාවුලු අනවසරයෙන් අත්පත් කරගෙන සිදුකර ඇති සියලු අනීතික ඉදිකිරීම් ඉවත් කිරීම වහාම ආරම්භ කරන බව අමාත්ය කේ.ඩී. ලාල්කාන්ත මහතා පසුගියදා සඳහන් කළා. බතලගොඩ වී පර්යේෂණ හා සංවර්ධන ආයතනයේ පැවැති උත්සව සභාවක් අමතමින් ඒ මහතා කියා සිටියේ අනුරාධපුර දිස්ත්රික්කයෙන් මෙම වැඩසටහන ආරම්භ කරන බවත්, එලෙස අත්පත් කරගැනීමේදී කිසිවකුට වන්දි ලබාදීමක් සිදු නොකරන බවයි. එහිදී ලාල්කාන්ත මහතා සඳහන් කළේ මෙවැන්නකි.Sri Lanka Latest News
‘දේශපාලනඥයොයි, නිලධාරියොයි, මහජනතාවයි ඔක්කොම අපි එකතු වෙලා මේක විනාශ කරලා තියෙන්නේ. ගමකට ගිහින් බලන්න මොකක්ද කියලා තත්ත්වේ. වැව් තාවුලුවල හෝටල් ගහලද? වැව් තාවුලු විනාශ කරලද? මිනිස්සු ඒවායේ පදිංචි වෙලාද? වැවේ මායිමෙන් වැව ඇතුළට ඇවිල්ලද නැද්ද? ඒක විනාශයක් නෙමෙයිද? අපි ඔක්කොම ඉද්දි වැව විනාශ වෙලානේ. තමන්ගේ වැවට කෙළවෙනකන් ගොවියොත් බලන් හිටියා.
වැවේ මායිම වැවට දිය යුතුමයි. ඒ වැඩේ අනුරාධපුරයෙන් ආරම්භ කරනවා. එතකොට වැව් තාවුලු අස්සේ ඉන්න අප්පුඩි ගහපු අයටත් වැවෙන් එළියට යන්න වෙනවා. වන්දි ඉල්ලන්න එන්න එපා. වන්දි දෙන්න ඕනෙ රජයට. මොකටද? තමන් වැව් තාවුලු අස්සට ආවට. වැව් ඇතුළේ ඉන්න අය?, ප්ලීස් රටටමයි මේ කියන්නේ. කරුණාකරලා වැව්වලින් එළියට යන්න යවන්න කලින්.
උද්ඝෝෂණ කොච්චර කළත් අපි අපේ ස්ථාවරයන් ප්රතිපත්ති වෙනස් කරන්නේ නැහැ. එහෙම තමයි. එහෙම නැතුව මේ රට හදන්න බැහැ. අරයා කියනකොට පස්සට අදින්නයි මෙයා කියනකොට ඉස්සරහට ගන්නයි එහෙම කරන්න බැහැ. එහෙම කරලා තමයි මේ කෙළවෙලා තියෙන්නේ…’
කෙසේ වෙතත්, වැව්තාවුලු අත්පත් කරගෙන ඇතැමුන් ඉදිකර ඇති අනවසර ඉදිකිරීම් සියල්ල ඉවත් කරන බවට කෘෂිකර්ම අමාත්ය කේ.ඩී. ලාල්කාන්ත මහතා කළ ප්රකාශයට අභියෝග කරමින් ජවිපෙ හිටපු මධ්යම කාරකසභිකයකු වන ඉන්ද්රානන්ද ද සිල්වා මහතා කියා සිටියේ ප්රසිද්ධ ව්යාපාරික ඩඩ්ලි සිරිසේන මහතා පොළොන්නරුවේ පරාක්රම සමුද්රය ආසන්නයේම සුදු අරලිය නමින් විශාල හෝටලය ඉදිකර ඇති බවත්, හැකි නම් කයිවාරු නොගසා එය ඉවත් කිරීමට කටයුතු කරන ලෙසත්ය.
රැස්වීමක් අමතමින් ඔහු මෙලෙස කියා සිටියා.
‘ඊයේ කෘෂිකර්ම ඇමැති ලාල් කාන්ත සහෝදරයා ප්රකාශයක් කරමින් කියනවා සියලු වැව් තාවුලු අල්ලගෙන ඉන්න අනවසර ඉදිකිරීම් සියල්ලම ඉවත් කරනවා කියලා. ඔහු කියනවා හෙට ඉඳන් අනුරාධපුරයෙන් පටන් ගන්නවා කියලා. ඔහු ඒකෙදි වැඩිපුරම චෝදනා කරන්නේ ගොවි සංවිධානවලට. රැස්වීමේ හිටපු ජනතාවට කියනවා ඕගොල්ලො හැමෝමත් මේකට වග කියන්න ඕන කියලා. එහෙම කියලා කියනවා හෙට ඉඳන් මේක සම්පූර්ණයෙන් අපි ඉවත් කරනවා. ඒ විතරක් නෙමෙයි ඔහු ඒකෙදි කියනවා කාටවත් වන්දි දෙන්නේ නෑ කියලා. හැබැයි මතක තියාගන්න. එහෙම අයින් කරන හැමෝම වන්දි ගෙවන්න ලෑස්ති වෙන්න මෙච්චර කල් අල්ලන් හිටියට කියලා.
ඒ නිසා අපි ලාල්කාන්ත සහෝදරයාට බොහොම සහෝදරත්වයෙන් මතක් කරලා දෙන්න කැමතියි මේ නිකන් කයිවාරු කතා නවත්තලා එන්න පොළොන්නරුවට. ඇවිල්ලා බලන්න වැව්තාවුල්ල පරාක්රම සමුද්රයේ ඉඳන් අල්ලන් ඉන්නේ කවුද කියලා. ඒ ඇවිල්ලා ගොවි සංවිධාන නායකයෝද? ජනතාවද? එහෙම නැත්නම් මහා පරිමාණ ධන කුවේරයෝද?
පොළොන්නරුවේ හැමෝම දන්නවා ඩඩ්ලි සිරිසේනගේ ‘සුදු අරලිය’ හෝටලේ කොහොමද පරාක්රම සමුද්රය අල්ලන් ඉන්නේ කියලා. ඒ විතරක් නෙවෙයි ඒ සුදු අරලිය හෝටලේ ජනතාව රැස්වෙන විනෝද වෙන ස්ථානයට වතුර පිරිච්ච ගමන් දොර දහය අරිනවා. ඒ නිසා හැමදාමත් පොළොන්නරුවේ ගොවියෝ පුදුමයකට පත්වුණා කොහොමද මේ වැහි දෙකෙන් තුනෙන් වැව පිරුණේ, වැව පිරිලා නෑ හැබැයි දොර දහය අරිනවා. දොර දහය ඇරියේ වෙන මුකුත් හින්දා නෙමෙයි ඩඩ්ලිගේ හෝටලේ සුදු අරලිය හෝටලේ පිටිපස්ස පිරෙන හින්දා ඔහු ඉංජිනේරුවරුන්ට ජරාව දීලා හැමදාමත් දොර දහය ඇරලා අක්කර අඩි දහස් ගානක් අපතේ යැව්වා.
ඒ හින්දා මේක පොළොන්නරුවේ හැමෝම දන්නවා. ඔය කියන ලාල්කාන්තත් දන්නවා. ඒ නිසා අපි ලාල්කාන්තලාට කියනවා කයිවාරු ගහ ගහා ඉන්නේ නැතුව පුළුවන් නම් එන්න පොළොන්නරුවට. ඇවිල්ලා ‘සුදු අරලිය’ හෝටලේ ඇතුළු අනවසරයෙන් අල්ලන් ඉන්න මහා ධනකුවේරයන්ගේ ඒ හෝටල් ටික පුළුවන් නම් අයින් කරලා පෙන්නන්න….’
