සුළු හා මධ්‍ය පරිමාණ ව්‍යාපාර සඳහා විශාලතම ණය දෙන්නා බවට කොමර්ෂල් බැංකුව පත්වේ

කොමර්ෂල් බැංකුව 2020 වසරේදී මෙරට සියලු රාජ්‍ය, පෞද්ගලික සහ විශේෂිත බැංකු අතර සුළු හා මධ්‍ය පරිමාණ ව්‍යාපාර සඳහා විශාලතම ණය දෙන්නා බවට පත්වූ බව මුදල් අමාත්‍යාංශය තහවුරු කර ඇත. සමස්ත ණය වටිනාකම සහ ණය සංඛ්‍යාව ගත් කලද එය රටේ මුළු ණයවලින් පහෙන් එකකට වඩා වැඩි අගයක් නියෝජනය කරයි. 2020 සඳහාවූ මුදල් අමාත්‍යාංශයේ වාර්ෂික වාර්තාවට අනුව, වසංගතයෙන් බලපෑමට ලක්වූ වර්ෂය තුළ මූල්‍ය ආයතන 19ක් විසින් සුළු හා මධ්‍ය පරිමාණ ව්‍යවසායකයන්ට ලබාදුන් රු. බිලියන 759.7ක ණය අතුරින් 21.57%ක් හෙවත් රුපියල් බිලියන 163.98ක ණය කොමර්ෂල් බැංකුව ලබාදී ඇති අතර බැංකුව මඟින් ලබාදුන් 58,584ක් වූ ණය සංඛ්‍යාව ලබාදී ඇති සමස්ත ණය සංඛ්‍යාව වන 245,883න් 23.82%ක් නියෝජනය කරයි. සුළු හා මධ්‍ය පරිමාණ ව්‍යාපාර සඳහා කොමර්ෂල් බැංකුව ලබාදුන් ණයවල වටිනාකම ඊළඟ ණය දෙන්නා ලබාදුන් ණයවල වටිනාකමට වඩා රුපියල් බිලියන 21.6කින් හෙවත් 15%කින් වැඩි වන බව අමාත්‍යාංශ ප්‍රකාශිත දත්ත හෙළි කරයි.