ජනශක්ති සමාගමේ අධ්යක්ෂ දිනේෂ් ෂාෆ්ටර් මහතාගේ ඝාතනය සම්බන්ධයෙන් මරණ පරීක්ෂණ සාක්ෂි විමසීම කොළඹ අතිරේක මහේස්ත්රාත් රජින්ද්ර ජයසූරිය මහත්මිය හමුවේ ඊයේ (10) දෙවැනි දිනටත් පැවැත්වුණු අතර, එහි සාක්ෂි විභාගය මහේස්ත්රාත් නිල මැදිරිය තුළ පැවැත්විණි.
සිද්ධියට අදාළ නඩුව විවෘත අධිකරණය හමුවේ කැඳවූ අතර මරණකරුගේ පාර්ශ්වය වෙනුවෙන් අධිකරණය හමුවේ පෙනී සිටි නීතිඥවරයාගේ ඉල්ලීම පරිදි මේ මරණ පරීක්ෂණ සාක්කි විමසීම මහේස්ත්රාත් නිල මැදිරිය තුළදී පස්වරු 12.30ට පමණ ආරම්භ විණි.
පැයකට අධික කාලයක් මේ සාක්කි විභාගය නිල මැදිරිය තුළ විභාගයට ගත් අතර අපරාධ පරීක්ෂණ දෙපාර්තමේන්තු නිලධාරීන් මෙන්ම බොරැල්ල පොලිසියේ අපරාධ අංශයේ ස්ථානාධිපතිවරයා අධිකරණය හමුවේ පෙනී සිටියේය.
ජනශක්ති සමාගමේ අධ්යක්ෂ දිනේෂ් ෂාෆ්ටර් මහතාගේ සොහොයුරකු වන රමේෂ් ෂාෆ්ටර් මහතා අධිකරණය හමුවේ සාක්කි දුන්නේය.
සිද්ධියට අදාළව සමාගම් අධ්යක්ෂවරයකු වන ක්රිස් පෙරේරා හා මරණකරුගේ බිරිය වන ටානි ෂර්මන් ෂාෆ්ටර් යන අය ඉකුත් (4) වැනි දින මහේස්ත්රාත් නිල මැදිරිය හමුවේ සාක්කි දුන්හ.
මේ ඝාතනය සම්බන්ධයෙන් සාක්කි දීම සඳහා බොරැල්ල පොදු සුසාන භූමියේ කම්කරුවන් දෙදෙනකුද නම් කර තිබේ.
කෙසේ වෙතත් සාක්කි දීමෙන් පසු සාක්කිකරුවන් මාධ්යයට මුහුණ නොදී කිසියම් පුද්ගලයන් පිරිසක් විසින් ආවරණය කරමින් අධිකරණ භූමියෙන් පිටතට ගෙන ගිය අතර මරණකරුගේ බිරිය සිය මුහුණ කෙස්වැටියෙන් වසාගෙන අධිකරණ භූමියෙන් පිටත්ව යෑම විශේෂත්වයකි.
සිද්ධියට අදාළව මරණ පරීක්ෂණ සාක්කි විභාගය සඳහා සාක්කි දෙකක් පමණක් ඊයේ (10) කැඳවූ අතර බොරැල්ල පොදු සුසාන භූමියේ කම්කරුවන් දෙදෙනාගේ සාක්කි විමසීම ලබන 10 වැනි දිනට කැඳවීමට මහේස්ත්රාත්වරිය විසින් නියම කරනු ලැබිණි.
ජනශක්ති සමාගමේ අධ්යක්ෂ දිනේෂ් ෂාෆ්ටර් මහතා බොරැල්ල පොදු සුසාන භූමිය වෙත ගෙන්වා ඝාතනය කිරීමේ සිද්ධිය සම්බන්ධයෙන් සියලු විමර්ශන අපරාධ පරීක්ෂණ දෙපාර්තමේන්තුව වෙත පොලිස්පතිවරයාගේ නියෝගයකට අනුව බාර දී ඇති අතර මේ මරණය ඝාතනයක්ද? නැත්නම් සියදිවි නසා ගැනීමක්ද යන්න අනාවරණය කර ගැනීමට පරීක්ෂණ අපරාධ පරීක්ෂණ දෙපාර්තමේන්තුව මඟින් ආරම්භ කර තිබේ.
මෙසේ බොරැල්ල පොලිසිය මඟින් ඝාතන ස්ථානයේ තිබී සොයාගත් වයර් කැබැල්ල, ලේ තැවරුණු රෙදි, දිනේෂ් ෂාෆ්ටර් මහතාගේ නියපොතු, ලේ සාම්පල මෙන්ම සොකෝ නිලධාරීන් විසින් සොයාගත් ස්ථානීය සාක්කි හා අපරාධ පරීක්ෂණ දෙපාර්තමේන්තුව මඟින් විමර්ශනයෙන් අනතුරුව සොයාගත් ස්ථානීය සාක්කි කිහිපයක් රස පරීක්ෂක වෙත යොමු කර රස පරීක්ෂක වාර්තාවක් මෙන්ම ඩීඑන්ඒ වාර්තාවක් කැඳවන ලෙසට ඉකුත් 2 වැනි දින අධිකරණ නියෝග නිකුත් කර තිබිණි.
ඉකුත් 15 වැනි දින ජනශක්ති සමාගමේ අධ්යක්ෂ දිනේෂ් ෂාෆ්ටර් මහතා කොළඹ 7 මල් පාරේ සිය නිවෙසේ සිට බොරැල්ල පොදු සුසාන භූමිය වෙත ගෙන්වා මොටර් රථය තුළදී වයරයකින් ගෙල සිර කර මෙසේ ඝාතනය කර තිබෙන බවට බොරැල්ල පොලිසිය අධිකරණයට කරුණු වාර්තා කර තිබිණි.
මරණකරුගේ පවුලේ අයිතිවාසිකම් වෙනුවෙන් ජනාධිපති නීතිඥ අනුජ ප්රේමරත්න මහතා ඇතුළු නීතිඥ මඬුල්ලක් පෙනී සිටියේය.
