මේ කතාව අපි ගන්නේ සමාජ ජාලයකින්. නැත්නම් ෆේස්බුක් එකෙන්. ෆේස්බුක් එකේ සුරේන් සාගර එදිරිවීර තමයි මේ කතන්දරය පළකරලා තිබුණේ. ඔක්තෝබර් මාසේ 08 වැනිදා තමයි මේ කතාව මුලින්ම සමාජ ජාලගත වුණේ. අද වෙනකොට මේක ගොඩ දෙනෙක් දැකපු, අහපු කතාවක්. මේ කතන්දරය අයිති වැල්ලවායට. වැල්ලවායේ ඉඳලා කිලෝමීටර් 15ක විතර දුරක් ඉස්සරහට යනකොට මේ කියන ආරණ්ය සේනාසනය මුණගැහෙන බවයි සුරේන් සාගර එදිරිවීර තමන්ගේ ෆේස්බුක් ගිණුමේ පළකරලා තිබුණේ. මේ ආරණ්යය භික්ෂුන්වහන්සේලා 15 නමක් පමණ වැඩවාසය කරන ස්ථානයක්. මේක ඉතා දුෂ්කර ගමක දුෂ්කර පරිසරයක තියෙන ආරණ්ය සේනාසනයක් විදියටයි අපට හඳුනාගන්න පුළුවන් වෙන්නේ. හරියටම කිව්වොත් එහෙම බඩල්කුඹුර ප්රාදේශීය ලේකම් කොට්ඨාසයට තමයි එක පැත්තකින් මේක අයිති. අනෙක් පැත්තෙන් වැල්ලවාය ප්රාදේශීය ලේකම් කොට්ඨාසය. මේක පැහැදිලි කරගත්තොත් බඩල්කුඹුර ප්රාදේශීය ලේකම් කොට්ඨාසයත්, වැල්ලවාය ප්රාදේශීය ලේකම් කොට්ඨාසයත් අතර තමයි මේ කියන ආරණ්ය සේනාසනය පිහිටලා තියෙනවාය කියලා කියන්නේ.
මේ ආරණ්ය සේනාසනයේ වැඩවාසය කරන භික්ෂුන්වහන්සේලාට හරි හමන් දාන වේලක් ලැබෙන්නේ නෑ කියලයි මේ සමාජ ජාල සටහනේ සඳහන් වෙලා තිබුණේ. භික්ෂුන්වහන්සේලා ආරණ්යගත වෙලා බණ භාවනා කරගෙන ඉන්නකොට උන්වහන්සේලාට සිවුපසයෙන් පුද සත්කාර කිරීම සාමාන්ය ගැමියන්ගේ රාජකාරිය. ගමේ මිනිස්සුන්ටත් කන්න බොන්න නැත්නම් ඒ මිනිස්සු කොහොමද මේ භික්ෂුන්වහන්සේලාට සිවුපසයෙන් උපස්ථාන කරන්නේ? මේ ෆේස්බුක් ලිපියේ අගට එකතු කරලා තිබුණේ භික්ෂුන්වහන්සේ නමක් තමන්ගේ සිවුරු පටින් දෑස පිහදාගනිමින් හඬාවැටෙන පින්තූරයක්. මේ පින්තූරය අපේ රටේ ඛේදවාචකය පිළිබඳ ලෝකයට කියන කතාවක්. උන්වහන්සේ මේ අඬන්නේ තමන්ගේ ගමේ මිනිස්සු බඩගින්නේ ඉඳගෙන හාමුදුරුවන්ට දානේ දෙනවාය කියන වේදනාවට. මිනිස්සු කොහොම හරි තමන්ගෙ බඩ වියත රැකගන්න තියෙන දේවල් ටික එකතු කරලා පන්සලේ හාමුදුරුවො බඩගින්නේ නොතියා උන්වහන්සේලාට දාන වේල අරගෙන යනවා. ලොකු පන්සල්වල ලොකු හාමුදුරුවරු ලොකු වාහන අරගෙන මගේ අලුත් වාහනේ කියලා ෆේස්බුක් එකේ දානකොට කෝටි ගණන්වල දේපළ එකතු කරනකොට පන්සල්වල ඉඩකඩම්වලට මහානායක හාමුදුරුවරු පවා නඩුහබ කියාගන්නා තැන්වලදී අපට මතක් වෙන්නේ කන්න නැති හාමුදුරුවරු අපේ රටේ ඉන්නවා කියන එක. උන්වහන්සේ මේ ගිය පිරිසකට කියලා තිබුණේ අපට කුසගින්න දරාගන්න පුළුවන්, ඒත් මේ ගමේ අයට කන්න නෑ. පුළුවන් නම් අපට නෙවෙයි ගමේ අයට කන්න දෙන්න කියලා. හාමුදුරුවොත් ගමේ මිනිස්සුත් අතර තියෙන සම්බන්ධතාව කොච්චර ලස්සනද කියලා අපට හිතුණා. ඒකට හේතුව අපේ සමහර පන්සල්වලින් ගමට පටවලා තියෙන බර කොච්චර බරද කියලා අපි දන්න නිසා. ගමේ ඉඩකඩම් පන්සලේ ඉඩකඩම් සල්ලිකාරයන්ට බද්දට දීලා බදු සල්ලි එකතු කරගන්න අස්සේ පන්සලේ වැට තරකරන වැටේ කම්බි පොටවල් තද කරන, පන්සලට බෝධි පූජාවකට දානෙකට මානෙකට ලේසියෙන් පැනගන්න පුළුවන් පන්සල් ඉඩමේ කපොලු පවා වහලා දාලා පන්සලේ ඉඩමුත් බදු දෙන කාලෙක මෙහෙම භික්ෂුන්වහන්සේලා අපේ රටේ ඉන්නවාය කියන එකත් අපට අදහන්න බැරි කාරණයක්. ඇත්තටම මේ රටට ලොකු ප්රශ්න ටිකක් තියෙනවා. අපි දැන් කන්නේ අමාරුවෙන්. අපි දැන් ජීවත් වෙන්නේ අමාරුවෙන්. අපි දැන් ඉන්නේ අන්ත අසරණ දුගී දුප්පත් රටක.
මේ ආරණ්යයේ නම බුළුගල්ලෙන ආරණ්ය සේනාසනය. උන්වහන්සේගේ දුරකතන අංකය 0766660513. මේ සමාජ ජාලයේ සඳහන් කරලා තිබුණු විදියට තවත් ස්ථාවර දුරකතන අංකයකුත් තියෙනවා. ඒ, 055 5755050 කියන දුරකතන අංකය. මේ අංක දෙකෙන් කොයි එකට හරි කතා කරලා මේ ආරණ්යයේ ඇත්තම කතාව ඔබට දැනගන්න පුළුවන්. මේ ගමේ ඇත්තම කතාවත් ඔබට දැනගන්න පුළුවන්. පන්සලේ හාමුදුරුවන්ට දානේ වේලක් අරගෙන යනවද, ගමේ මිනිස්සුන්ට කන්න ටිකක් අරගෙන යනවද කියන එක ඔබ තීරණය කරන්න. ඒ දෙකෙන් කොයික කළත් එක වගේම පින් සිදුවෙයි කියලා අපි හිතනවා. සමහර වෙලාවට මේ ලිපිය කියෙව්වට පස්සේ ඒ වචනෙට සමහර කෙනෙක් උරණ වෙයි. ඒ වුණාට ඇත්ත කතාව බඩගින්න කියන්නේ කාටත් දැනෙන දෙයක්. පාරේ ඉන්න සතෙකුටත්, පන්සලේ ඉන්න භික්ෂුවකටත්, දුගී පැලේ ඉන්න අහිංසක දුගියටත්, විසල් මාලිගාවේ ඉන්න මහා සල්ලිකාරයටත් එක වෙලාවක කුසගින්න දැනෙනවා. ඒ කුසගින්න ඉවසාගන්න බැරි තැන මිනිස්සු හොරු බවට පත්වෙනවා. අපිව කුසගින්න ඉන්න ජාතියක් බට පත්කළේ දේශපාලකයෝ. ඒ දේශපාලකයන්ගේ බඩ වඩාගන්න. උන් අපට කන්න තියෙන එක ඒගොල්ලන්ගේ විනෝදය සඳහා වියදම් කළා. මේ ලිපිය ලියන දවස වෙද්දී අහසට යවපු බැලුමක සංවත්සරය සමරන්න පුළුවන්. ඒ බැලුම කොහේ ගියාද කියලා දන්නේ නැති වුණාට, චූටි පුතාගේ ආශාව ඉෂ්ට කරන්න ඒ ආදරණීය තාත්තට පුළුවන් වුණා කියලා විතරක් අපට හිත හදාගන්න වෙනවා. ඒ තමයි රාජපක්ෂ ආණ්ඩුව අපට දුන්න තෑගි. දැන් අපි බඩගින්නේ මැරෙන්න යන ජාතියක්. කන්න නැතුව භික්ෂුන්වහන්සේලා අඬන ජාතියක්. ගමක් බඩගින්නේ ඉන්න ජාතියක්. හම්බවෙන හැම සතේම කෑමට වියදම් කරලා සියලු සැප පහසුකම් අතහැර දාලා දැන් අපි දුෂ්කර ක්රියා කරන්න පටන් අරගෙන. ස්තුතියි දේශපාලකයිනි ඔබ අපට තනා දුන්නු ලෝකයට. දැන් අපට වෙන කියන්න දෙයක් නෑ. මේ ලියන්නේ මේක කියවන්නෙ තවත් බඩගින්නේ ඉන්න මිනිස්සු මිසක් කෝටිපතියෝ නෙවෙයි. ඒ නිසා මේ ආරණ්ය සේනාසනයට කෑම බීම අරගෙන යන්න කියලා අපි ඉල්ලන්නේ තවත් අහිංසකයෝ පිරිසකගෙන්. ඔබට පුළුවන්කමක් තියෙනවා නම් විතරක් මේක කරන්න. අපි ඔබට බලකරන්නේ නෑ. මොකද ඔබේ ගින්දරත් අපේ ගින්දරත් එක වගේ නිසා අපි දන්නවා ඔබ ඉන්නෙත් ගින්නක කියලා. මොකද අපි ඉන්නෙත් ගින්නක.
ජීවන පහන් තිළිණ
