වසන්ත මුදලිගේ සහ ගල්වැව සිරිධම්ම හාමුදුරුවෝ අත්අඩංගුවට පත්වෙලා දැන් සෑහෙන කාලයක් ගතවෙලා තියෙන්නේ. රටේ සාමාන්ය නීති රීති ප්රකාරව ඔවුන් අත්අඩංගුවට අරගෙන, ඔවුන්ට එරෙහිව නීතිමය පියවර ගත්තා නම් මේ වෙනකොට මේ තත්ත්වය යම් කිසි විදියකට සමථයකට පත්වෙලා තියෙන්න පුළුවන්. හැබැයි මේ ගල්වැව සිරිධම්ම හාමුදුරුවෝ සහ වසන්ත මුදලිගේ සම්බන්ධව අපේ රටේ නීතිය ක්රියාත්මක වෙන ආකාරයේ යම් කිසි විශේෂත්වයක් අපට පේන්න තියෙනවා. ඒ වෙනස සහ ඒ අර්බුදකාරී තත්ත්වය පිළිබඳ අපි බොහෝ තැන්වල කතා කළා. සාකච්ඡා කළා. නමුත් තවමත් මේ ගැටුම ලෙහෙන ආකාරයක් දකින්න ලැබෙන්නේ නෑ. මේ වෙනකොට ශ්රී ලංකා මානව හිමිකම් කොමිසම විසින් ඒ සම්බන්ධව විශේෂ ප්රකාශයක් පවා නිකුත් කරන්න සූදානමින් සිටිනවා. ඒ නිසා ඒ ගැනත් අපට කතා කරන්න සහ අපට හොයන්න බලන්න සිද්ධ වෙන තැනකට මේ සිදුවීම පත්වෙමිනුයි තියෙන්නේ.
රටක් විදියට පුද්ගලයො අත්අඩංගුවට ගනිද්දී නීතිය අවභාවිත කිරීම ඉතා බරපතළ අර්බුදයක්. ඒ වගේම මේ විදියට නීතිය අවභාවිතයට ලක්කිරීම හේතුවෙන් සමහර විට රට ඇතුළේ අපි නොහිතන ප්රශ්න, තරුණ නැගිටීම් ඇතිවෙන්න ඉඩ තියෙනවා. එහෙම තරුණ නැගිටීම් හෝ අර්බුද ඇතිවීම රටක ඉදිරි ගමනට ඒ තරම් හොඳ දෙයක් නෙවෙයි. ඒ නිසා ඒ ගැනත් අපි සාකච්ඡා කළ යුතුයි. මේ මොහොතේ වැඩිපුරම කතාබහට ලක්වෙන කාරණය වෙන්නේ ගල්වැව සිරිධම්ම හාමුදුරුවෝ අසනීප වෙලා සිටියාය කියන කාරණය. ගල්වැව සිරිධම්ම හාමුදුරුවන්ට උණ රෝගය වැලඳී සිටියත්, උන්වහන්සේට නිවැරැදි ප්රතිකාරයක් නොකළ බව මුලින්ම රටට හෙළි කළේ උන්වහන්සේගේ අක්කා. මේ අක්කා වීඩියෝවක් නිකුත් කරමින් කියා සිටියේ සිරිධම්ම හාමුදුරුවෝ ඉන්නේ රෝගාතුරව, උන්වහන්සේට ප්රතිකාර අරගෙන දුන්නේ නෑ කියලා. ඒ පිළිබඳ ඉන් පසුව වගකිව යුතු ක්ෂේත්රය විසින් සිදුකරන ලද ප්රවෘත්ති සාකච්ඡා අපි දැක්කා. ඒ ප්රවෘත්ති සාකච්ඡාවලදීත් ඉදිරිපත් කර තිබුණු කාරණය වුණේ ගල්වැව සිරිධම්ම හාමුදුරුවන්ට බරපතළ ලෙස උණ රෝගය වැලඳිලා තියෙනවා, දවස් කිහිපයක් තිස්සේ. උන්වහන්සේට අවශ්ය ප්රතිකාර ලබාදීමට පියවර ගත්තේ නෑ. උන්වහන්සේව රෝහල්ගත කළේ නෑ කියලා. මේ විදියට රට ඇතුළේ විශාල කතාබහක් නිර්මාණය වුණාට පස්සේ විශාල අර්බුදයක් නිර්මාණය වෙන්නට යන බව තේරුණාට පස්සේ ඒ පිළිබඳ පියවර ගන්න ලංකාවේ ආණ්ඩුව පියවර අරගත්තා කියලා පසුව දැනගන්න ලැබුණා.
වසන්ත මුදලිගේටත් මේ විදියටම පාදයේ යම්කිසි ප්රශ්නයක් හේතුවෙන් රෝගාතුර වෙන්න සිදුවෙලා තිබුණු බවත්, වසන්ත මුදලිගේ සම්බන්ධව පියවරක් ගැනීමට කටයුතු නොකළ බවත් දැනගන්න ලැබෙනවා. සිරකරුවා කුමන හේතුවක් නිසා බන්ධනාගාරගත වුණත්, සැකකරුවකු ලෙස සිටියත් ඔහුට විරුද්ධව නීතිමය පියවර ගැනීම හැර ඒ පිළිබඳ වෙනත් කටයුත්තක් සිද්ධ කරන්න, නැත්නම් ඔවුන්ගෙන් පෞද්ගලිකව පලිගැනීමක් කරන්න කිසිවකුට හැකියාවක් නෑ කියලයි අපි යම් ආකාරයකින් මේ පිළිබඳ බන්ධනාගාරගත වෙලා ඉන්න සිරකරුවන්ගේ මානව හිමිකම් සම්බන්ධව සාකච්ඡා කරද්දී දැනගන්න ලැබුණු කාරණය. ඉතින් මේ තත්ත්වය යටතේ ගල්වැව සිරිධම්ම හාමුදුරුවන්ට මේ විදියට සලකන්න හේතුව මොකක්ද? ඒ පිළිබඳ මානව හිමිකම් කොමිසම අලුතින් නිකුත් කරලා තිබුණා එක්තරා වාර්තාවක් මේ පිළිබඳ මානව හිමිකම් කොමිසමට පැමිණිලි කිරීමෙන් අනතුරුව. ඒ වාර්තාවත් ඉතා වැදගත් සහ ඒ වාර්තාවේ තියෙන ප්රතිපාදන ක්රියාත්මක වෙනවාද යන්නත් සොයාබැලීම ඉතා වැදගත්.
උණ රෝගය හේතුවෙන් පසුගිය 25 වැනිදා ජාතික රෝහලට ඇතුළත් කරපු ගල්වැව සිරිධම්ම හිමියන්ට ඩෙංගු රෝගය වැලඳී ඇති බව මේ වෙනකොට දැනගන්න තියෙනවා.
දවස් 90ක් පුරා රැඳවුම් නියෝග මත රඳවා ප්රශ්න කරන බව කියමින් රඳවාගෙන ඉන්න සිරිධම්ම හිමියන් දවස් කීපයක් පුරා පැවැති’උණ රෝගය හේතුවෙන් කොළඹ ජාතික රෝහලේ 49 වැනි වාට්ටුවට ඇතුළත් කළ බවයි අපට දැනගන්න ලැබුණේ.
රුධිර පරීක්ෂාවන්ට අනුව’සිරිධ්ම්ම හිමියන්ගේ රුධිර පට්ටිකා ප්රමාණය 149,000ක් දක්වා අඩුවී ඇති බව කියවුණා. ඩෙංගු රෝගියකු බවට තීරණය වන්නේ පට්ටිකා ප්රමාණය 150,000ට අඩු වූ විට බවත්, සිරිධම්ම හිමියන්ටද ඩෙංගු වෛරසය ආසාදනය වී ඇතැයි නිගමනය කර ඇති බවත් වාර්තා වෙලා තිබුණා.
කෙසේ නමුත් උණ රෝග වැලඳී දින 4ක් ගතව ඇති බැවින් ඩෙංගු වෛරසය ආසාදනය වී ඇති හින්දා මේ අවදානම් සීමවා ඉක්මවා ගිහිල්ලා කියලයි ඔවුන් කියන්නෙ. නමුත් තවදුරටත් අධීක්ෂණය කරමින් ප්රතිකාර ලබාදෙන බවත් උන්වහන්සේගේ ආරක්ෂාවට ආරක්ෂක භටයන් යොදවා ඇති බවත් දැනගන්න ලැබෙනවා.
සාමාන්යයෙන් ඩෙංගු රෝගියකුට ඉතාම ඉහළ රැකවරණයක් අවශ්යයි කියලයි අපි දන්නෙ. ඇතැම් විට ඩෙංගු රෝගියාට පයින් යන්න එන්න පවා හොඳ නෑ. ඔවුන්ව රැගෙන යන්නෙ වෙනමම රෝද පුටුවක. ඒ අයට විශාල වශයෙන් නිදහස ඕනෙ. එහෙම තියෙද්දිත් සිරිධම්ම හාමුදුරුවෝ සම්බන්ධව මේ තරම් දැඩි ප්රතිපත්ති මත පිහිටා කටයුතු කරන්නේම පුද්ගලික කෝන්තරයක් නිසාද කියලා සාමාන්ය ජනතාව ප්රශ්න කරනවා.
ඒ වගේම සිරිධම්ම හාමුදුරුවන්ට ඩෙංගු මදුරුවා විදින්නෙ නියත වශයෙන්ම හිරගෙදරදී. එහෙම කොටුකරලා ඉන්න මනුස්සයෙක්ට මේ විදියට බරපතළ රෝගයක් හැදෙන්න ඉඩ දුන්නා නම් ඒකට කවුද වගකියන්නෙ? ඔවුන්ට මදුරු දැල් ලැබෙන්නෙ නෑ. මදුරු කොයිල් වේපරයිසර් නෑ. එහෙම නම් මේ අයට ආරක්ෂක පරිසරයක් හදන එක බලධාරීන්ගෙ වගකීම්. සමහර විට ඒ වගකීම් පැහැරහැරීම රටක් විදියට මීට වඩා විශාල අර්බුදයක් නිර්මාණය කරන්න ඉඩ තියෙනවා කියලා විතරක් මේ වෙලාවෙ ලියලා තියන්නම්.
සිරිධම්ම හාමුදුරුවන්ට අපි ඉක්මන් සුවය ප්රාර්ථනා කරමු.
ජීවන පහන් තිළිණ
