සර්ව පාක්ෂික ආණ්ඩුවක් පිහිටුවීම සඳහා ජනාධිපති රනිල් වික්රමසිංහ පවත්වන සාකච්ඡා අවසන් වූ වහා ම තිස් දෙනෙකුගෙන් සමන්විත ඇමති මණ්ඩලයක් පත්කිරීමට සැලසුම් කර ඇතැයි ජනාධිපති කාර්යාලයට සම්බන්ධ ආරංචි මාර්ග සඳහන් කරයි.
පාර්ලිමේන්තුව නියෝජනය කරන දේශපාලන පක්ෂ හා ජනාධිපතිවරයා අතර පැවැත්වෙන සාකච්ඡා ඉදිරි දෙසතිය තුළ අවසන් කර නව ඇමැති මණ්ඩලය ප්රකාශයට පත්කිරීමට සැලසුම් කර ඇති බව වාර්තා වේ.
මෙම සාකච්ඡාවලදී ඒ ඒ පක්ෂවලට ලබාදෙන ඇමති ධූර පිළිබඳව අවසන් තීරණයකට එළඹෙනු ඇතැයි ද දැන ගන්නට ඇත.
මේ වනවිට ඇමැති ධූර 18 දෙනෙකුට ලබා දී ඇති අතර දැනට පවතින සාකච්ඡාවලින් අනතුරුව තවත් 12 දෙනෙකුට ඇමැති තනතුරු ලබා දීමට නියමිතව ඇතැයි වාර්තා වේ.
විපක්ෂ නායක සජිත් ප්රේමදාසගේ නායකත්වයෙන් යුත් සමගි ජනබලවේගයේ මන්ත්රීවරුන් කිහිප දෙනෙකුට ද කැබිනට් ඇමති ධූර හිමිවනු ඇතැයි විශ්වාස කටයුතු ආරංචි මාර්ග සඳහන් කරයි.
සියලු ම ඇමතිවරුන් සඳහා ඇමති වැටුප හා වාහනයක් පමණක් ලබා දීමට හා දීමනා කප්පාදු කිරීමටත් යෝජනාවී ඇති බව ද දැන ගන්නට ඇත.
ආණ්ඩුව පවත්වාගෙන යාමට ජනාධිපතිවරයාට සහය ලබා දෙන පක්ෂවලින් ලැබෙන යෝජනා අනුව ඇමති ධූර ලබා දෙන්නේ කාටදැයි තීරණය කෙරෙනු ඇති බව ද වාර්තා වේ.
