අධිකරණයට අපහාස කිරීමේ චෝදනාව සම්බන්ධයෙන් පිළිතුරු ලබාදීම සඳහා ලබන මාර්තු මස 16 වැනි දින පුද්ගලිකවම අධිකරණය හමුවේ පෙනී සිටින ලෙස ශ්රී ලංකා සංචාරක සංවර්ධන අධිකාරියේ සභාපති කිමාලි ප්රනාන්දු මහත්මියටත්, අධ්යක්ෂ ජනරාල් ධම්මිකා විජේසිංහ මහත්මියටත්, අතිරේක අධ්යක්ෂ ජනරාල් අනෝමා නන්දනී මහත්මියටත් සිතාසි නිකුත් කිරීමට කොළඹ දිසා විනිසුරු අනුර අලුත්ගේ මහතා පසුගිය 02 වැනිදා කටයුතු කළේය.
දිසා විනිසුරුවරයා මෙම නියෝගය නිකුත් කළේ පැමිණිලිකාර ලංකා රියලිටි ලෙෂර් පෞද්ගලික සමාගම විසින් ශ්රී ලංකා සංචාරක අධිකාරියට එරෙහිව අධිකරණය හමුවේ ගොනුකළ පෙත්සම සලකා බැලීමෙන් අනතුරුවය.
මෙම පෙත්සම ගොනුකර තිබුණේ සංචාරක අධිකාරිය මගින් 99 වසරක බදු පදනම යටතේ යාල ප්රදේශයෙන් මෙම සමාගමට ලබාදී තිබූ ඉඩමක් එම ගිවිසුම කඩා වෙනත් පාර්ශ්වයකට පැවරීමට සංචාරක අධිකාරිය ගෙන තිබූ තීන්දුවක් අභියෝගයට ලක්කරමිනි.
එහිදී එම සමාගම සංචාරක අධිකාරියට එරෙහිව අධිකරණ ක්රියාමාර්ගවලට යොමුවීමෙන් පසු එම තීන්දුව අත්හිටුවීමට අධිකරයණ කටයුතු කර තිබියදී එය පසෙකලා අදාළ ඉඩම වෙනත් පාර්ශ්වයකට ලබාදීමට කටයුතු කොට තිබිණි.
ඒ අනුව සංචාරක අධිකාරිය අධිකරණයට අපහාස කළ බවට අධිකරණය හමුවේ පෙත්සමක් ගොනුකිරීමට අදාළ සමාගම පියවර ගෙන තිබිණි.
අදාළ පෙත්සම විභාග කළ දිසා විනිසුරු අනුර අලුත්ගේ මහතා වගඋත්තරකාර චූදිත පෙත්සම්කරුවන් කර ඇති ඉල්ලීම් නිශ්ප්රභ කිරීමටත්, අධිකරණයට අපහාස කිරීම සම්බන්ධයෙන් අධිකරණය නිකුත් කරන ලද සිතාසිය අත්හිටුවීමට කර ඇති නියෝගය ඉවත දැමීමටත්, උක්ත චූදිතයන් තිදෙනා හට චෝදනාවලට පිළිතුරු දීමට ලබන 16 වැනි දින අධිකරණය ඉදිරියේ පුද්ගලිකව පෙනී සිටීමටත් නියෝග නිකුත් කොට ඇත.
