යුගදනවි තාප විදුලි බලාගාරයේ රජයට අයත් සියයට හතලිහක කොටස් නිව් ෆෝට්රස් එනර්ජි නැමැති ඇමෙරිකානු සමාගමකට ලබා දීමට කැබිනට් මණ්ඩලය ගෙන ඇති තීරණය බලරහිත කරන්නැයි ඉල්ලා ගොනු කර ඇති පෙත්සම්වලට පක්ෂව කැබිනට් අමාත්යවරුන් වන විමල් වීරවංශ, වාසුදේව නානායක්කාර සහ උදය ගම්මන්පිල යන මහත්වරුන් දිවුරුම් ප්රකාශ අධිකරණයට ලබා දී ඇති බැවින් අග්රාමාත්ය මහින්ද රාජපක්ෂ මහතා විසින් ඔවුන්ව අනිවාර්යයෙන්ම එම අමාත්ය ධූර වලින් ඉවත් කළ යුතු වුවත් , මෙතෙක් එය සිදු වී නොමැති බව අගරදගුරු මැල්කම් කාදිනල් රංජිත් හිමිපාණන් සහ ධර්මායතනාධිපති පූජ්ය ඇල්ලේ ගුණවංශ හිමියන් වෙනුවෙන් පෙනී සිටි ජනාධිපති නීතීඥ සාලිය පීරිස් මහතා ඊයේ (16) ශ්රේෂ්ඨාධිකරණය හමුවේ කියා සිටියේය.
අදාළ පෙත්සම් ඊයේ ශ්රේෂ්ඨාධිකරණ පංච පුද්ගල විනිසුරු මඩුල්ලක් හමුවේ සලකා බැලූ අවස්ථාවේදී ජනාධිපති නීතීඥවරයා මේ බව කියා සිටියේය.
එහිදී වැඩිදුරටත් විනිසුරු මඩුල්ල හමුවේ කරුණු දක්වමින් කියා සිටියේ කැබිනට් මණ්ඩලයේ සාමූහික වගකීම කඩ කළ සෑම අවස්ථාවකදීම අදාළ අමාත්ය ධූර වලින් ඉවත් කළ බවත්ය.
ඒ අනුව 1947 වසරේදී රජයේ අයවැය විවේචනය කළ අමාත්ය එම්.ඩී.එච්.ජයවර්ධන මහතා අමාත්ය ධූරයෙන් ඉවත් කළ බවත් , දිවංගත හිටපු ජනපති රණසිංහ ප්රේමදාස මහතාගේ ප්රතිපත්ති විවේචනය කළ ලලිත් ඇතුළත්මුදලි , ගාමිණී දිසානායක සහ ජී.එම්.ප්රේමචන්ද්ර ඇමතිවරුන් ඔවුන්ගේ ධූර වලින්ද ඉවත කළ බවට දේශපාලන ඉතිහාසයේ කරුණු ඇති බවද ජනාධිපති නීතීඥ වැඩිදුරටත් පෙන්වා දුන්නේය.
එහෙත් මෙවර යුගදනවි බලාගර කොටස් ඇමෙරිකානු සමාගමකට පැවරී සම්බන්ධව කැබිනට් මණ්ඩලයේ සාමූහික වගකීම කඩ කළ අමාත්යවරු තිදෙනෙකු අධිකරණයට දිවුරුම් ප්රකාශ ලබා දී තිබියදීත් ,ඔවුන්ව මේවනතුරුත් කැබිනට් අමාත්ය ධූර වලින් ඉවත් කර නොමැති බව ද ජනාධිපති නීතීඥ සාලිය පීරිස් මහතා පැවසීය.
අගරදගුරු මැල්කම් කාදිනල් රංජිත් හිමිපාණන් සහ ධර්මායතනාධිපති පූජ්ය ඇල්ලේ ගුණවංශ ,සමගි ජන බලවේගය , වෘත්තීය සමිති ඇතුළු පාර්ශව කිහිපයක් ගොනු කර ඇති මෙම මූලික අයිතිවාසිකම් පෙත්සම් ඊයේ පළමු වරට සලකා බැලීම සදහා අගවිනිසුරු ජයන්ත ජයසූරිය මහතාගේ සභාපතිත්වයෙන් , විනිසුරුවරුන් වන බුවනෙක අලුවිහාරේ, ප්රියන්ත ජයවර්ධන, විජිත් මලල්ගොඩ, එල්. ටී.බී.දෙහිදෙනිය යන මහත්වරුන්ගෙන් සමන්විත පංච පුද්ගල ශ්රේෂ්ඨාධිකරණ විනිසුරු මඩුල්ල හමුවේ කැදවිණි.
