එක්සත් ජාතික පක්ෂයෙන් නෙරපා හරිනු ලැබූ පළාත් පාලන මන්ත්රීවරුන් 12 දෙනෙකු වෙනුවට වෙනත් පිරිසක් නම් කිරීම වළක්වමින් කොළඹ දිසා අධිකරණයෙන් එජාප නායකයාට සහ මහලේකම්වරයාට වාරණ නියෝගයක් නිකුත්කොට තිබේ.
පළාත් පාලන ආයතන කිහිපයක් නියෝජනය කරන මන්ත්රීවරුන් විසින් ඉදිරිපත් කරන ලද පැමිණිලි සලකා බැලීමෙන් අනතුරුව මෙම වාරණ නියෝගය නිකුත් කළේය.
ඊයේ(22)ද තවත් පළාත් පාලන මන්ත්රීවරුන් 19 සම්බන්ධයෙන් ද මෙවැනි තීන්දුවක් ලබාදීමට අධිකරණය කටයුතු කරනු ලැබීය.
ඒ අනුව මේ දක්වා පළාත් පාලන මන්ත්රීවරුන් පනස් දෙකක් සම්බන්ධව මෙලෙස අතුරු තහනම් නියෝග ලබා දෙමින් නොතීසි නිකුත් කොට තිබේ.
එක්සත් ජාතික පක්ෂයේ නායක රනිල් වික්රමසිංහ, එම පක්ෂයේ මහලේකම් පාලිත රංගේබණ්ඩාර, විනය කමිටුවේ ලේකම් සමින්ද ජයසේකර යන අය මෙම පැමිණිල්ලේ වගඋත්තරකරුවන් ලෙස නම් කර ඇති අතර ඉදිරි දින මෙම වගඋත්තරකරුවන්ට අධිකරණය හමුවේ කරුණු දක්වන ලෙසට ද විනිසුරුවරයා නොතීසි නිකුත් කළේය.
පැමිණිල්ල වෙනුවෙන් ජනාධිපති නීතිඥ එෆ්. කාසිම් හා ජනාධිපති නීතීඥ තිසත් විජේගුණවර්ධන යන මහත්වරුන් අධිකරණය හමුවේ පෙනී සිටියහ.
ඉකුත් මැතිවරණවලදී සමගි ජන බලවේගයට සහාය පළ කළේ යැයි චෝදනා කරමින් සිය සේවාදායකයින්ගේ පක්ෂ සාමාජිකත්වය නෙරපීමට එක්සත් ජාතික පක්ෂය කටයුතු කර ඇතැයි පැමිණිලිකරුවන් වෙනුවෙන් පෙනී සිටි ජනාධිපති නීතිඥවරුන් අධිකරණය හමුවේ කරුණු දැක්වීය.
සාමාජිකයින් පක්ෂයෙන් නෙරපීමට පෙර ඔවුන්ට සාධාරණ විනය පරීක්ෂණයක් ලබාදීමට පක්ෂය මේ වන තෙක් ක්රියාකර නොමැති බවත් ඒ අනුව පක්ෂය ස්වභාවික යුක්ති ධර්මය නමැති නීතිමය මූලධර්මය බරපතළ ලෙස උල්ලංඝණය කිරීමක් කර ඇති බව ද ජනාධිපති නීතිඥවරු අධිකරණය හමුවේ පැවසූහ.
