මගෙන් බලාපොරොත්තු වුණේ වෙනස්ම රංගනයක්…
දුක් විඳලා ආපු ගමනක් මේක…
2019 රාජ්ය නාට්ය තරගාවලියේ කෙටි නාට්ය තරගාවලියේ හොඳම කෙටි නාට්ය නිළියට සම්මාන දිනාගත් ඇය අද එකම වේදිකාවේ, එකම රංගන ශිල්පිනිය ලෙසට රඟපාන ‘ආදර ඔංචිල්ලා’ වේදිකා නාට්යයේ අභියෝගාත්මක චරිතයක් නිරූපණය කරමින් ජනකරළියට ඇවිත් තිබෙනවා. ඇය රේබෙකා දිල්රුක්ෂි. දහදිය, කඳුළු වගුරවමින් වේදිකාව වෙනුවෙන්ම කැපවෙන ඇය ගැන කතා නොකළොත් පුංචි අඩුවක් ලෙසට අපි දකිනවා. ඉතින් ඇයගේ දක්ෂතාවයන් ගැන රෙබෙකා සමග කතා කිරීමට අපි මෙවර හිතුවා.
රෙබෙකා ඔබේ රඟපෑම ගැන ගොඩදෙනෙක් අතර කසුකුසුවක් යනවා මේ දවස්වල. ඇත්තටම මොකක්ද මේ විශේෂත්වය?
මම වේදිකාවේ සුවිශේෂී අභියෝගාත්මක චරිතයක් නිරූපණය කළා. එම්. සෆීර් අධ්යක්ෂණය කළ ‘ආදර ඔංචිල්ලා’ වේදිකා නාට්යයේ පැය එකහමාරක් විතර මුළු වේදිකාවෙම මම විතරයි චරිතය නිරූපණය කරන්නේ. ඉතින් ඒ චරිතයේ බැරෑරුම්කම වගේම මගේ රඟපෑම ගැන ගොඩදෙනෙක් අගය කරලා මට සුබපැතුවා.
මෙයට පෙර ‘ආදර ඔංචිල්ලා’ නාට්යයේ නිරූපණය කළේ විදේශීය ජනප්රිය රංගන ශිල්පිනියක් බව ඔබ දැන සිටියාද?
ඔව්… සෆීර්ගේ Swing of Love ඉංග්රීසි නිෂ්පාදනයේ ජුලියා ෆිලිප්පෝ රඟපාලා තිබුණු බව මම දැන සිටියා. එහෙත් ඇය රඟපෑ කිසිම දෙයක් මට නැරැඹීමට ඉඩකඩ සැලැස්සුවේ නැහැ. මොකද ‘ආදර ඔංචිල්ලා’ නිෂ්පාදන කණ්ඩායම මගෙන් බලාපොරොත්තු වුණේ වෙනස්ම රංගනයක් නිසා.
‘නොකියා හිටපු දෙයක්’ වේදිකා නාට්ය තුළින් ඔබේ රංගනයේ තවත් පියවරක් ඉදිරියට තැබුවා නේද?
මම ලංකාවේ හැම නාට්ය උළෙලකටම සම්බන්ධ වෙලා තියෙනවා. නමුත් 2019 වර්ෂයේ තමයි මම ප්රථම වතාවට රාජ්ය නාට්ය උළෙලෙකට තරග කිරීමට ඉදිරිපත් වුණේ. එහිදී නලින් ලුසේනාගේ ‘නොකියා හිටපු දෙයක්’ කෙටි වේදිකා නාට්යයෙන් මගේ රංගනයේ ජයග්රහණය මට හිමි වුණා. එදා මට හොඳම කෙටිනාට්ය නිළිය සම්මානය හිමිකර ගැනීමට වාසනාව ලැබුණා. මම වේදිකාවේ ලබාගත්ත පළමු සම්මානය තමයි ඒ.
ඉතින් එදා ඔබ සම්මානය දෝත දරාගෙන ඉද්දි මොනවගේ හැඟීමක්ද දැනුණේ?
ගොඩාක් සතුටු වුණා. මම ගොඩාක් දුක්විඳලා ආපු ගමනක් තමයි මේ. මම රඟපෑ චරිතය ගැන මට වගේම සියලුම දෙනාට වෙනසක් දැනෙන්නට ඇති.
ඔබ කැමරාවක් ඉදිරියේ රඟපානවට වඩා වේදිකාවේ රඟපෑමට ලොකු ඇල්මක් දක්වන්නේ ඇයි?
ඇත්තටම මම එහෙම ටෙලිනාට්ය ගොඩක රඟපාලා නැහැ. සුවිශේෂී ටෙලිනාට්ය කිහිපයකම චරිත නිරූපණය කළා. නමුත් වේදිකාවේ කණ්ඩායමක් සමග එකතු වෙලා සජීවීව ලබන අත්දැකීමට මම ගොඩාක් කැමැතියි. වේදිකාවේ සහ කැමරාවක් ඉදිරිපිට රඟපාන චරිතවල වෙනස මට හොඳට තේරුම් ගන්න පුළුවන්. මේ මාධ්ය දෙකේම රඟපෑම පහසු කටයුත්තක් නෙවේ කියලා මම දන්නවා.
වේදිකා ශිල්පීන් ගැන වැඩි අවධානයක් යොමු නොවන කාලයක් නේද මේ?
වේදිකාවේ රඟපාන ශිල්පීන් පිළිගැනීමේ අඩුවක් නැහැ. නමුත් මාධ්ය තුළින් ඔවුන්ගේ දක්ෂතාව හරියට කතා නොකරන අඩුවක් තිබෙනවා. ප්රේක්ෂකයන් අතරට මේ ශිල්පිීන්ගේ වටිනාකම එළියට නොයන්නේ ඒ හේතුව නිසයි. නමුත් ක්ෂේත්රයේ අපි, අපි අතර හොඳ පිළිගැනීමක් තිබෙනවා.
ඉදිරියේදී රෙබෙකා අප අතරට එන ටෙලිනාට්ය, චිත්රපට එහෙම තියෙනවද?
සංජීව පුෂ්පකුමාරගේ ආරම්මන, සුදර්ශන බණ්ඩාරගේ ටෙලි පේස්, සුපුන් රත්නායකගේ මෙට්ට්රෝ සිහින නිර්මාණවල සුවිශේෂී චරිත මම නිරූපණය කරනවා.
–වසන්ත විතාරණගේ
