ගෘහ ආර්ථිකය හා පෝෂණය වැඩිදියුණු කර පවුල් ඒකක සවිබල ගැන්වීමේ ජාතික වැඩසටහන සමෘද්ධි, ගෘහආර්ථික, ක්ෂුද්ර මූල්ය, ස්වයං රැකියා, ව්යාපාර සංවර්ධන හා ඌන උපයෝජන අමාත්යංශයේ මූලිකත්වයෙන් දිසාපතිවරුන්ගේ මෙහෙයවීම යටතේ ළඟදීම ක්රියාවට නංවන බව ආර්ථික පුනර්ජීවන හා දරිද්රතාවය තුරන් කිරීම සඳහා වන ජනාධිපති කාර්ය සාධක බළකායේ සභාපති බැසිල් රාජපක්ෂ සදහන් කළේය.
එම වැඩසටහනට අදාළව දිස්ත්රික් ලේකම්වරුන්ගේ සහ ප්රාදේශිය ලේකම්වරුන්ගේ සහාය ඇතිව ප්රතිලාභීන් තෝරාගැනීම කඩිනමින් අවසන් කරන බවද ඒ මහතා පැවසීය.
අද (23) අරලියගහ මන්දිරයේ පැවති ගෘහ ආර්ථිකය හා පෝෂණය වැඩිදියුණු කර පවුල් ඒකක සවිබල ගැන්වීමේ ජාතික වැඩසටහනේ වර්තමාන ප්රගතිය සොයාබැලීමේ සාකච්ඡාවට එක්වෙමින් ඒ මහතා මේ බව පැවසුවේය.
මෙම වැඩසටහන යටතේ ගෙවතු වගාව මෙන්ම සත්ව පාලනය, ජලජ ජීවී වගාව යන ක්ෂේත්ර ඔස්සේ ද ගෘහස්ථ ආර්ථිකය නඟාසිටුවීමට පියවර ගැනේ. මෙම ක්ෂේත්ර සම්බන්ධයෙන් ප්රතිලාභින් සඳහා තාක්ෂණික උපදෙස් ලබාදීමද මේ හා සමගාමීව සිදු කිරීමට යෝජිතය.
ජනතාවගේ ජීවන වියදම පාලනය කරගැනීමට මෙම ජාතික වැඩපිළිවෙළ උපකාරි වන බවද බැසිල් රාජපක්ෂ මහතා මෙහිදී පෙන්වා දුන්නේය.
ආහාර සුරක්ෂිතතාවය සහතික කිරීම සඳහා ආහාර අවශ්යතා සපුරා ගැනීමත්, කෘෂි නිෂ්පාදනවලට එකතුවෙන අතරමැදි පිරිවැය හේතුවෙන් මිල ඉහළයාම පාලනය කිරීමත්, ජනතාවගේ පරිභෝජන අවශ්යතා තෘප්තිමත් කිරීම සහ ආහාර ස්වයංපෝෂිතතාවය ඇති කිරීමත් මෙම ජාතික වැඩසටහනේ මූලික අරමුණ වේ.
ඒ අනුව කෘෂිකර්ම දෙපාර්තමේන්තුව, ගොවිජන සංවර්ධන දෙපාර්තමේන්තුව, සමෘද්ධි සංවර්ධන දෙපාර්තමේන්තුව, ආයුර්වේද දෙපාර්තමේන්තුව, පොල් සංවර්ධන මණ්ඩලය, සත්ත්ව නිෂ්පාදන සහ සෞඛ්ය දෙපාර්තමේන්තුව ඇතුළු රජයේ ආයතන රැසක් එක්ව දිස්ත්රික්ක 25 ආවරණය වන පරිදි මෙම ජාතික වැඩසටහන ක්රියාත්මක කරනු ලැබේ.
මෙම සාකච්ඡාව සඳහා සමෘද්ධි , ගෘහආර්ථික ,ක්ෂුද්ර මූල්ය, ස්වයං රැකියා ,ව්යාපාර සංවර්ධන හා ඌන උපයෝජන රාජ්ය අමාත්යංශයේ ලේකම් එච්.කේ.ඩී.ඩබ්.එම්.එන්. හපුහින්න මහතා ඇතුළු රජයේ නිලධාරින් පිරිසක් සහභාගී වූහ.
