පරිසරය, සංස්කෘතිය හා සිංහල දෙමළ අලුත් අවුරුද්ද කියන්නේ ගහට පොත්ත වගේ බැඳිලා තියෙන දෙයක්. සිංහල දෙමළ අලුත් අවුරුද්ද බැඳිලා තියෙන්නේ පාරිසරික සාධක එක්ක. ඒක චිරාත් කාලයක් තිස්සේ පැවැතගෙන එන දෙයක්. ලෝකයේ විවිධ රටවල විවිධාකාර සංස්කෘතික උත්සව අටෝරාශියක් තිබුණත්, පරිසරය හා බැඳුණු සාධක එක්ක අතීතයේ ඉඳන් වර්තමානය වන තෙක් මේ මහා සංස්කෘතික උත්සවය පැවැතීගෙන එනවා. ඒක තමයි සිංහල හින්දු අලුත් අවුරුද්ද.Sri Lanka Latest News
ගොවිතැන ජීවිකාව කරගත්ත අපේ පුරාතන ගොවි ජනතාව තමන්ගේ අස්වැන්න නෙළාගෙන, අටුකොටු පුරවාගෙන, බත බුලතින් සරු කරගෙන, සූර්යයා මුල් කරගෙන උත්සවශ්රීයෙන් සමරන සංස්කෘතික උත්සවය මෙරට ජන ජීවිතය හා ඇලීගැලී පවතින්නක්. වර්තමානය වනවිට එකී සංස්කෘතික උත්සවය විවිධ වෙනස්කම්වලට භාජනය වෙමින් තිබුණත් එහි මූලික හර පද්ධතිය තවමත් නොනැසී පැවතීම අගය කළ යුතු දෙයක්. සමහර සංස්කෘතික විරෝධීන් එක එක උප්පරවැට්ටි දැම්මත් ඒ මහා සංස්කෘතිය බිඳදැමීම ලේසි පහසු කාර්යයක් නොවෙයි.
කුටුම්භයට මුල් තැන දෙමින් ආරම්භ වෙන ඒ මහා සංස්කෘතික මංගල්යය මුළු රටම එකම වෙලාවකට එහෙම නැත්නම් එකම නැකතකට වැඩකිරීම අපේ රටේ හැර ලෝකයේ වෙන කොහේවත් නැති චාරිත්රයක්. සූර්යයා මීන රාශියෙන් මේෂ රාශියට ගමන් කිරීම නිමිති කොටගෙන ආරම්භ වන මෙකී උළෙලට විවිධ චාරිත්ර වාරිත්ර, ජන ක්රීඩා, ජන ගායනා හා ආචාර සමාචාරවලට මුල් තැන දෙමින් ආරම්භ වන උත්සවයක් කිව්වොත් එය නිවැරදියි.
සිංහල දෙමළ අලුත් අවුරුද්ද උදාවන සමය වනවිට පරිසරයේ විවිධ වෙනස්කම් රාශියක් සිදුවෙමින් පවතිනවා. ගහකොළ මලින් පලින් බරවී මුළු පරිසර පද්ධතියම නැවුම් බවක් හා සුන්දර බවකින් හැඩගැන්වෙනවා. එකී සුන්දරත්වය එක්ක පරිසරය හා සතා සීපාවන්ට මුල් තැන දීම මෙකී සංස්කෘතික උත්සවයේ ඉතා ප්රශංසනීය කටයුත්තක්. විශේෂයෙන්ම ගව මහීෂාදීන් වෙනුවෙන් හින්දු චාරිත්රානුකූලව සිදුවන වතාවත් හා වත්පිළිවෙත් අදටත් නොනැසී පැවතීම ඉතා අගය කළ යුතු දෙයක්.
අපේ රටේ බහුතරයක් වූ පොදු ජනතාව අප්රේල් මාසය මුලදී තම ගම් නියම්ගම් බලා යාමට කටයුතු කරන අතර, ප්රධාන නගර සියල්ලක්ම පාහේ ඉතා පාළු ස්වභාවයක් ගැනීම විශේෂයි. සැබෑ අවුරුදු සිරිය සැමරීම තවමත් අපේ රටේ ඈත ගම් නියම්ගම්වල චාරිත්රානුකූලව සිදුවෙනවා. කවුරු කොහොම මොන විදිහට අපහාස උපහාස කළත් මේ පින්බිමේ මේ මහා සංස්කෘතියට අභියෝග කිරීමට තවමත් කිසිවකුත් සමත් වී නැහැ. එය චිරාත් කාලයක් එසේම පවතිනු ඇති. සියලු ශ්රී ලාංකිකයන් මෙම මහා සංස්කෘතියේ කොටස්කරුවන්.
මෙකී කාලසීමාව තුළදී අපේ රටේ සංචාරක ප්රජාව පාරිසරික වටිනාකමකින් යුත් ප්රදේශවල පරිසරය විඳීම සඳහා රටේ විවිධ ප්රදේශවලට සංචාරය කිරීම දකින්නට පුළුවන්. එහි කිසිම වැරැද්දක් නැහැ. හැබැයි ශෝචනීය කරුණ වන්නේ එකී සංචාරකයන් විසින් අදාළ පාරිසරික පද්ධති කැළිකසළ දමා විනාශ කිරීමයි. කැලෑ කොලමේ අපි ඉතා කාරුණිකව ඉල්ලා සිටින්නේ, ඔබ සංචාරය කරන්න, නමුත් පරිසරය විනාශ නොකර නැවත පැමිණෙන ලෙසයි.
පරිසරයට මුල්තැන දෙමින් මේ මහා සංස්කෘතික මංගල්යය චාරිත්රානුකූල වත්පිළිවෙත්වලට අනුව සැමරූ සියලු ශ්රී ලාංකිකයන්ට සුබම සුබ අලුත් අවුරුද්දක් වේවායි කැලෑ කොලමේ අපි ඉතසිතින් ප්රාර්ථනා කරමු.
සමන් හල්ලොලුව
