අපේ රටේ ඉන්න මිනිසුන්ගෙන් ඉතා සුළු පිරිසක් තමයි ගහකොළ, සතා සිවුපාවුන්ට, පරිසරය රැකගැනීමට සක්රීය දායකත්වයක් දක්වන්නේ. බහුතරයක් ඉන්නේ ඒවා විනාශ කරන්න සැදීපැහැදී ඉන්න අය. කිසිම පුද්ගලික ලාභ ප්රයෝජනයක් නැතුව ඉතා අමාරුවෙන් රැකගැනීමට වෙහෙස දරන මේ පරිසර පද්ධතිය අකාලයේ විනාශ කරන්න මොකක් හෝ අලකලංචියක් කරන්න බලාගෙන ඉන්න පාරිසරික ත්රස්තවාදීන් පිරිසක් ගැන කැලෑ කොලමේ අපට තොරතුරක් ලැබුණා.Sri Lanka Latest News
දියගම තෙත් බිම් වනාන්තර පද්ධතිය ගිනිතබා විනාශ කිරීමේ නිර්ලජ්ජිත උත්සාහයක් පසුගියදා වාර්තා වුණා. පරිසර ක්රියාකාරීන් කීපදෙනකු හා යුද හමුදා නිලධාරීන්, සෙබළුන් හා අනෙකුත් අයගේ උපරිම උත්සාහයෙන් සිදුවන්නට ගිය මේ මහා විනාශය යම් පමණකින් හෝ වළක්වා ගැනීමට එම පිරිසට හැකි වුණා. මිනිස්සු පරිසරයට මෙතරම් වෛර කරන්නේ ඇයි? පරිසරය රැකගන්නට උත්සාහ කරන තරුණ කණ්ඩායමකට සහයෝගය නොදී විවිධ අඩන්තේට්ටම් කරන්නේ ඇයි? මෙකී සිද්ධිය ගැන අදහස් දක්වන්නට ‘ග්රීන් ජැකට්’ සංවිධානයේ ප්රකාශකයකු හා සාමාජිකයකු අප හා සම්බන්ධ වුණා. මේ ඔහු කියන සිද්ධියේ ඇතුළාන්තයයි. අපි දැන් ඔහුගේ කතාවට ඇහුන්කම් දෙමු.
අහිංසක සතුන් දහස් ගණනකගේ නිවහන වූ දියගම වැසි වනාන්තර පද්ධතියට ගිනිදැල් ඇවිළුවේ කවුද?
පසුගිය දිනක දහවල් කාලයේ දියගම වනාන්තරයේ හල්වක්කඩ පාර ප්රදේශය කිසියම් අයෙකු හෝ කණ්ඩායමක් විසින් ගිනි තබා විනාශ කර තිබිණි. පසුව දහවල් දෙකට පමණ අපිට ලද තොරතුරු අනුව දියගම ක්රීඩා සංකීර්ණ අධ්යක්ෂ ජනරාල්තුමාව දැනුවත් කිරීමෙන් පස්සේ යුද හමුදා නිලධාරීන් හා පරිසරහිතකාමීන් කීපදෙනෙක් එකතු වී ගින්න නිවා දැමීමටත් ගින්න වනාන්තරයේ අනෙක් ප්රදේශවලට පැතිරීම වළක්වා ගැනීමටත් අපි උපරිම උත්සාහයක් ගත්තා. මේ සඳහා යුද හමුදා නිලධාරීන් යොදවපු ක්රීඩා සංකීර්ණ අධ්යක්ෂ ජනරාල්තුමාටත් ස්තුතිය හා සහභාගි වූ අනෙකුත් පොදු මහජනතාවටත් අපි ස්තුතිය පළ කරනවා.
මෙම ගින්න හේතුවෙන් දියගම වනාන්තරයේ සමනලුන් බහුල ප්රදේශයේ කොටසක් විනාශ වී ඇති අතර, ලංකාවේ වඳවී යාමේ තර්ජනයට ලක්වී ඇති තලන් වැනි ශාකවල පැළ විශාල ප්රමාණයක් ගිනිගෙන අළු වී තිබෙන බව අපිට දැකගැනීමට හැකි විය. එමෙන්ම මෙම ප්රදේශයේ සමනල විශේෂවල කෝෂ හා උභයජීවී විශේෂවල බිත්තර මෙන්ම කුරුලු කැදලි බොහෝමයකට ගින්න නිසා අනිවාර්යයෙන්ම බලපෑමක් ඇති වී තිබීම නොඅනුමානයි.
මීට අමතරව තවදුරටත් මෙහි ජෛව විවිධත්වයට හානි සිදුවෙමින් පවතී. දුර්ලභ රත් උණහපුළුවා ඇතුළු වන සතුන් 200කට අධික සංඛ්යාවක් හා ශාක විශේෂ 130කට අධික ජෛව විවිධත්වයක් පවතින මෙම වටිනා වනාන්තර ප්රදේශය අනාගත දරු පරම්පරාව උදෙසා රැකගැනීමට අපි කටයුතු කළ යුතු නොවන්නේද? මෙම වනාන්තරයේ හල්වක්කඩ පාර අසල මීට දින කිහිපයකට පෙරද ගිනිතබා තිබූ අතර එය වනාන්තරය තුළට පැතිරී නොතිබිණි. නමුත් දෙවැනි වරට සිදුවූ මෙම ගිනිතැබීම හිතාමතා සිදුකළ එකක්ද යන්නත් ගැන අපට සැක මතුවී තිබේ.
උණහපුළු පැටවුන් බඩේ දරාගත් අහිංසක අම්මලා ඇතුළු සතුන් දහස් ගණනකගේ නිවහන වන මෙම වැසි වනාන්තරය ආරක්ෂා කරගැනීමට කටයුතු කරනවා විනා එය ගිනිතබා විනාශ කිරීම මහා අපරාධයක් බව අපගේ හැඟීමයි. එය මහා පාපයක් බවද නොකියාම බැරිය. එමෙන්ම දියගම වනාන්තරය තුළට මේ වනවිට අනවසර ඇතුළුවීම් සිදුවන අතර ඇතැම් ප්රදේශවල අඩි පාරවල් විශාල වී පවතින බවද නිරීක්ෂණය වී ඇත. එබැවින් දියගම වනාන්තරයට අනවසරයෙන් සිදුවන ඇතුළුවීම් නතර කර දැමීමට වනාන්තරය වටා ආරක්ෂිත වැටවල් ඉදිකිරීම හෝ සැලසුම්සහගත ආරක්ෂක ක්රියාමාර්ගයක් ඉදිරි කාලය තුළදී නොගත්තොත් වනාන්තරයේ ජෛව විවිධත්වය සුරැකීමට අප හා බලධාරීන් ගන්නා උත්සාහය ගඟට කැපූ ඉනි බවට පත්වීම නොවැළැක්විය හැකිය.
තත්ත්වය එසේ හෙයින් ඉදිරි කෙටි කාලය තුළදී දියගම වැසි වනාන්තර පද්ධතිය නිසි කළමනාකරණයකින් යුතුව රැකගැනීමට බලධාරීන්ගේ හා නිලධාරීන්ගේ ඇස් මේ වෙත යොමුවේවායි අපි ඉල්ලා සිටින අතර, ඒ සඳහා අවශ්ය වන ඕනෑම සහයෝගයක් ලබාදීමට අප සංවිධානයේ සාමාජිකයන් හා ප්රදේශයේ පරිසරහිතකාමී ජනතාව සැදීපැහැදී සිටින බවද සඳහන් කළ යුතුය.
සමන් හල්ලොලුව
