දකුණු කොරියාවේ රැකියා සඳහා සුදුසුකම් ලබා වසර දෙකක් තිස්සේ පොරොත්තු ලේඛනයේ රැඳී සිටින තරුණ තරුණියන් දහස් ගණනකගේ බලාපොරොත්තු සුන්වීමේ අවදානමක් මතුව තිබේ.Sri Lanka Latest News
2023 වසරේ පැවැති කොරියානු භාෂා ප්රවීණතා විභාගය ඇතුළු සියලු පරීක්ෂණ සමත්වූ අයැදුම්කරුවන් රැකියා ගිවිසුම් (Job Agreements) නොලැබීම හේතුවෙන් මෙලෙස අර්බුදයකට ලක්ව සිටිති.
ශ්රී ලංකා විදේශ සේවා නියුක්ති කාර්යාංශයේ ලියාපදිංචි වී වසර දෙකක් ඇතුළත රැකියා ගිවිසුමක් නොලැබුණහොත්, කොරියානු මානව සම්පත් දෙපාර්තමේන්තුවේ (HRD) නිල වෙබ් අඩවියෙන් අදාළ අයැදුම්කරුගේ නම ස්වයංක්රීයව ඉවත් වේ. මේ වන විට දිනකට මෙලෙස නම් 4ක් 5ක් ඉවත් වෙමින් පවතින අතර, මෙම වසර අවසන් වන විට 3,000ක පමණ පිරිසකට සිය අවස්ථාව අහිමි වනු ඇතැයි ගණන් බලා තිබේ.
අගතියට පත් තරුණ තරුණියන් නගන ප්රධාන චෝදනා කිහිපයකි:
– වයස් සීමාව ඉක්මවා යාම: වයස අවුරුදු 37-38 දී විභාගය සමත් වූවන් වසර දෙකක් ප්රමාද වීම නිසා දැන් උපරිම වයස් සීමාව වන 39 ඉක්මවා ගොස් ඇති බැවින් ඔවුන්ට නැවත විභාගයට පෙනී සිටීමට ද නොහැකි වී ඇත.
– අධික වියදම: පෞද්ගලික රෝහල්වලින් දෙවතාවක් වෛද්ය පරීක්ෂණ සිදු කිරීමටත්, භාෂා පන්ති සහ විභාග ගාස්තු සඳහාත් විශාල මුදලක් වැය කර ඇතත් ප්රතිඵලයක් ලැබී නැත.
– ෆයිල් මාරු කිරීමේ සැකය: තමන්ගේ දත්ත වෙනුවට වෙනත් පිරිසක් ඉදිරිපත් කරන්නේද යන්න පිළිබඳව අයැදුම්කරුවන් සාධාරණ සැකයක් පළ කරයි.
– රජයේ ප්රමාදය: මෙම ප්රශ්නය සාකච්ඡා කිරීමට බලධාරීන් කොරියාවට යන බව පැවසුවද එය තවමත් ඉටු වී නොමැති බව ඔවුහු පවසති.
විදේශ සේවා නියුක්ති කාර්යාංශය සඳහන් කර ඇත්තේ කොරියානු රජය සමඟ සාකච්ඡා කර මෙම පොරොත්තු කාලය දීර්ඝ කර ගැනීමට උත්සාහ කරන බවයි. කෙසේ වෙතත්, නවකයන් සඳහා නැවත විභාග පවත්වා වෙබ් අඩවිය යාවත්කාලීන කිරීම නිසා පැරණි අයැදුම්කරුවන් තවදුරටත් අතහැර දැමීමේ අවදානමක් පවතින බව විචාරකයෝ පෙන්වා දෙති.
