රවුම් ජීවිතවල හතරැස් කතාව නරඹන ප්රේක්ෂකයන්ට නම් මිහිරි කියන්නේ අලුත් කෙනෙක් නෙවෙයි. දක්ෂ රංගන ශිල්පිනියක් වගේම නිරූපණ ක්ෂේත්රයේ කටයුතු කරන සුලෝචනා හැරපත්දෙණිය මේ දිනවල සිරස ටීවී හරහා විකාශනය වන ‘කොටු’ ටෙලිනාට්යය තුළ ප්රේක්ෂකයන් අතර ජනප්රියත්වයට පත්වූ රංගන ශිල්පිනියක්. ඉතින් අද ‘මව්රට’ ‘හාට්’ අපේ කතාබහ ඇය සමගයි.Sri Lanka Latest News
ඉතින් සුලෝචනා කොහොමද මේ දවස්වල?
මේ දවස්වල ‘කොටු’ ටෙලිඩ්රාමා එකේ වැඩ කටයුතු එක්ක තමයි ඉන්නේ. ඊට අමතරව වෙළෙඳ දැන්වීම්වලට සහභාගි වෙනවා. ඒ වගේම නිරූපණ ක්ෂේත්රයේ වැඩ ටිකත් කරගෙන යනවා.
මේ දවස්වල කොටු පනින අයට උදව් කරනවා වගේ?
මිහිරි තමයි උදව් කරන්නේ. ඇත්තටම ඒක මෙහෙමයි වෙන්නේ. උදව්වක් නෙවෙයි ඒක. සුසිල් කියන්නේ මිහිරිට හිතවත් කෙනෙක්. සුසිල්ගේ හොරයක් තියෙනවා කියලා මිහිරි දන්නවා. හැබැයි ඒ කාත් එක්කද කියලා දන්නේ නෑ. මිහිරිගේ හස්බන්ඩ් රට ඉන්න නිසා සුසිල් එක්ක තමයි ගමන් බිමන් යන්නේ ඒ වාහනේ තමයි පාවිච්චි කරන්නේ. ඒ නිසා සුසිල් හොඳින් තියාගන්න ඕනෙ නිසා සුසිල්ගේ හොර වැඩ ගැන දැනගත්තත් ඒක ප්රශ්නයක් කරගන්නේ නැතුව සුසිල් ආශ්රය කරනවා.
මිහිරිගේ චරිතය ගැනත් කතා කළොත්?
මිහිරි කියන්නේ පවුල් බරක් නැති විවාහක කාන්තාවක්. එයාට දරුවෝ නෑ. එයාගේ සැමියා රට ඉන්නේ. සරලව නිදහසේ ඉන්න කෙනෙක් මිහිරි කියන්නේ.
මිහිරිගේ චරිතයට ලැබෙන ප්රේක්ෂක ප්රතිචාර කොහොමද?
ඇත්තටම හොඳ ප්රතිචාර තියනවා. මම මීට කලින් ටෙලිනාට්යයක ප්රේක්ෂකයන්ට මතක හිටින චරිතයක් විදිහට කළේ ‘හියුමන් එරර්ස්’ එකේ දේවි කියන චරිතය. ඊට අවුරුදු තුනකට පස්සේ තමයි කොටු ටෙලිනාට්යයට එක්ක එකතු වෙන්නේ.
සුලෝ රංගන ක්ෂේත්රයට එන්නේ ටිකක් පමා වෙලා නේද?
ඔව්. ඇත්තටම මට රංගනයට මුලින්ම ලැබුණු අවස්ථා තියෙනවා. හැබැයි ඒ කාලේ මට ඒ ගැන දැනුමක් නැති නිසා මම රංගනයට යොමුවෙන්නේ නෑ. රංගනය කියන දේ ගැන පොඩි හරි හැදෑරීමකින් පස්සේ මම රංගනයට යොමුවෙන්න ඕනෙ කියන අදහසකින් මම හිටියේ. ඒකත් එක්ක මම 2022දී තමයි රංගනය ගැන හදාරන්න පටන් ගත්තේ. මාධවී මල්වත්තගේ සහ තිළිණි වීරසිංහ කියන ගුරුවරුන් යටතේ. ඊට පස්සේ මම ටෙලිනාට්ය, චිත්රපට, වෙළෙඳ දැන්වීම් කරන්න පටන් ගත්තා. වැඩකරන අතරතුර මට නැවත අවුරුදු එකහමාරක විතර පොඩි විවේකයක් ගන්න සිද්ධ වෙනවා. මම නැවත අසංක සායක්කාරගේ වැඩමුළුවක් හරහා තමයි මට ‘කොටු’ ටෙලි නාට්යයට සම්බන්ධ වෙන්න අවස්ථාව ලැබෙන්නේ.
සුලෝචනා කියන්නේ රංගන ශිල්පිනියක් වගේම නිරූපණ ශිල්පිනියක්?
ඔව්. මම කොහොමත් මනාලියක් විදිහට නිරූපණය කරන එක 2014 ඉඳලා වගේ කළා. ඊට පස්සේ ෆුල් ටයිම් මම නිරූපණය කරන්න ගත්තේ 2019 අන්තිම කාලේ වගේ ඉඳලා. නිරූපණ ක්ෂේත්රය තමයි මම කලාවට අමතරව කරන රැකියාව. තවමත් මට ඉඩ ලැබෙන විදිහට හොඳ අවස්ථාවන්වලට අනුව නිරූපණ ක්ෂේත්රයේ නිරත වෙනවා.
නිරූපණය ක්ෂේත්රයට එන්නෙත් රංගන ශිල්පිනියක් වීමේ බලාපොරොත්තුවෙන්මද?
පුංචි කාලේ ඉඳලම නිළියක් වෙන්න ආසාව තිබුණා. හැබැයි මම පොඩි කාලේ ලස්සන පෙනුමක් තිබුණු කෙනෙක් නෙවෙයි. අනිත් අයට වඩා උසයි. කෙට්ටුයි. කොන්ඩේ කොටට කපලා හිටියේ. එතකොට ඒවත් එක්ක ඉස්කෝලේ කාලෙවත් මට ලොකුවට අවස්ථාවක් ලැබිලා නෑ. මම නිරූපණ ක්ෂේත්රයට එන්නෙත් අහම්බයකින්. රංගනයට එන්නෙත් අහම්බයකින්. හැබැයි පොඩි කාලේ ඉඳලම මගේ හීනයක් වුණේ රංගන ක්ෂේත්රයට එන්න.
අද වෙනකොට ඔබ මවක්. ඉතින් දරුවා නිසා රඟපෑම් සීමා කරලද තියෙන්නේ?
දරුවා නිසා රඟපෑම් සීමාකරලා නෑ. හැබැයි රංගනයේ සමහර දේවලට මම සීමා පනවාගෙන තියෙනවා. මොකද මගේ පවුල කියන දේ අංක එක. පවුලට මුල් තැන දීලා නිළියක් වෙන්න ආසයි. ඒ ගමන යන්න ආසයි. අපිට මොන දේ ලැබුණත් නොලැබුණත් පවුල කියන එක අපිත් එක්ක හැමදාම ඉන්නවා. ඉතින් ඒ නිසා මම මට දාගත්ත සීමා ටිකක් තියෙනවා. මම ඒ ඇතුළෙම තමයි වැඩ කරන්නේ.
ඒ කියන්නේ ඔබ නිර්මාණ තෝරා බේරා ගැනීමක් කරනවා?
ඔව්. ටෙලිනාට්යයක් වගේ දේකදි මම ඒ ගැන ලොකුවට තෝරා බේරාගැනීම් කරන්නේ නෑ. චිත්රපටයකදී මම ඒ ගැන හිතනවා. අඩනිරුවත් දර්ශනය එහෙම තියෙනවා නම් දැන් මම ඒවා භාරගන්න එක ගැන හිතනවා.
සුලෝචනා ළඟදිම සිනමාව තුළ අපිට දකින්න ලැබෙයිද?
ඔව්. ටෙලි නාට්යවලට වඩා මම කැමැති සිනමාවට. මම කලින් කළා ‘මාගම් සෝලි’ කියලා චිත්රපටයක්. මේ චිත්රපටය බොහෝ දුරට මේ අවුරුද්දේ තිරගත වෙයි. ඊට පස්සේ මම ‘යකඩ මනමාලි’ කියලා චිත්රපටයක් කරනවා. ඒකෙත් හඬකැවීම් කරලා ඉවරයි. නමුත් ඒක තිරගත වෙන කාලයක් හරියටම කියන්න දන්නේ නෑ. ඉදිරියේදී තව නිර්මාණයකට දායක වෙන්න බලාපොරොත්තුවක් තියෙනවා. ඒකේ සියලු කටයුතු මේ වෙනකොටත් සූදානම්. ඉදිරියට ඒ ගැනත් ප්රේක්ෂකයන්ට දැනගන්න ලැබෙයි.
කෞෂල්යා ලක්මිණි
