‘ආණ්ඩු බලය විතරක් මදි රාජ්ය බලයත් ලබාගන්න ඕනේ’ කියල ලාල්කාන්ත කිව්වනේ. බොහෝ දෙනෙක් දන්නේ නැහැ ආණ්ඩු බලයයි රාජ්ය බලයයි අතර වෙනස.
මැතිවරණයකින් ලැබෙන්නේ ආණ්ඩු බලය. රාජ්ය බලය ලැබෙන්නේ නැහැ. රාජ්යය ආණ්ඩුවට බොහෝ විට යටත්. ඒ නිසා ආණ්ඩුව ආණ්ඩු කිරීමට රාජ්යය තිබෙන ආකාරයෙන්ම යොදාගන්නවා.Sri Lanka Latest News
මොකක්ද රාජ්යය කියන්නේ?
ආරක්ෂක හමුදා සහ අවි ආයුධ, පොලිසිය, නිලධාරී පැලැන්තිය, අධිකරණය සහ නීති, හිරගෙවල්.
ලාල්කාන්තට විතරක් නෙවෙයි ටිල්වින් ඇතුළු ජවිපෙට දැන් අවශ්ය වෙලා තියෙන්නේ ඔය රාජ්ය බලය තමන් අතට ගන්න. ප්රජාතන්ත්රවාදී රටවල නම් රාජ්ය බලය ගන්න පාලකයන් දඟලන්නේ නැහැ. එහෙම කරන්නේ කොමියුනිස්ට් පාලකයන්, ඒකාධිපති පාලකයන් සහ අන්තවාදී ඉස්ලාම් පාලකයන්.
චීනයේ, කියුබාවේ, ලාඕසයේ, වියට්නාමයේ, උතුරු කොරියාවේ, ඇෆ්ගනිස්ථානයේ, ඉරානයේ, ඊශ්රායලයේ හැර අනෙකුත් සියලු මැදපෙරදිග රටවල, මියන්මාරය ආදී හමුදා පාලනය තිබෙන රටවල රාජ්යය සහ ආණ්ඩුව දෙකක් නෙවෙයි එකක්.
කොමියුනිස්ට් සහ ඉස්ලාම් රාජ්යයන් නම් තමන්ගේම නීති හදාගෙන තමන්ගේම පොලිසියක් සහ හමුදා හදාගන්නවා. ඒවාට පත්කරන්නේ තමන්ගේ පාක්ෂිකයන්. ඒකාධිපති රාජ්යයන්වල වෙන්නේ ආරක්ෂක හමුදා නායකයන් පාලකයන් බවට තමන්ම පත්කර ගැනීමයි.
ඔය කවුරුත්, තියෙන ආණ්ඩුක්රම ව්යවස්ථාව අහෝසි කරනවා තමන්ට ඕනෙ ව්යවස්ථාවක් සම්මත කරනවා. සමහර විට කීපදෙනකුගේ ජුන්ටා පාලනයක් හදාගෙන ජුන්ටාව නිකුත් කරන නියෝග නීති බවට පත්වෙනවා. එහෙම නැත්තම් එක්කෙනෙක් කරන නියෝග නීති බවට පත්කරගන්නවා. රජ කාලෙත් එහෙමනේ. රජ්ජුරුවෝ කිව්වොත් මූව උලතියලා මරපිය කියලා වධකයා ඒ අසරණයව උල උඩින් වාඩි කරලා මැරෙන්න අරිනවා.
ඉතින් රාජ්ය බලය තමන්ගේම කරගන්න නම් රජයේ තනතුරුවලට, අධිකරණයේ තනතුරුවලට තම පාක්ෂිකයන් පත්කරගත යුතු වෙනවා.
පහුගිය දවස්වල ඉරානයේ පෙළපාළිකරුවන්ට තදින්ම දඬුවම් කරනවා කියල කිව්ව එක්කෙනෙක් එහෙ අග්රවිනිශ්චයකාරයා. පෙළපාළි ගිය 1000ක් විතර ප්රසිද්ධියේ එල්ලා මරන්නයි ඉරාන පාලකයන් ලෑස්ති වෙලා හිටියේ. ඒක කළොත් ගහනවා කියලා ට්රම්ප් පණිවුඩයක් යැව්වම තමයි එල්ලා මරණ එක නැවැත්තුවේ.
ටිල්වින්ලට රාජ්යය තමන් අතට ගන්න නම් ඔය රාජ්ය ආයතනවල ප්රධාන තනතුරුවලට පළමුවෙන්ම තම පාක්ෂිකයන් පත්කරන්න වෙනවා. විගණකාධිපති තනතුරට තමන්ට ඕනෙ කෙනෙක් පත්කරගන්න ආණ්ඩුව මේ තරම් දඟලන්නේ ඇයි කියල හිතාගන්න පුළුවන් නේද? නීතිපති පන්නන්න ජවිපෙ ලියන අප්පුල ලවා ටිල්වින්ලා මතවාදයක් ගොඩනගාගෙන යන්නේ මොකද කියලත් හිතාගන්න පුළුවන් නේද?
රාජ්යය තමන්ගේ රූකඩයක් කරගන්න වැඩේ හිමින් තමයි ටිල්වින්ලට කරන්න වෙලා තියෙන්නේ. හේතුව අපේ රටේ තිබෙන ආර්ථික අර්බුදය. රාජ්යය වේගයෙන් ජවිපෙ කරන්න ගියොත් අයි.එම්.එෆ්., ලෝක බැංකුව, ආසියානු සංවර්ධන බැංකුව ලංකාවට ආධාර සහ ණය දීම නවත්වනවා. ඇමෙරිකාව, යුරෝපය, ඉන්දියාව අපේ අපනයනයන් මිලදී නොගන්න ඉඩ තියෙනවා. ඒ රටවල් අපිට සම්බාධක පනවන්න ඉඩ තියෙනවා.
ලංකාවේ නිමිඇඳුම් ඇමෙරිකාව සහ යුරෝපය මිලදී ගැනීම නැවත්තුවොත් වෙන සංගදිය හිතාගන්න පුළුවන් නේද?
රාජ්යය තමන්ගේ රූකඩයක් කරගන්න යාම ලංකාවට ඇඩ්රස් නැතිවෙන රටේ ආර්ථිකයට දිට්වා සුළි කුණාටුවට අහුවෙන මහා භයානක සෙල්ලමක්.
බර්ටි රණවීරගේ
