චීන විදේශ ඇමැති ලංකාවේ අලුත් ජනාධිපතිවරු බලයට පත්වීමෙන් පසු ලංකාවට පැමිණ අලුතෙන් පත්වූ ජනාධිපතිවරු සමග සාකච්ඡා කිරීම සම්ප්රදායක්ව තිබිණි. චීන විදේශ ඇමැති මෛත්රීපාල ජනාධිපති වී වසරකට පසු ලංකාවට පැමිණ මෛත්රිපාල සහ අගමැති රනිල් හමුවී සාකච්ඡා පැවැත්වීය. එමෙන්ම ගෝඨාභය ජනාධිපති වී කොවිඩ් වසංගතය සමනය වීමෙන් පසු ඔහු 2022 ලංකාවට පැමිණ ගෝඨා හමුවී සාකච්ඡා කළේය. ඔහු එම සංචාරයේදී අගමැති මහින්ද රාජපක්ෂද හමුවිය. රනිල් ජනාධිපති වීමෙන් පසු චීන විදේශ ඇමැති ලංකාවට ආවේ නැත්තේ ගෝඨාගේ නිල කාලයේ ඉතිරි කොටස සඳහා ඔහු මහජන ඡන්දයෙන් නොව පාර්ලිමේන්තු ඡන්දයෙන් පත්වූ නිසා විය හැකිය.
මෛත්රීපාලට, ගෝඨාට සහ රනිල්ට වඩා චීනයට සමීප සබඳකම් තියෙන්නේ ජවිපෙ සමගය. එහෙත් පසුගියදා චීන විදේශ ඇමැති ලංකාවට ආවේ දකුණු අප්රිකාවේ සිට චීනය බලා යන අතරතුර ට්රාන්සිට් සංචාරයකය. එම ට්රාන්සිට් සංචාරයේදී චීන විදේශ ඇමැති හමුවීමට විදේශ ඇමැති විජිත හේරත් ගියේය. ජනාධිපති අනුර චීන විදේශ ඇමැති හමුවීමට කටුනායකට යන බවට වාර්තා වුවද ඔහු ගියේ නැත.Sri Lanka Latest News
රනිල් ජනාධිපති කාලයේ ප්රංශ ජනාධිපති මෙලෙස ලංකාවට ට්රාන්සිට් සංචාරයකට ආ විට ජනාධිපති රනිල් කටුනායකට ගොස් ඔහු හමුවිය. දකුණු අප්රිකා ජනාධිපති ට්රාන්සිට් සංචාරයකට ආ විටද ජනාධිපති රනිල් කටුනායකට ගොස් ඔහු හමුවිය. ප්රංශ ජනාධිපතිටත් දකුණු අප්රිකා ජනාධිපතිටත් වඩා ලංකාවට භූ දේශපාලනමය වශයෙන් චීන විදේශ ඇමැති වැදගත්ය. ජනාධිපති අනුර ඔහු හමුවීමට නොයාම ප්රශ්නකාරීය. චීන විදේශ ඇමැති පැයකට දෙකකට හෝ කොළඹට පැමිණ අතීත සම්ප්රදායට ගරු කරමින් ජනාධිපති අනුර හමු නොවීම ඊටත් වඩා ප්රශ්නකාරීය.
චීන විදේශ ඇමැති හමු වූ ලංකාවේ විදේශ ඇමැති සුළි කුණාටුවෙන් රට ගොඩනගන්න ආධාර ඉල්ලා සිටි බව ලංකාවේ විදේශ ඇමැති නිකුත් කළ නිවේදනයේ දැක්වේ. එහෙත් චීන විදේශ ඇමැති එයට ප්රතිචාර දක්වපු ආකාරය එහි සඳහන්ව නැත. ඉන්දීය විදේශ ඇමැති චීන විදේශ ඇමැති ඒමට පෙර ලංකාවට පැමිණ සුළි කුණාටුවෙන් ලංකාව ගොඩනගන්න සහන පැකේජයක් ප්රකාශයට පත් කළේය. චීන තානාපතිවරයා විදේශ ඇමැති විජිත හමුවී චීනයෙන් ඩොලර් මිලියනයක ආධාර දෙන්න එකඟ විය. චීන කොමියුනිස්ට් පක්ෂ ප්රධානියා ලංකාවට පැමිණ අනුර හමුවී තවදුරටත් ආධාර දෙන්න පොරොන්දු විය. චීන විදේශ ඇමැති ලංකාවට එන බව සැලවූ විට ඉන්දීය විදේශ ඇමැති මෙන් සහන පැකේජයක් ප්රකාශයට පත් කරයි කියා බලාපොරොත්තු වුවද එසේ නොවීය. චීන කොමියුනිස්ට් පක්ෂ ප්රධානියා ලංකාවට ආ වෙලාවේත් චීන පර්යේෂණ නැව්වලට පනවා ඇති තහනම ඉවත් කරන ලෙස ඉල්ලා සිටි බව වාර්තා වේ. චීන විදේශ ඇමැති විදේශ ඇමැති විජිත හමුවූ විටත් සාකච්ඡා න්යාය පත්රයේ එයට මූලික තැනක් හිමිවන්නට ඇත. කෙසේ හෝ චීන විදේශ ඇමැතිගේ ට්රාන්සිට් සංචාරයෙන් පේන්නේ චීන පර්යේෂණ නැව් ප්රශ්නය චීන-ජවිපෙ මිත්රත්වයට බාධකයක් වී ඇති බවය.
