නොසිතූ මොහොතක රංගන ක්ෂේත්රට පැමිණ ප්රේක්ෂක ආදරය දිනූ ඇය, ගැමි රුවැත්තියක්. රංගනයට පිවිස කෙටි කලකින්ම ප්රේක්ෂක හදවත් දිනාගත්, නව පරපුරේ දක්ෂ රංගන ශිල්පිනියක වන හිරුෂි පෙරේරා මේ දිනවල “ඉස්කෝලේ“ ටෙලිනාට්යය හරහා ප්රේක්ෂකයන් අතර ඉතා ජනප්රිය චරිතයක්. ඇය සමග ‘හාට්’ අපි සිදුකළ කතාබහ මෙසේ දිගහැරෙයි.
ඉතින් කොහොමද මේ දවස්වල ඔබේ ජීවිතය ගතවෙන්නේ?
මේ දවස්වල ‘ඉස්කෝලේ’ ටෙලිනාට්යයේ වැඩකටයුතු එක්ක තමා ගොඩක් කාර්යබහුල වෙලා ඉන්නේ. ඒ වගේම මගේ ඩාන්සින් ඇකඩමියේ වැඩකටයුතුත් එක්ක තමා මේ දවස්වල කාලය ගතවෙන්නේ.
ඔබ අද වනවිට රංගන ක්ෂේත්රයේ දක්ෂ වගේම ජනප්රිය රංගන ශිල්පිනියක්, ඇත්තටම ඔබට මොකද හිතෙන්නේ ආපු ගමන ගැන?
මම අවුරුදු හයක් වෙනවා රංගන ක්ෂේත්රයට පැමිණිලා. හිතුවෙත් නැති විදිහට තමා මම මේ ක්ෂේත්රයට ආවේ. මොකද මගේ ගෝල් එක වුණේ රංගන ශිල්පිනියක් වෙන එක නෙවෙයි. හැබැයි ජීවිතේ ටර්නින් පොයින්ට් එක රංගන ක්ෂේත්රයට පැමිණීම.
පවුලේ විස්තර ටිකකුත් කතා කරමුද?
මම විවාහකයි. මගේ පවුලේ නංගි, අම්මයි, තාත්තයි ඉන්නේ. නංගි පෞද්ගලික ආයතනයක රැකියාවක් කරනවා. මගේ තාත්තා රැකියාව කළේ දුම්රිය දෙපාර්තමේන්තුවේ. දැන් විශ්රාම අරගෙන ඉන්නේ. මගේ අම්මා ගෘහණියක්.
ඔබ මේ වනතෙක් දායක වුණු නිර්මාණ පිළිබඳ සහ ඒ සඳහා ප්රේක්ෂකයන්ගේ ලැබුණු ආදරය ගැන සඳහන් කිරීමක් කළොත්?
මම මේ ක්ෂේත්රයට ඇවිල්ලා දැනට අවුරුදු හයක් පමණ වෙනවා. මම මුලින්ම දායක වුණේ 2020 වර්ෂයේදී ‘දෙවෙනි ඉනිම’ ටෙලි නාට්යයටයි. ඒ කාලයේ ජනප්රියම ටෙලිනාට්යය තමා ‘දෙවෙනි ඉනිම’. ‘දෙවෙනි ඉනිම’ ටෙලිනාට්යයේ රංගන කටයුතු කරගෙන යන අතරතුරේදී තමා මට ‘ඉස්කෝලේ’ ටෙලිනාට්යයට ආරාධනාව ලැබෙන්නේ. ඒ අතරතුර තමා මට ආරාධනාව ලැබෙන්නේ ‘කෝඩු හිම’ ටෙලිනාට්යයට. එම ටෙලි නාට්යයේත් රංගනයෙන් දායකත්වය ලබාදුන්නා.
ඕනෑම ක්ෂේත්රයක ඕනෑම කෙනෙක්ට බාධක ඇතිවෙන්න පුළුවන්. ඉතින් ඔබටත් බාධක ඇති?
මම හිතන්නේ ඕනෑම කෙනෙක්ට බාධා ඇතිවෙන්න පුළුවන්. රංගන ශිල්පිනියක් කියලා වෙනසක් නෑ. අපිටත් බාධක ඇති වෙනවා. මම ඒ දේවල් ගොඩක් ධෛර්යමත්ව මුහුණ දුන්නේ මගේ පවුලේ අය මම වෙනුවෙන් හිටිය නිසා. තනි ගැහැනියක් විදියට හිටියා නම් මම එතනින් ෆේල් වෙන්න ඉඩකඩ තියෙනවා. හැම වෙලාවෙම මගේ පිටිපස්සේ මගේ සැමියා සහ පවුලේ අය හිටියා. ඒ හැමෝටම ස්තුතිවන්ත වෙනවා. ඒ අය නිසා තමා මම ඒ බාධක මගහැරගෙන, බාධකවලට හොඳට මුහුණ දෙන්න අවස්ථාව ලැබිලා තියෙන්නේ.
ඔබේ කලා ජීවිතය තුළ දිනාගෙන ඇති වටිනාම දේ මොකක්ද?
වටිනාම දේ තමා ප්රේක්ෂක ආදරය කියන දේ. ගොඩක් දෙනා රඟපාන්න ආවට ඒක හැමෝටම ලැබෙන්නේ නැහැ. හරිම සීමිත කලාකරුවන් ප්රමාණයකට තමා ප්රේක්ෂක ආදරේ සහ ප්රේක්ෂකයාගේ හිත දිනාගන්න අවස්ථාව ලැබෙන්නේ. මම රංගන ක්ෂේත්රයට ඇවිත් ටික කාලයකින් මට ඒ අවස්ථාව ලැබෙනවා. හිතපු නැති විදිහට මම මේ ක්ෂේත්රයට ආවේ. හිතපු නැති විදිහට ප්රේක්ෂකයා හරි ආදරයෙන් මාව වැලඳගන්නවා. ඉතින් මට ලැබෙන ප්රේක්ෂකයන්ගේ ආදරය මගේ ජීවිතයේ මම ලබාගත් වටිනාම දේ කියලා හිතෙනවා.
ඔබේ ඉදිරි වැඩකටයුතු සහ නව බලාපොරොත්තු මොනවද?
මගේ රංගන කටයුතු සමග මගේ නර්තන කටයුතුත් කාලයක් නවත්තලා තිබුණේ. දැන් මම නැවතත් නර්තන කටයුතු ආරම්භ කරලා තියෙනවා. මම මගේම කියලා ඩාන්සින් ඇකඩමියක් පටන් ගෙන තියෙනවා. ඒක තමයි ‘ඩාන්ස් විත් හිරුෂි’. ඇකඩමිය පටන් අරගෙන තාම අවුරුද්දක්වත් නැහැ. ඒකෙ වැඩ කටයුතුවලට මගේ කාලේ වැය කරලා තියෙනවා. ඉදිරියට රංගන කටයුතුත් නර්තන කටයුතුත් එක හා සමානව කරගෙන යන්න බලාපොරොත්තු වෙනවා.
හිමාෂා නෙත්මිණි
