පසුගිය රජය සමයේ පොල්තෙල් ආනයනය කිරීමේදී සිදුවූ බව කියන බදු පැහැරහැරීමක් සම්බන්ධයෙන් සමගි ජන බලවේගයේ පාර්ලිමේන්තු මන්ත්රී එස්.එම්. මරික්කාර් මහතා පසුගියදා පාර්ලිමේන්තුවේදී ප්රශ්න කළා.
‘පහුගිය රජයේ කාලේ ආනයනික පොල්තෙල් ලංකාවට ගෙනල්ලා, පිරිපහදු නොකළ පොල්තෙල් පිරිපහදු කරලා විකුණනවා නම් වැට් බද්ද සහ සෙස් බද්ද 20.5%ක් ගෙවන්න ඕනෙ. එතකොට සමාගම් හයක්, සමාගම් තුනක නමින් පොල්තෙල් ගෙනල්ලා, පිරිපහදු කරලා විකුණනකොට බදු ගෙවන්නේ නැතුව හිටපු ජනාධිපතිවරයාගෙන් බදු සහනය ඉල්ලුවා ලිඛිතව. ඔහු ඒක යවනවා දේශීය ආදායම් දෙපාර්තමේන්තුවට. ඔවුන්, ඔවුන්ගේ ඔපීනියන් එක නැවත යවනවා. අද මේ මොහොත වෙනකන් ඒ බදු අය කරගන්න කිසිම වැඩකටයුත්තක් කරන්නේ නැහැ. ලැජ්ජයි ගරු කතානායකතුමනි. පහුගිය අයවැය කතාවෙදි මම මේක කිව්වා, මේක අය කරගන්න කියලා. ඩොකියුමන්ට් ඉල්ලුවා. දුන්නා. ඊට පස්සේ පෙබරවාරි මාසේ අගමැතිතුමියගෙන් ඇහුවහම අගමැතිතුමිය පිළිගත්තා, බදු ගෙවන්න ඕනේ ඒගොල්ලෝ, අපි ඒ සඳහා අය කරගන්න කටයුතු කරනවා කියලා. අදට මාස නවයක් ගිහිල්ලා සත පහක් අය කරගෙනත් නැහැ. ඒ සඳහා ඇසස්මන්ට් රිපෝට් එක දීලත් නැහැ.
ඊළඟට වෙළෙඳ ඇමැතිතුමාගෙන් මම වාචික පිළිතුරු අපේක්ෂා කරන ප්රශ්නෙකදී ඒක ඇහුවා. ඔහු අය කරගන්නම් කිව්වා. කතාවකුත් නැහැ. බිලියන දහයකට වැඩිය රජයට පාඩු කරලා තියෙනවා. එතකොට රජයට වගකීමක් තියෙනවා මේ අය පිරිපහදු කරලා විකුණපු තෙල්වලට ගෙවන්න තියෙන බද්ද අය කරගන්න, ඒගොල්ලෝ එහෙම නොගෙවනවා නම් පිරිපහදු නොකරම කෘඩ් ඔයිල්ම විකුණලා තියෙනවද කියලා. එහෙමනම් බරපතළ සෞඛ්ය ප්රශ්නයක්. හැබැයි වගේ වගක් නැහැ. මහජන නියෝජිතයෙක් විදිහට, පාර්ලිමේන්තු මන්ත්රීවරයෙක්, රටේ අගමැතිවරියගෙන් ප්රශ්න අහලා, පිළිඅරගෙන, උත්තර දීලා, මොකුත් කරන්නේ නැහැ. වෙළෙඳ ඇමැතිවරයාගෙන් අහලා, ‘ඔව් කරනවා’ කියනවා, මොකුත් නැහැ. එතකොට දැන් මම බැරිම තැන මුදල් නියෝජ්ය ඇමැතිවරයාට දීලා තියෙනවා බලන්න කියලා. මට සැකයක් තියෙනවා, මේ රුපියලක්වත් හොරකම් කරන්නේ නැහැ කියපු ආණ්ඩුව, මේ කොම්පැනිකාරයන්ගේ අල්ලේ නැටවෙනවද, එහෙම නැත්නම් අරමුදලට සල්ලි හම්බවුණාද කියලා අපි දන්නේ නැහැ.’
චානක ලියනගේ
