2025 වසර සඳහා ආණ්ඩුව ඉදිරිපත් කළ අයවැයෙහි අන්තර්ගතව තිබූ යෝජනාවලින් මෙතෙක් ඉටුකර ඇති යෝජනා මොනවාද යන්න පිළිබඳ විපක්ෂ නායක සජිත් ප්රේමදාස මහතා ආණ්ඩුවෙන් ප්රශ්න කළ අවස්ථාවේදී ඊට ආණ්ඩුව පාර්ශ්වයෙන් කිසිදු අමාත්යවරයකු පිළිතුරු ලබා නොදීම විශේෂ සිදුවීමක් විය.Sri Lanka Latest News
විපක්ෂ නායකවරයා මෙම ප්රශ්න කිරීම සිදුකර සිටියේ පසුගිය සිකුරාදා (24) දිනයේදී ස්ථාවර නියෝග 27/2 යටතේ පාර්ලිමේන්තුවේදී විශේෂ ප්රකාශයක් කරමිනි.
එහිදී විපක්ෂ නායකවරයා 2025 වර්ෂය සඳහා ආණ්ඩුව කොපමණ අයවැය යෝජනා ඉදිරිපත් කොට තිබේද, ඒවායෙන් ඉටුකොට ඇති යෝජනා මොනවාද යන්න පිළිබඳ ආණ්ඩුවෙන් ප්රශ්න කර සිටියේය.
එමෙන්ම දැනට කිසිදු අයුරකින් ක්රියාත්මක කිරීමට හැකියාවක් නොලැබුණු යෝජනා මොනවාද, එම යෝජනා ආරම්භ නොකිරීමට හේතු මොනවාද යන්න පිළිබඳවද විපක්ෂ නායකවරයා ආණ්ඩුවෙන් ප්රශ්න කර තිබිණි.
මීට අමතරව මෙරට ජංගම ගිණුමේ හිඟය සහ වෙළෙඳ හිඟය කොපමණද, එය දළ දේශීය නිෂ්පාදිතයේ ප්රතිශතයක් ලෙස කොපමණද යන්න පිළිබඳවත්, විදේශ ආධාර යටතේ ක්රියාත්මක වන ව්යාපෘතීන්හි ප්රගතිය පිළිබඳවත්, 2025 වසරේදී ලැබුණු ඍජු විදේශ ආයෝජන පිළිබඳවත් ප්රේමදාස මහතා ප්රශ්න කොට තිබිණි.
නමුත්, ආණ්ඩුව පාර්ශ්වයෙන් ඊට පිළිතුරු දුන් අමාත්ය නලින්ද ජයතිස්ස මහතා කියා සිටියේ ලබන පාර්ලිමේන්තු වාරයේදී ඊට පිළිතුරු දීමට කටයුතු කරන බවකි.
කෙසේ වෙතත්, ලබන පාර්ලිමේන්තු වාරයේදී ජනාධිපති අනුර කුමාර දිසානායක මහතා විසින් 2026 වසර සඳහා වන අයවැය ලේඛනය පාර්ලිමේන්තුවට ඉදිරිපත් කිරීමට නියමිතය.
