ගෝඨාභය රාජපක්ෂ ලංකාව බංකොලොත් රටක් ලෙස ප්රකාශයට පත්කිරීමට ඔන්න මෙන්න කියා තිබියදී එවක අගමැති මහින්ද හරහා චීනයෙන් යෝජනාවක් ආවේය. එම යෝජනාව නම් බංකොලොත්භාවය ප්රකාශයට පත් නොකර අයි.එම්.එෆ්. නොයා චීනයෙන් ඩොලර් බිලියන 2ක ණයක් ලබාගෙන ගෙවීමට නියමිත ණය ගෙවීමය. එම යෝජනාව ඉදිරිපත් කළේ එවක මහ බැංකු අධිපති කබ්රාල්ය. ඔහු චීනයේ විශ්වාසය දිනාගත් අයෙකි. චීනය සමග මෙම ඩීල් එක කතාකරන්න ඇත්තේ ඔහුය. ඔහු අයි.එම්.එෆ්. යෑම ප්රතිපත්තියක් වශයෙන් ප්රතික්ෂේප කළ අයෙකි. එයට හේතුව අයි.එම්.එෆ්. කොන්දේසි නිසා ආණ්ඩුව අප්රසාදයට පත්වෙනවාය කියන මතයය. ඔහු මෙරට චීන තානාපති හරහා මහින්ද සහ චීන අගමැති අතර සාකච්ඡාවක් සංවිධාන කොට ඩොලර් බිලියන 4 යෝජනාවට මහින්දගේ එකඟතාව ලබාගත්තේය. මහින්ද ගෝඨාභයව මේ යෝජනාවට එකඟ කරගන්න උත්සාහ ගත්තත් ගෝඨාගේ උපදේශකයන් එයට එකඟ වූයේ නැත. ඔවුන්ගේ උපදෙස වූයේ බංකොලොත්භාවය ප්රකාශයට පත්කොට අයි.එම්.එෆ්. යායුතු බවය. ගෝඨා චීන යෝජනාව ඉවත දමා අයි.එම්.එෆ්. යන්න තීරණය කළේය. Sri Lanka Latest News
දැන් යළිත් ජවිපෙ තුළ මේ යෝජනාව ගැන සාකච්ඡාවක් ඇතිවී තිබේ. පසුගියදා ජවිපෙ ලේකම් ටිල්වින් සිල්වා ඇතුළු ජවිපෙ මන්ත්රීවරු චීනයට ගොස් මේ ගැන සාකච්ඡා කළාද දන්නේ නැත. චීනය යළිත් මෙම යෝජනාව ගේනවා නම් ගේන්නේ ඉන්දියාව ඉලක්ක කරගෙනය. චීනයේ පර්යේෂණ නැවක් චීනය ලංකාවට ආධාර කිරීමේ කොන්දේසියක් ලෙස ඉදිරිපත් කරන්නේ ඉන්දියාව ඉලක්ක කරගෙනය. චීනයට ලංකාවේ මුහුදු සීමාවේ පර්යේෂණ කිරීමට වඩා ඕනෑ වී ඇත්තේ ඉන්දියාව අවුස්සා ගැනීමටය.
පසුගියදා මෙරට රුසියානු තානාපතිවරයා ජාත්යන්තර සබඳතා පිළිබඳ බණ්ඩාරනායක ජාත්යන්තර මධ්යස්ථානයේ සම්මන්ත්රණයකදී කීවේ තමන් සහ චීනය ලංකාවට ආධාර කිරීමට කැමැත්තෙන් පසුවුවත් එන්.පී.පී. ආණ්ඩුවෙන් එයට යහපත් ප්රතිචාරයක් නැති බවය.
ඉන්දියාව සහ බටහිර රටවලට එරෙහිව චීන ගැටුම දැන් ආණ්ඩුව තුළට රිංගා ගෙන තිබේ. ටිල්වින් සහ බිමල් නියෝජනය කරන්නේ චීන මතවාදයය. අනුර, හරිනි සහ විජිත හේරත් නියෝජනය කරන්නේ ඉන්දියාව ඇතුළු බටහිර මතවාදයය. ඔවුන් හිතන්නේ රනිල්ගේ අයි.එම්.එෆ්. වැඩපිළිවෙළ ඉදිරියට ගෙන යායුතු බවය. ඒත් ටිල්වින් සහ බිමල් හිතන්නේ එයින් ජවිපෙ ජන පදනමට විශාල හානියක් වන නිසා ජවිපෙට මතවාදීමය වශයෙන් සමීප චීනය සමග යායුතු බවය.
අනුරගේ ආණ්ඩුව ක්රම ක්රමයෙන් මහින්දගේ ආණ්ඩුව බවට පරිවර්තනය වන ලකුණු පෙනේ. සුළු ජාතීන් සම්බන්ධයෙන්, අධිකරණ විනිසුරුවන් පත්කිරීම සම්බන්ධයෙන්, නගර සභාවල බලය ගැනීම සම්බන්ධයෙන් ඔවුන් පෙන්වන්නේ මහින්දගේ ආණ්ඩුවේ ලක්ෂණය. මහින්ද චීනය සමග පෑහුණා සේ මේ ආණ්ඩුවත් චීනය සමග යන්න තීරණය කරයිද කියා දන්නේ නැත. නැතිනම් ඉන්දියාව සහ බටහිර රටවල් බයකොට චීන බිල්ලා පෙන්වා අයි.එම්.එෆ්. සමග තමන්ට වාසිදායක ඩීල් එකකට යන්න උත්සාහ කරනවාද දන්නේ නැත.
