රට තුළ මතුපිටට පෙනෙන සාමකාමී තත්ත්වයක් තිබෙනවා සේම ඊට යටින් කළු පද්ධතියක් ක්රියාත්මක වන බවත් මේ කළු පද්ධතියේ ජාවාරම්කාර ව්යාපාරික කණ්ඩායමක් සිටින බවත් ජනාධිපති අනුර කුමාර දිසානායක මහතා පැවැසීය. එකී කළු යාන්ත්රණයේ දේශපාලන අධිකාරියත්, රාජ්ය නිලධාරීන් මෙන්ම නීති විරෝධී සන්නද්ධ අවි ගත් අය සහ මාධ්යයද සිටින බව ජනාධිපතිවරයා පෙන්වා දුන්නේය. Sri Lanka Latest News
ඔහු මේ බව සඳහන් කළේ, ජුනි 02 වැනිදා ජනාධිපති කාර්යාලයේ පැවැති ‘බදු ශක්ති’ බදු අනුකූලතාව සහ බදු පදනම ඉහළ නැංවීමේ ජාතික වැඩසටහනෙහි සමාරම්භක අවස්ථාව අමතමිනි.
එහිදී ජනාධිපතිවරයා සිදුකළ අදහස් දැක්වීමෙන් කොටසක් පහත පළවේ.
‘මෑතකදී මාතර බන්ධනාගාරය අලුත්වැඩියා කිරීම හේතුකොට ගෙන එහි සිරකරුවන් අඟුණකොලපැලැස්ස බන්ධනාගාරයට මාරු කළා. එතකොට ඔවුන් සතුව තිබුණු සියලු දේ ඔවුන්ට අරගෙන යන්න බෑ. මොනවද අපිට හම්බවුණේ බන්ධනාගාරයේ තිබිලා? මාංචු කුට්ටම් 7ක් හම්බවුණා සිරකරුවන් අතේ තිබිලා. ඒ මාංචු කුට්ටම්වල යතුරු 27කුත් හම්බවුණා සිරකරුවන් ගාව තිබිලා. මාංචු කුට්ටම් ඔවුන් අතේ. යතුරුත් ඔවුන් අතේ. ජංගම දුරකතන, වයර්, චාජර්. මේවා තියෙනවා. මේ එකක්වත් එහි නිලධාරීන්ගේ අවබෝධයකින් තොරව ආපු නැති ඒවා නෙවෙයි.
අපරාධ කීපයක් පිළිබඳ පහුගිය කාලේ ආන්දෝලනයට තුඩු දුන්නා. උසාවියේ කෙනෙක් ඝාතනය කිරීම පිළිබඳ පරීක්ෂණයේදී පොලිස් නිලධාරීන් දෙදෙනෙක් දැනට අත්අඩංගුවට අරගෙන තියෙනවා. ඔන්න රාජ්යය තියෙන තැන. මිද්දෙණියේ ඝාතනයේදී තංගල්ල පොලිසියේ නිලධාරියෙක් අත්අඩංගුවට අරගෙන තිබෙනවා. ගල්කිස්ස පොලිසියේ නිලධාරියෙක් තමන්ගේ ගිනි අවිය විකුණලා රට පනිනවා. කොතැනද තියෙන්නේ? හමුදා කඳවුරුවල තියෙන ටී56 අවි 73ක් හමුදා කඳවුරෙන් පාතාලෙට ඇවිල්ලා තියෙනවා. කොතැනද මේ රට තියෙන්නේ?
ආගමන විගමන දෙපාර්තමේන්තුව ඔබ දන්නවා පාස්පෝර්ට් එකක් සකස් කරගැනීමේදී ඒ පාස්පෝට් එක ලබාගන්න කෙනාගේ ඡායාරූපයක්, ඒ වගේම ඔහුම ගොස් ඇඟිලි ලබාදිය යුතුයි. පාතාලයේ විදෙස්ගතව ඉන්න නායකයන්ට ඇඟිලි සලකුණු වර්ග 3කට ඡායාරූප වර්ග කීපයකට පාස්පෝට් ලබාදීලා තියෙනවා. අපේ රාමුව ආරක්ෂා කරගැනීම සඳහා තිබෙන ආයතන ඒ රාමුව බිඳිනවා. පාතාල නායකයන් කීපයකට අද සරල කතාවක් තියෙන්නේ. ඡායාරූපය තිබෙනවා. පුද්ගලයෙක් එනවා ඇඟිලි සලකුණු දෙන්න. මේ ඡායාරූපයේ ඉන්න කෙනාද මේ පුද්ගලයා කියලා හඳුනාගන්න බැරිද? මෙතැන තියෙනවා ප්රශ්නයක්. ආයතනය එතැනට ගිහින් තියෙනවා.
ආර්.එම්.වී. එකේ ලොකර් එකේ තිබිලා සල්ලි හම්බවෙනවා. ඒ නිලධාරියා අවුරුදු 3ක් වැඩ කළත් එකතු කරගන්න බැරි තරම් විශාල වැටුපක් ලොකර් එකේ තිබිලා හම්බවෙනවා. ඒ වගේම කස්ටම් එක ගැන විශාල චෝදනාවන් තිබෙනවා. මම හිතන්නේ කීප දෙනෙක්ගේ වැඩ තහනම් කරලා තිබෙනවා. සුරාබදු දෙපාර්තමේන්තුවේ ප්රශ්න තිබෙනවා. ඒ නිසා මේ රට අපිට මෙහෙම පේන සාමකාමී පද්ධතියක් තියෙනවා වගේම, මේක ඇතුළේ කළු පද්ධතියක් තියෙනවා. ඒක හොඳට තේරුම් ගන්න ඕනේ. ඒ කළු පද්ධතිය ජාවාරම්කාර යම් ව්යාපාරික කණ්ඩායමක් නියෝජනය කරනවා. මේක ඇත්ත.
මෑතකදී රේගුවේ බහාලුම් ප්රමාණයක් විවෘත කළාට පස්සේ ඉතා ප්රසිද්ධ සන්නාම සහිත සමාගම්වලින් නීති විරෝධීව ආනයනය කළ භාණ්ඩ හම්බවෙනවා. දැන් මෙතැන මේ කළු යාන්ත්රණයේ ජාවාරම්කාර ව්යාපාරිකයන් අතළොස්සක් ඉන්නවා. මේ කළු යාන්ත්රණයේ දේශපාලන අධිකාරිය තිබුණා. මේ කළු යාන්ත්රණයේ රාජ්ය නිලධාරීන් ඉන්නවා. මේ කළු යාන්ත්රණයේ නීති විරෝධී සන්නද්ධ අවි ගත්ත අය ඉන්නවා. මේ කළු යාන්ත්රණයේ මාධ්යය ඉන්නවා. හොඳට තේරුම් ගන්න. ඒ නිසා අපි ඉදිරිපිට තිබෙනවා ඉතාමත් සංවිධානාත්මක ලෙස කළු යාන්ත්රණයක්. මම ඔබට සහතිකයක් දෙනවා. මේ කළු යාන්ත්රණය බිඳිනවා. හැම කෙනාටම නීතියට යටත් වෙන පරිසරයක් නිර්මාණය කරනවා…..’
