ඉන්දීය රුපියල් කෝටි 20ක් (ශ්රී ලංකා මුදලින් රුපියල් කෝටි 70ක්) ශූරයන්ට තිළිණ කෙරෙන ඉන්දීය ප්රිමියර් ලීග් ක්රිකට් තරගාවලියේ අවසන් මහා තරගය අහමදාබාද් නරේන්ද්ර මෝදි ක්රීඩාංගණයේදී අද පස්වරු 7.30ට ආරම්භ වේ.Sri Lanka Latest News
අයිපීඑල් ඉතිහාසයේ තවමත් ශූරතාවක් දිනා නැති කණ්ඩායම් දෙකක් වන පන්ජාබ් කිංග්ස් හා රෝයල් චැලෙන්ජර්ස් බැංගලූරු අතර පැවැත්වෙන මේ අවසන් මහා තරගයේ පරාජිත කණ්ඩායමට හිමිවන මුදල ඉන්දීය රුපියල් කෝටි 13ක් වන අතර එය ශ්රී ලංකා මුදලින් රුපියල් කෝටි 46ක් වැනි දැවැන්ත මුදලකි.
ශ්රී ලංකා වේග පන්දු යවන ක්රීඩක නුවන් තුෂාර ක්රීඩා කරන රෝයල් චැලෙන්ජර්ස් බැංගලූරු පිලේ නායකත්වය රාජාට් පටිඩාර් උසුලන අතර, අයිපීඑල් ශූරතාවක් දිනා ගැනීමේ පිපාසයෙන් සිටින විරාට් කෝලි එම පිලේ ප්රබල භූමිකාවක් රඟ දක්වයි. ඔස්ට්රේලියාවේ ටිම් ඩේවිඩ්, ජොස් හෙසල්වුඩ්, එංගලන්තයේ ලියම් ලිවින්ග්ස්ටන්, පිල් සෝල්ට්, සිම්බාබ්වේ බ්ලෙසින්ග් මුසරබානී, නවසීලන්තයේ ටිම් සෙයිෆර්ට් හා බටහිර ඉන්දීය කොදෙව් ක්රීඩක රොමාරියෝ ෂෙෆර්ඩ් රෝයල් චැලෙන්ජර්ස් බැංගලූරු පිලට එක්ව සිටින විදෙස් ක්රීඩකයෝ වෙති.
ෂ්රෙයස් අයියර් නායකත්වය දරන පන්ජාබ් කිංග්ස් පිලේ ඉන්දීය ක්රීඩකයන් වන වේග පන්දු යවන අර්ෂදීප් සිං හා දඟ පන්දු යවන යුෂ්වේන්ද්ර චාහාල් කැපී පෙනෙන චරිත වන අතර, ඇෆ්ගනිස්තානයේ අසමතුල්ලා ඔමරාසි, ඔස්ට්රේලියාවේ මාකස් ස්ටොයිනස්, ෂේවියර් බාර්ට්ලේට්, ආරොන් හාඩී, ජොෂ් ඉංග්ලිෂ් හා නවසීලන්තයේ කයිල් ජේම්සන් විදෙස් ක්රීඩකයන් ලෙස එක්ව සිටිති.
පන්ජාබ් කිංග්ස් කණ්ඩායම හා රෝයල් චැලෙන්ජර්ස් බැංගලූරු අතර පළමු සුදුසුකම් ලැබීමේ තරගයේදී හමුවී බැංගලූරු පිල කඩුලු 8ක ජයක් ලබා අවසන් තරගයට පිවිසියේය. පසුව සුදුසුකම් ලැබීමේ දෙවැනි තරගයේදී මුම්බායි ඉන්දියන්ස් හා පන්ජාබ් කිංග්ස් හමුවී කඩුලු 5ක ජයක් ලබා පංජාබ් කිංග්ස් පිල අවසන් තරගයට පැමිණීමේ වාසනාව උදාකර ගත්තේය.
ඉන්දීය ප්රිමියර් ලීග් ක්රිකට් ඉතිහාසයේ රෝයල් චැලෙන්ජර්ස් බැංගලූරු පිල අවස්ථා 3කදී අවසන් මහා තරගයට පිවිස කුසලානය අහිමිවී ගියේය. 2009දී ඩෙකාන් චාර්ජස් හමුවේ අවසන් ගැටුමේදී පරාජය වූ බැංගලූරු පිල 2011දී චෙන්නායි සුපර් කිංග්ස් හා 2016දී සන්රයිස් හයිද්රාබාද් හමුවේ කුසලානය අහිමිවී ගියේය. පන්ජාබ් කිංග්ස් කණ්ඩායම 2014 පැවති අවසන් මහා තරගයේදී කොල්කටා නයිට් රයිඩර්ස් හමුවේ පරාජයට පත්වීමෙන් අයිපීඑල් ශූරතා බලාපොරොත්තු බිඳ වැටිණි.
එබැවින් වසර 11කට පසු අයිපීඑල් තරගාවලියේ අවසන් මහා තරගයට පිවිසි පන්ජාබ් කණ්ඩායම හා වසර 9කට පසු අවසන් සටනට පිවිසි බැංගලූරු පිල අතර සටන උණුසුම් මුහුණුවරක් ගනු ඇතැයි විචාරක මතය වේ.
මේ තරගය රෝයල් චැලෙන්ජර්ස් බැංගලූරු පිලේ විරාට් කෝලි හා පන්ජාබ් කිංග්ස් පිලේ ෂ්රෙයස් අයියර් අතර සටනක් වනු ඇතැයි එම විචාරකයෝ අනාවැකි පළ කරති. කෝලි මෙවර තරග 14කදී ලකුණු 614ක් ලබා සිටින අතර, අයියර් තරග 16කදී ලකුණු 603ක් ලබා ආසන්නයේම සිටින පිතිකරුවන් දෙදෙනකි. කෝලි පන්ජාබ් කිංග්ස් සමඟ තරගයේදී පන්දු 54කදී නොදැවී ලකුණු 73ක් ලබා වැඩිම ලකුණු ගණන සටහන් කළ අතර, අයියර් ගුජරාට් ටයිටන්ස් පිලට එරෙහිව පන්දු 42කදී නොදැවී ලකුණු 97ක් ලබා වැඩිම ලකුණු ගණන වාර්තා කළේය.
අයියර් සුදුසුකම් ලැබීමේ දෙවැනි තරගයේදී මුම්බායි ඉන්දියන්ස් පිලට එරෙහිව ජයග්රහණයේ නියමුවා බවට පත් වෙමින් පන්දු 41කින් නොදැවී ලකුණු 87ක් ලබා කැපී පෙනෙන ඉනිමක් දියත් කළේය. ඔහු ග්ලෙන් මැක්ස්වෙල් සහ ක්රිස් ගේල් අබිබවා යමින් පන්ජාබ් පිතිකරුවකු විසින් වාරයක් තුළ වැඩිම හයේ පහරවල් එල්ල කළ ක්රීඩකයා විය.
