ඔබට අද කියන්න යන්නේ අපේ රටේ එදා මෙදාතුරු බිහිවූ අසහාය ගායන ශිල්පියා එච්.ආර්. ජෝතිපාලයන් ජීවත් වූ නිවස ගැන කතාවක්. කොළඹ 10 මාලිගාවත්ත මහල් නිවාස සංකීර්ණයේ පිහිටලා තියෙන නිවාස පෙළක තුන්මහල් ගොඩනැගිල්ලේ මැද කොටසේ තමයි ජෝතිපාලයන් ජීවත් වෙලා තියෙන්නේ. නිවාස සංකීර්ණයට පිවිසෙන මාර්ගය ‘එච්.ආර්. ජෝතිපාල මාවත’ ලෙස නම්කරලා තියෙනවා. ඒ වගේම ඒ ආසන්නයේ ජෝතිපාලයන්ගේ පිළිරුවකුත් ඉදිකරලා තියෙනවා.Sri Lanka Latest News
එතුමා අවසන් වරට ගීත ගායනා කිරීමට එක්වුණේ කතරගම ගම්උදා භූමියේ පැවැති සංගීත ප්රසංගයට කියලා බොහෝ දෙනෙක් දන්නවා. එදා එම ප්රසංගයේදී ජෝතිපාලයන් ගීත විශාල සංඛ්යාවක් ගායනා කළා. ඒ, එවක ජනාධිපති රණසිංහ ප්රේමදාස මහතා එම ගීත රසවිඳිමින් ප්රේක්ෂකාගාරයේ රැඳී සිටීම නිසා ඇතිවුණු සතුටටයි. කෙසේ වෙතත් ගීත රාශියක් ගායනා කිරීම නිසා ඇතිවූ වෙහෙසත්, කාලයක සිට ඔහු පීඩාවිඳි රෝගී තත්ත්වයත් ඒ සමගම උත්සන්න වීමත් නිසා ජෝතිපාලයන්ගේ සෞඛ්ය තත්ත්වය බොහෝ සේ පිරිහිලා තිබුණා. ඔහු පෙරළා සිය මාලිගාවත්තේ නිවෙසට ඇවිත් තියෙන්නේ පසුදා පාන්දර 4ට විතර. ඒ වෙද්දී ජෝතිපාලයන්ගේ සෞඛ්ය තත්ත්වය ගොඩක් නරක අතට හැරිලා තිබුණා නිසා යාබද නිවසේ සිටි ජෝතිගේ සමීපතම මිතුරෙකු, ගායන ශිල්පී එම්.එස්. ප්රනාන්දු සමග එක්ව ඔහුව රෝහල්ගත කර තියෙනවා. ඒ විදියට තමයි ජෝතිගේ අවසාන මොහොත ගැන සටහන් වෙන්නේ.
ජෝති එදා ජීවත් වෙච්ච නිවෙසේ අයිතිය, ජෝතිගෙන් පස්සේ ඔහුගේ දියණියට හිමිවෙලා තිබුණා. නමුත් දැන් එම නිවස දියණිය විසින් වෙනත් පාර්ශ්වයකට විකුණා ඇති බවත්, දියණිය විදේශ රටක ජීවත් වන බවත් දැනගන්නට ලැබුණා. ජෝතිගේ නිවෙසට යාබද නිවසේ ජීවත්වූ යුවලක් අදටත් එහි සිටිනවා. ඔවුන් රසවත් කෑමක් පිළියෙල කළ විට ජෝතිටත් ඉන් කොටසක් නොවරදවාම දෙන බව ඔවුන් පවසන්නේ ජෝති ගැන එදා තිබූ ආදරය ගෞරවය යළිත් සිහිපත් කරමින්.
අතිශය කාර්යබහුල සංගීත දිවියක් ගතකළ ජෝතිට ලැබුණු කෙටි විවේකයකදී පවා ඔහු මිතුරන් සමග සතුටු සාමීචියේ යෙදුණු මාලිගාවත්ත නිවාස සංකීර්ණයේ ඉදිරිපස ඇති රූස්ස ගහ පාමුල අද පාළුවට ගිහින්. එදා ඔවුන් සැන්දෑ යාමයේ එකතු වී ගී ගැයූ බංකුවද අද එහි නැහැ.
මාලිගාවත්ත මහල් නිවාස සංකීර්ණය, එහෙමත් නැත්නම් මාලිගාවත්ත ෆ්ලැට් එක කියන්නේ කලා පුරයක්. හෙළ ගී රැජින නම් විරුදාවලිය ලත් ලතා වල්පොල මහත්මිය අදටත් ජීවත් වන්නේ මේ නිවාස සංකීර්ණයේ. ඒ වගේම බර්ටි ගුණතිලක, මර්සි එදිරිසිංහ, විජය නන්දසිරි, දේවිකා මිහිරාණි, ෂෙල්ටන් පෙරේරා, මිල්ටන් පෙරේරා මදුමාධව අරවින්ද අතුළු කලාකරුවන් රැසක් ජීවත් වූ සහ අදටත් ජීවත් වෙන කලාකරුවන්ගේ තෝතැන්නක් තමයි මාලිගාවත්ත මහල් නිවාස සංකීර්ණය. එවැනි කලා පුරයකට පිවිසෙන මාවත ජෝතිගේ නමින් නම් කිරීම ඇත්තටම කොයි තරම් නම් සාධාරණද? රටක් පිනවූ, රටක් ආදරය කළ ජෝතිපාලයන්ගේ සුන්දර මතක කැටිවූ ඔහුගේ පුංචි නිවහනෙන් අපි සමුගෙන යන්නේ ජෝතිපාලයන් ගැන මෙතෙක් නොතිබුණු ආදරණීය ළෙන්ගතුකමකින් හදවත පුරවාගෙනයි.
චානක ලියනගේ
(Kalum D Rajapaksha ෆේස්බුක් වෙත ඉදිරිපත් කර තිබූ වීඩියෝවක් ඇසුරිනි)
