ශ්රී ලංකාව තුළ ව්යාජ මුදල් නෝට්ටු පැටව් ගසමින් හැංගිමුත්තමේ යෙදුණු ජාවාරම්කරුවන් එළියට ගෙන අත්විලංගු දැමූ දක්ෂ රහස් පොලිස් නිලධාරීන් පිරිසක් සිටි යුගයක් තිබිණි. ඒ රහස් පරීක්ෂණ භූමිකාවට අත තිබ්බේ 1978න් පසුව බව මගේ මතකයේ රැඳී පවතී. ඒවා ව්යාප්ත නොවීමට රහස් පොලිස් මාර්ග බාධක දැමූ ඒ දක්ෂ පොලිස් නිලධාරීන් පිරිස අතරේ නමක් තබා සිටි නියෝජ්ය පොලිස්පතිවරයකු වූයේ ප්රතාපසිංහය. එම යුගයේ රටේ ආන්දෝලනයකට තුඩුදුන් නැක්සලයිට් කුමන්ත්රණය ගැන පරීක්ෂණ මෙහෙයවූ අනෙක් නියෝජ්ය පොලිස්පතිවරයා වූයේ ටිරල් ගුණතිලකය. පසුකාලීනව නියෝජ්ය පොලිස්පතිවරුන් වන අමරසේන රාජපක්ෂ, ඉන්ද්රා ද සිල්වාද රහස් පොලිසියේ කැපීපෙනුණු දක්ෂ චරිත බවට පත්ව සිටි නිලධාරීන් යැයි කීම අතිශයෝක්තියක් නොවේ. මේ සියලු දෙනාම මාධ්යවේදීන්ගේ මිතුරන් වී සිටියේය. අද මෙන් නොව එදා රහස් පොලිසියේ හතර වැනි තට්ටුව හයවැනි තට්ටුවලින් ඇසුණු හෙළි නොවූ රහස් සොයන්නට මා මෙන්ම ඇතැම් මාධ්යවේදීන්ට හතරවැනි තට්ටුවේ නියෝජ්ය පොලිස්පතිවරුන් සිටින කාමරවලට යෑමට තහංචි පනවා නොතිබිණි. Sri Lanka Latest News
ටිරල් ගුණතිලක කිසි දිනෙක රහසක් එළියට දීමෙන් වැළකී රට තොට පැතිර යන ආරංචි දැනගැනීමට අප සමග කතාබහ කළේද හරස් ප්රශ්න අසන විලාසයකිනි. එය අපට හුරුපුරුදු දෙයකි. එහෙත් ඒ හරස් ප්රශ්න තුළින් ඔහු පවසන දේවලින් ඔහුටත් හොරා රහස් පිටවිණි. ඒවා ප්රවෘත්ති බවට දිගහැරීමට අපට හැකි වූ අවස්ථා තිබිණි. අද මාධ්යයට මාධ්ය ප්රකාශකවරයකු සිටියද උසස් පොලිස් නිලධාරීන් ඇමතීමට මාධ්යයට බාධාවක් නැති තරම්ය. මා මෙහි සඳහන් කළ නියෝජ්ය පොලිස්පති ප්රතාපසිංහ මහතා බස්නාහිර පළාත භාරව සිටියදී මා විසින් ඔහුට දැන්වූ පරීක්ෂණයක් සාර්ථකව නිමකළ සිද්ධි සමුදායක අතීත මතක සටහනක් දිගහැරීමට මා මේ ලිපිය උපයෝගී කර ගනිමි.
මා සිරස මාධ්ය ජාලයේ සිටියදී හඳුනාගත් මාධ්යවේදියකු පසු කලෙක සිරසෙන් ඉවත්වී තවත් මාධ්ය ආයතනයක උසස් තනතුරකට පත්ව ගියේය. ඔහු විවාහ වී සිටියේ මහනුවර ප්රදේශයේ තරුණියක් සමගය. ඇයත් රජයේ රැකියාවක නියුතුව සිටියාය. ඒ දෙපළට පසුකාලීනව ලැබුණු පිරිමි දරුවාට අවුරුදු 05ක් සපිරිණි. කොළඹ රැකියාව කළ ඔවුන් දෙදෙනා කැලණිය ප්රදේශයේ නිවෙසක් කුලියට ගෙන එහි පදිංචියට පැමිණි අතර, දරුවා රැකබලා ගැනීමට සේවිකාවක ද යොදවා ගත්හ. මේ අවදිය වනවිට ඇතැම් මාධ්ය ආයතනවලට දේශපාලන හෙංචයියන්ගෙන් විටින් විට තර්ජන එල්ල වෙමින් තිබුණි. මාධ්යවේදියකුට තර්ජනයක් සිදුවුවත් එය බැර වන්නේ දේශපාලනඥයකුටය. දිනක් මා සිරස මාධ්ය ජාලයේ සිටියදී මගේ මාධ්ය හිතවතාගේ නිවසට මහ දවල් ඇතුළු වූ පුද්ගලයකු එම නිවෙසේ තිබූ ලියකියවිලි තොගයක් සාලය මැද ගිනිතබා, මෙහෙකාරියටද අතවර කර නිවෙසේ රන් භාණ්ඩ කොල්ලකා, කුඩා දරුවාටද තුවාල සිදුකර පලාගිය සිද්ධියක් මට ආරංචි විය. මාධ්ය හිතවතාද මා හට ඒ බව දැන්වූයේ මා පොලිසිය සමග දැඩි සම්බන්ධයක් ඇති නිසාය. මා එම මොහොතේම නියෝජ්ය පොලිස්පති ප්රතාපසිංහට දුරකතනයෙන් එම සිද්ධිය දැනුම් දුන්නෙමි. ඔහු ඒ මොහොතේම එම නිවසට පොලිස් කණ්ඩායමක් පිටත්කර යවා මා හට නැවත දුරකතනයෙන් දැනුම් දුන්නේ මේ දිනවල මාධ්යයට දේශපාලන කෙනෙහිළිකම් සිදුවන නිසා මේ ගැන පරීක්ෂණ කිරීමට තමා පෞද්ගලිකවම අදාළ නිවසට යන බවයි.
මෙවැනි සිද්ධියකදී නියෝජ්ය පොලිස්පතිවරයකුගේ විශේෂ අවධානය යොමුවන්නේ කලාතුරකිනි. එහෙත් මෙහිදී ප්රතාපසිංහ මහතා සිද්ධිය දැනගත් විගස නිල වාහනයෙන් මාධ්ය හිතවතාගේ නිවසට යෑමට නිහතමානී වීම ගැන මගේ මාධ්ය හිතවතාද සතුටට පත්ව සිටියේය. නියෝජ්ය පොලිස්පතිවරයා නිවසට ගිය සැණින් නිවසේ පිටුපස දොර කඩා ඇති බව පැවසූ ස්ථානය මුලින්ම පරීක්ෂා කළේය. එහිදී දොරේ අගුලක්වත් කැඩීගොස් නොමැති බව දැකගන්නට ලැබිණි. නිවසට ඇතුළු වූ පුද්ගලයාගෙන් අතවරයට පත්ව ඇතැයි කියමින් විලාප දෙමින් සිටි මෙහෙකාරිය ඒ වනවිටත් ත්රිරෝද රථයකින් රෝහලට පිටත් කර යවා තිබිණි. නියෝජ්ය පොලිස්පතිවරයා නිවස පරීක්ෂා කරද්දී සාලය මැද කඩදාසි ගොඩක් ගිනිගෙන පිලිස්සී ඇති ආකාරයද දිස්විණි. ගෙට ඇතුළු වූ සැකකරුගෙන් කිසියම් ආකාරයේ තුවාල සිදුකර ඇති අවුරුදු 05 දරුවාද ඒ වනවිට ළමා රෝහලට ගෙන ගොසින්ය. අතවරයට ලක්වූ බව පවසා රෝහලට ගෙනගිය මෙහෙකාරිය වෛද්ය පරීක්ෂණයකට භාජනය කළ විට ඇයට ශාරීරික හානියක් සිදුව නොමැති බව හෙළිවිය.
ඊළඟට නියෝජ්ය පොලිස්පතිවරයාගේ අවධානයට යොමු වූයේ කිසිවකු ඇයට අතවරයක් සිදුකළේ නම් ඇය ඇඳ සිටි ඇඳුම් පරීක්ෂා කිරීමය. එසේ බලහත්කාරකමක් සිදුවිණි නම් ඇගේ තිසරපටයට හානි වීමට ඉඩ තිබුණු බව වටහාගත් ප්රතාපසිංහ ඒ ගැනද පරීක්ෂා කර බැලීය. තිසරපටයෙහි ගාංචුවක් බිඳී නොතිබිණි. ඒ අවස්ථාවේ ඔහුට සැකසංකා කීපයක්ද ඇතිවී තිබිණි. නිවසේ පරිසරය ගැන මූලික පරීක්ෂණවල යෙදුණු ප්රතාපසිංහ ආපසු කාර්යාලයට ආවේ මෙහෙකාරිය රෝහලට ගෙනගිය ත්රිරෝද රථයේ රියැදුරු පොලිසියට ගෙන එන ලෙස එහි සිටි පරීක්ෂණ නිලධාරීන්ට නියෝගයක් ලබාදීමෙන් පසුවය. ආපසු කාර්යාලයට පැමිණි නියෝජ්ය පොලිස්පතිවරයාට ඒ වනවිට සිද්ධියට අදාළ සැකකටයුතු තොරතුරු රැසක් ලැබී තිබිණි.
පැය කීපයක් තුළ මෙහෙකාරිය රෝහලට රැගෙන ගිය ත්රිරෝද රථ රියැදුරු පොලිසිය විසින් නියෝජ්ය පොලිස්පති කාර්යාලයට කැඳවාගෙන ආවේය. ප්රතාපසිංහ ඔහුගෙන් ඒ පිළිබඳ ප්රශ්න කළේය. මෙහෙකාරිය රෝහලට ගෙන යෑමට ත්රිරෝද රථයට නංවද්දී අමාරුවෙන් කෙඳිරිගෑවාද යන්න ඔහුගේ පළමු ප්රශ්නය විය. එවිට ත්රිරෝද රථ රියැදුරු කීවේ ඇය නිවස පසුවන තුරු කෙඳිරි ගාමින් සිටියද නිවස පසුකර නොපෙනී යද්දී ත්රිරෝද රථයේ හොඳට නිදාගෙන කෙඳිරිල්ලක් නැතිව ගිය බවය.
ඉන් පසුව නියෝජ්ය පොලිස්පතිවරයා කාන්තා පොලිස් නිලධාරිනියන් දෙදෙනකු ගෙන්වා ඔවුන්ට නියෝග කළේ සිද්ධියට මැදිවූවා යැයි කියන රෝහල වෙත ගොස් බාහිර පරීක්ෂණයකට භාජනය කර ආපසු එවන ලද මෙහෙකාරිය වහාම අත්අඩංගුවට ගෙන තම කාර්යාලයට රැගෙන එන ලෙසයි. කාන්තා පොලිස් නිලධාරිනියන්ගේ ස්ථානාධිපතිවරිය ලෙස සිටි දේහධාරී පොලිස් පරීක්ෂකවරියද නියෝජ්ය පොලිස්පති කාර්යාලයට කැඳවා ඇයට රහසිගතව නියෝගයක් ලබාදී තිබිණි. පැය කීපයකින් සැකකටයුතු මෙහෙකාරිය නියෝජ්ය පොලිස්පතිවර කාර්යාලයට රැගෙන ආවාය. ඉන් පසු ඇය සිය කාර්යාලයට කැඳවූ ප්රතාපසිංහ ඇයගෙන් සිද්ධිය ගැන ප්රශ්න කරන ලෙස පොලිස් පරීක්ෂකවරියට නියෝග කළේය. පොලිස් පරීක්ෂකවරියටද ඇය හැඬූ කඳුළෙන් දුක කියන්නට පටන් ගත්තාය. ඇය කිසි විටෙක බලාපොරොත්තු නොවන අන්දමේ කායික දඬුවමක් ක්රියාත්මක විය. නිමේෂයකින් පොලිස් පරීක්ෂකවරිය මෙහෙකාරිය ක්ෂණිකව ඔසවා උඩුකුරු යටිකුරු කර ආපසු බිම තැබුවේ ඇයට කිසිවක් හිතාගන්නටවත් බැරි අන්දමටය. එම සිද්ධියෙන් බියට පත් මෙහෙකාරිය නියෝජ්ය පොලිස්පතිවරයා ඉදිරියේ සත්යය වමාරන්නට වූවාය. මෙය ඇය නිර්මාණය කළ දෙයක් බව ඇය හෙළිකර සිටියාය. නිවසින් සොරාගත් රත්රන් බඩු මල් පෝච්චියක් යට සැඟවූ ආකාරයත්, සාලයේ තිබූ ලිපිද්රව්ය ගිනිතබන ලද ගිනි පෙට්ටිය පවා සඟවා ඇති තැනත් හෙළිකළ ඇය පුංචි දරුවාට තුවාල සිදුකිරීමට ඇයගේ මනස විකෘති වී තිබූ අන්දම ගැනත් සියලු තොරතුරු හෙළිකර සිටියාය.
දේශපාලන පලිගැනීමකට බැර කිරීමට මෙහෙකාරිය සැලසුම් කර තිබූ එම සිද්ධියේ ඉදිරි පරීක්ෂණ පොලිස් කණ්ඩායමට භාර කළ නියෝජ්ය පොලිස්පතිවරයා ඒ පිළිබඳ සියලු විස්තර දුරකතනයෙන් මට දන්වා සිටියේය. මගේ ඉල්ලීම මත පෞද්ගලිකවම එම නිවසට ගොස් පරීක්ෂා කර සත්ය සොයාගත් නියෝජ්ය පොලිස්පතිවරයා, එම සිද්ධියෙන් පසු මාධ්යයට පවසා සිටියේ නිවසක සේවයට මහෙකාරියක් යොදවා ගැනීමට පෙර පොලිස් වාර්තා මෙන්ම ග්රාම නිලධාරී වාර්තා ලබාගැනීම අදාළ නිවෙස් හිමියන්ගේ ආරක්ෂාවට ඉතා වැදගත් බවයි. කෙසේ වෙතත් මෙම සිද්ධිය ගැන පරීක්ෂණ නියෝජ්ය පොලිස්පති ප්රතාපසිංහ මහතා අතට නොගියේ නම් එම සිද්ධියද දේශපාලනීකරණය වීමට ඉඩ තිබුණු බව කාගේත් කතාබහට ලක්ව තිබිණි.
ප්රේමලාල් විජේරත්න
