පනස් වසරකට අධික කාලයක් තිස්සේ, එනම් 1975 වසරේ සිට පෑන් තුඩ සමග සක්මන් කරන මාධ්ය ජීවිතයේ මිල මුදලට වඩා මිනිසුන් උපයා ගැනීමෙන් ලැබූ අත්දැකීම් ජීවිත කාලය පුරාම ගෙන දෙන්නේ මහත් වූ ආත්ම තෘප්තියකි. 1975 ‘ලංකාදීප’යෙන් ‘දවස’ටත්, දවසින් ‘සන්ඩේ ලීඩර්’ පුවත්පතටත් එහි සිට ‘සිරස’ මාධ්ය ජාලයටත්, ඉන් පසුව ‘මව්බිම’ටත්, මව්බිමෙන් ‘ජනයුගය’ටත්, එහි සිට ‘මව්රට’ටත් පැමිණ මේ වනවිට මා ලබන මාධ්ය වින්දනය ගැන සිතන විට මා උපයාගත් ආරක්ෂක ප්රධානීන්ගේ නාමාවලිය මතකයේ රඳවා ගැනීමටත් අසීරුය. එම පිරිස අතර අදටත් ජීවතුන් අතර සිටින පිරිස තුළ මතකයේ රැඳී පවත්නා නම් අතරට මමද එක්ව තිබීම ගැන සැඳෑ සමයේ සිටින මා අපමණ වින්දනයක් ලබන්නෙමි. Sri Lanka Latest News
වසර තුනක කාලයක් ‘සන්ඩේ ලීඩර්’ කර්තෘ ලසන්ත වික්රමතුංග සමග ගතකළ කාලය තුළදී එම පුවත්පතේ සිටි සම කර්තෘවරයකු වන ටිරෝන් ඩිවෝටා එවක ‘දවස’ නිවසින් ප්රකාශිත ‘සන්’ පුවත්පතෙහි සිටි පැරැණිම මාධ්ය හිතවතෙකි. ඔහු ‘සන්ඩේ ලීඩර්’ පුවත්පතින් බැහැරවී සිරස මාධ්ය ජාලයේ ප්රවෘත්ති අධ්යක්ෂවරයා ලෙස ගියේ මාවත් ඇදගෙනය. ඒ, 1998 වසරේදීය. එම වසරේ සිරස රූපවාහිනියේ දිනපතා කර්තෘවරයකු වශයෙන් සිට පසුව මා සිරස ගුවන්විදුලියේ ප්රවෘත්ති අංශයේ ප්රධාන ප්රවෘත්ති සංස්කාරක තනතුරේ තැබුවේ ටිරෝන්ය. එම තනතුරේ සිටියදී සිරස ගුවන්විදුලියේ උදෑසන 7.00ටත්, දහවල් 12.30ටත් සවස 6.30ටත් විකාශය වූ ප්රවෘත්ති සම්පාදනයේ වගකීම පැවැරුණේ මා හටය. මා යටතේ තවත් සංස්කාරකවරුන් සිවුදෙනකු විය.
එවක පැවැති රජයන්ටද ඇත්ත කතාකරන්නට ගොස් ඇතැම් දේශපාලනඥයන්ට පහර වැදෙන විට රහස් පොලිසියට යෑමට සිදුවූ අවස්ථාද තිබිණි. ප්රවෘත්ති සොයාගැනීමට ආගිය තැනක් නිසා රහස් පොලිසිය අපට බියවිය යුතු තැනක් නොවීය. ටිරෝන්ද රහස් පොලිසියේ ප්රශ්නකිරීම්වලට යොමුවූ අවස්ථාවක් තිබිණි. එහෙත් සත්ය කෙදිනක හෝ ජයගැනීමේ න්යාය තුළ අපි නිතරම සත්යය වෙනුවෙන් සිටගතිමු.
මේ අවධිය උතුරේ ත්රස්තවාදී ගැටුම්ද උග්ර අතට හැරී තිබුණු කාලසීමාවකි. මෙම කාලසීමාවේදී මා අනුරාධපුර නියෝජනය කළ දේශපාලනඥයකු ළඟින් ඇසුරු කළෙමි. ඔහු ඒ වනවිට මධ්යම පළාතේ කෘෂිකර්ම ඇමැතිය. නම එස්.එම්. චන්ද්රසේනය. පසුකාලීනව ඔහු පාර්ලිමේන්තු මන්ත්රීවරයෙක්ව ඇමැති තනතුරක්ද ලබාගෙන තිබිණි. මා ඔහු සමග සමීපව සිටියදී දිනක් ඔහුගෙන් මා වෙත ආරාධනාවක් ලැබිණි. ඒ, අනුරාධපුර ජයශ්රීමහා බෝධීන්වහන්සේ වැඳපුදා ගැනීමටය. ඒ සඳහා ඔහු එවක අටමස්ථානාධිපතිව වැඩසිට අපවත් වූ අතිපූජ්ය සිරිනිවාස හිමියන්ගෙන්ද අවසර ලබාගෙන තිබිණි.
ත්රස්තවාදීන් හා ආරක්ෂක හමුදා අතර විටින් විට සටන් විරාම පැවැතුණද ඒවා අතරමග බිඳවැටිණි. ඒ වනවිට අනුරාධපුර නගරයේ සිට ජයශ්රීමහා බෝධීන් වහන්සේ පිහිටි ස්ථානය දක්වා දිවෙන සිංහ කුලුන සහිත මාර්ගයේ දෙපස විදුලි පහන් කණුවල විදුලි ආලෝකය බිඳවැටී තිබුණු වකවානුවකි. කේබල් දෝෂයක් මත ක්රියා විරහිතව ගිය විදුලි ආලෝකය නොමැති වීම නිසා ජයශ්රීමහා බෝධිය අවට ප්රදේශය ඇඳුරේ පැවැතිණි. එවැනි අවස්ථාවක මා ඇමැතිවරයා සමග ජයශ්රීමහා බෝධිය වැඳපුදා ගැනීමට ඉහළ මළුවට ගියේද අටමස්ථානාධිපති නාහිමියන්ද කැටුවය. එවැනි අවස්ථාවක සිංහ කුලුන මාර්ගය අඳුරේ පැවැතීම ශ්රීමහා බෝධීන් වහන්සේටද අනතුරුදායක බව එම මාර්ගය ගැන දන්නා සෑම දෙනාටම පැහැදිලි වූ දර්ශනයක් විය. එම මාර්ගයේ විදුලි පහන් කණු අතරට අලුතෙන් කේබල් ඇතිරීමට ඒ වනවිට රුපියල් ලක්ෂ 37ක මුදලක් අවශ්ය බව ඉංජිනේරුවරුන් ඇස්තමේන්තු කර තිබුණද එය ක්රියාවට නැංවීමට එවක පැවැති රජයේ උනන්දුවක් නොවීය. එම නිසා අදාළ ලිපිගොනු කොළඹටත්, යළි අනුරාධපුරයටත් හුවමාරු වෙමින් තිබුණා විනා එම කටයුත්ත ඉටු නොවීය.
මමත්, ඇමැතිවරයාත්, අටමස්ථානාධිපති හිමියනුත් ගොස් ජයශ්රීමහා බෝධිය වැඳපුදාගත් අවස්ථාවේ හඬ අවදි කළ ඇමැතිවරයා නායක හිමියන්ට පවසා සිටියේ සිංහ කුලුන මාර්ගය අඳුරේ පැවැතීම ගැන මා හට විස්තර කිරීම සුදුසු බවයි. ඒ පිළිබඳ අටමස්ථානාධිපති නාහිමියන් පැවැසුවේ ශ්රීමහා බෝධිය වැඳපුදාගෙන යෑමට පැමිණෙන රජයේ ඉහළම බලවතාගේ සිට පහළම පුද්ගලයා දක්වා මේ ප්රශ්නය අසා දැනගෙන පොරොන්දු දී ගියත් මෙතෙක් එය ඉටුකර දීමට පියවර නොගත් බවයි. එයින් නාහිමියන් මටද කියාපෑවේ මේ සම්බන්ධයෙන් මා දැනුවත් කළද ප්රතිඵලයක් නොලැබෙනු ඇති බවයි. එවිට මා උන්වහන්සේට මෙසේ සඳහන් කළෙමි.
‘අපේ නායක හාමුදුරුවනේ, මේ ප්රශ්නය මට සිරස ගුවන්විදුලියේ ප්රවෘත්තිවලින් ප්රචාරය කරන්න පුළුවන්….’
එහි අවසන් ප්රතිඵලය ලැබුණු විට එය සිරස නිසා ලැබූ ජයග්රහණයක් ලෙස ප්රසිද්ධියේ පැවැසීමට කරුණික වන ලෙසද මම උන්වහන්සේගෙන් ඉල්ලීමක් කළෙමි. ඒ අනුව කටයුතු කරන්නට නායක හිමියන් මට පොරොන්දු වූයේද ජයශ්රීමහා බෝධීන්වහන්සේ අබියසදීමය.
මා අනුරාධපුරයේ සිට පැමිණි දෙවැනි දවසේ දහවල 12.30 ප්රවෘත්ති විකාශයට එම ගැටලුව සම්බන්ධයෙන් පුවතක් ඇතුළත් කළෙමි. සිංහ කුලුන මාර්ගය අඳුරේ පැවැතීම ශ්රීමහා බෝධියට අනතුරුදායක බව නාහිමියන් පවසන බවත්, එම මාර්ගය ආලෝකවත් කිරීමට රජයේ ඉහළම බලවතාගේ සිට බොහෝ දෙනකු පොරොන්දු ලබාදී තිබුණත් තවමත් එම පොරොන්දු ඉටුවී නොමැති බවත් උන්වහන්සේ සඳහන් කරන බවත් එම ප්රවෘත්තියෙන් කියැවිණි. එම පුවත සිරස ගුවන්විදුලිය ඔස්සේ ප්රචාරය වීමත් සමග රජයේ ඉහළම තැන සිට විදුලිබල අමාත්යවරයා දක්වා වූ පිරිස්වල විශේෂ අවධානයට එය ලක්විය. ඒ අනුව විදුලිබල ඇමැති අනුරුද්ධ රත්වත්තේ විසින් පත්කළ කමිටුව එදිනම අනුරාධපුරයට ගොස් කේබල් එළීම කඩිනම් කළේය. ඒ සඳහා යන වියදම යළි තක්සේරු කර වසර තුනක් තිස්සේ පමාවූ වැඩ යළි ඇරැඹිණි. එම කමිටුවේ සිටි මොනරාගල ප්රදේශයේ දේශපාලනඥයකු මෙන්ම විදුලිබල ක්රියාකාරී අධ්යක්ෂවරයා මගේ හිතවතෙකි. ඔහු, අදාළ කමිටුව මෙම කේබල් එළීම සම්බන්ධයෙන් ගන්නා අලුත් තීරණ ගැන විටින් විට මා දැනුවත් කළේය. ඒ ගැනද මා අවස්ථා කිහිපයකදී සිරස ගුවන් විදුලියේ ප්රවෘත්ති විකාශයට ඇතුළත් කළෙමි. ඒ අනුව වැඩ කඩිනම් වී එම වසරේ වෙසක් පොහොයට පෙර සිංහ කුලුන මාර්ගයට විදුලි ආලෝකය ලබාදීමේ ව්යාපෘතිය විවෘත කිරීමට දින නියම විය.
මේ අතර, අනුරාධපුර ප්රදේශය නියෝජනය කළ තවත් ප්රබල දේශපාලනඥයකු රජයේ විද්යුත් මාධ්යයක් සමග එකතු වී මෙය ඔවුන්ගේ බලපෑම මත කඩිනම් වූ ව්යාපෘතියක් බවට පවසමින් විදුලිය විවෘත කිරීමේ උත්සවය සංවිධාන කරන්නට විය. එය දැනගත් විගස මා අටමස්ථානාධිපති නාහිමියන්ට ඒ ගැන පැවැසුවෙමි. එවිට නාහිමියන් පැවැසුවේ, ‘මගේ තැන සිදුකරන දේ මටත් අයිති දෙයක්. එදාට වෙන දේ බලාගන්න…’ යනුවෙනි.
ඒ අනුව, විවෘත කිරීම පැවැති දින සිංහ කුලුන මාර්ගය විදුලි ආලෝකයෙන් බබළවන්නට දායක වූයේ වෙන කවුරුවත් නොව සිරස මාධ්ය ජාලය බව නාහිමියන් ප්රසිද්ධියේ ප්රකාශ කිරීම හේතුවෙන් උරණ වූ අදාළ දේශපාලනඥයා විදුලිය විවෘත කිරීම සිදුකොට ශ්රීමහා බෝධීන්වහන්සේ වැඳපුදාගැනීමෙන් තොරවම ආපසු පිටව ගියේය. එම උත්සවයට මටද ආරාධනා ලැබී තිබුණද මම නාහිමියන්ට පවසා සිටියේ විදුලිය විවෘත කිරීමේ උත්සවයට මා සහභාගි නොවන බවත්, මා එදා ශ්රීමහා බෝධීන් වහන්සේට භාරවූ අන්දමට, එම භාරය ඔප්පු කිරීමට අටමස්ථානාධිපති නාහිමියන් වැඩසිටින විහාරයට එදින රාත්රී 10ට පැමිණෙන බවත්ය. ඒ අනුව මමත් මගේ බිරියත් රාත්රී 10ට නාහිමියන් හමුවීමට ගිය අවස්ථාවේ, විදුලි ආලෝකය විවෘත කර පිට පාරේම ගිය දේශපාලනඥයාට සූදානම් කර තිබූ මල්වලින් පිරීගිය රිදී බන්දේසිය උන්වහන්සේ මා අත තැබුවේ උන්වහන්සේ සමගම උඩ මළුවට ගොස් භාරය ඔප්පු කිරීමටය.
සිංහ කුලුන මාර්ගය ශ්රීමහා බෝධීන්වහන්සේ දක්වා වූ මාර්ගය යළි එළිය වැටුණේ සිරස ගුවන්විදුලියේ ප්රවෘත්ති අංශයෙන් ලබාදුන් ප්රචාරය නිසා බවත්, එහි ප්රමුඛ කාර්යභාරයක් ඉටුකළේ මා බවත් සඳහන් කළ පුණ්යානුමෝදනා ලිපියක් එවක අටමස්ථානාධිපති නාහිමියන් විසින් පසු දිනෙක සිරසට එවා තිබිණි. එම ලිපියේ මෙසේ සටහන් කර තිබිණි.
2001.05.21
පුණ්යානුමෝදනාවයි…
අනුරාධපුර ජයශ්රී මහා බෝධීන්වහන්සේ වෙත පිවිසෙන ප්රධාන මාර්ගය වසර තුනක පමණ කාලයක සිට අඳුරේ තිබීමත්, වගකිවයුත්තන්ට හා අදාළ අංශ බලධාරීන්ට කොතෙක් කරුණු කීවත් ඵලක් නොවී තිබුණු මොහොතක සිරස මාධ්ය ආයතනය දායක වීම නිසා ඉතා ඉක්මනින් වෙසක් පෝයට පෙර එම කටයුත්ත කරවා ගැනීමට හැකිවීම ගැන ඔබතුමාටත්, සිරස මාධ්ය ආයතනයටත් මගේ පුණ්යානුමෝදනාපූර්වක ස්තුතිය මෙයින් පිරිනමමි.
විශේෂයෙන්ම මෙහිදී සිරස ප්රධාන ප්රවෘත්ති කර්තෘ ප්රේමලාල් විජේරත්න මහතා විසින් බලධාරීන්ට නිතර නිතර අවදි කරවීම නිසාම ප්රතිඵල ඉක්මනින් ලබාගැනීමට හැකි වූ බවද සඳහන් කරනු කැමැත්තෙමි.
ඔබ සැමට උතුම් වූ ජයශ්රී මහා බෝ සමිඳු පිහිටයි…
මෙයට අනුරාධපුර අටමස්ථානාධිපති නායක ස්ථවිර
විදුලිය විවෘත කිරීමේ උත්සවයේදීද ඒ පිළිබඳ අටමස්ථානාධිපති නාහිමියන් සත්යය ප්රකාශ කිරීමට නිර්ලෝභී වූ අන්දම ගැන සිතන විට අදටත් මා හට දැනෙන්නේ අඳුරේ තිබූ ජයශ්රීමහා බෝධීන් වහන්සේ වැඩසිටින ප්රදේශයට ආලෝකය ලබාදී මා සිදුකරගත් මාහැඟි පින්කම පිළිබඳ නිරාමිස සතුටකි.
ප්රේමලාල් විජේරත්න
