ශ්රී ලංකාව නියෝජනය කරන විදේශ තානාපති සේවයේ විවිධ තනතුරු සඳහා ජනතා විමුක්ති පෙරමුණට සම්බන්ධ පුද්ගලයන් ආණ්ඩුව විසින් පත්කරමින් සිටින බව යූටියුබ් ක්රියාකරු කැලුම් ජයසුමන මහතා චෝදනා කරනවා. ඒ සම්බන්ධයෙන් සිය යූටියුබ් නාලිකාව වෙත වීඩියෝවක් එක්කරමින් ඔහු දැක්වූ අදහස් පහත පළවේ.Sri Lanka Latest News
පහුගිය ආණ්ඩු කාලේ තානාපති තනතුරුවලට පත්කරන අය සම්බන්ධයෙන් මොන තරම් අපහාසාත්මක කතා ඒ කාලේ ජනතා විමුක්ති පෙරමුණේ අය කිව්වද කියලා අපිට මතකයි. මාලිමාවේ නායකයෝ, ඔවුන්ගේ ගෝලයෝ, යූටියුබ්වල, සමාජ මාධ්යවල, ෆේස්බුක්වල පුදුම විදියට ඒවා විවේචනය කළා. එහෙම විවේචනය කරපු මාලිමා ආණ්ඩුව දැන් මොකක්ද කරමින් ඉන්නේ? විදේශ රටවල තියෙන තානාපති කාර්යාල, විදේශ සේවා කටයුතුවලට ඒ සඳහා සුදුසුකම් ලත්, ඒ සඳහා පළපුරුද්ද තියෙන, ඒ සඳහාම පුරුදු පුහුණු කරපු පිරිස් ඉවත් කරලා අද මාලිමාවේ, ජනතා විමුක්ති පෙරමුණේ පිරිස් ඒ තනතුරුවලට පත්කරමින් ඉන්නවා. කාර්යාල කාර්ය සහායකලා හැටියට හිටපු කාර්යාල අතුගාපු කට්ටිය විදේශ සේවාවල ඉහළ පුටුවලට පත්කරමින් ඉන්නවා. සුදුසුකම් තියෙන මිනිස්සු ටික එළවලා දාලා. දැන් මේ පාලනය කොහෙටද යන්නේ? මොකද අපි දැක්කා ඉතිහාසය පුරාම ඔවුන් කතාකළේ යහපාලනය ගැන. ඔවුන් කතා කළේ රටේ සිදුවිය යුතු වෙනස්කම් ගැන. ඔවුන් වඩාත් පවිත්ර පිරිසිදු පාලනයක් වෙනුවෙන් තමයි පෙනී සිටියේ. හැබැයි දැන් අද ඔවුන් මේ යමින් ඉන්නේ කොයි අතකටද?
එක පැත්තකින් රටේ ජනතාවගේ එදිනෙදා ප්රශ්නවලට එදිනෙදා ගැටලුවලට රටේ ප්රධානම ප්රශ්නවලට කිසිදු පිළිතුරක් හොයාගන්න බැරි පාලකයෝ අද විදේශ සේවාවල තානාපති කාර්යාලවලටත් තමන්ගේ හිතවතුන් පත්කරමින් ඉන්නවා. ඒ එක පැත්තක්. අනෙක් පැත්තෙන් ගත්තාම රට ඇතුළේ ආපු ගමන් සමහර පත්කිරීම් මාලිමාවට සම්බන්ධ යම් කිසි උගත්කමක් තියෙන ඒ තනතුරුවලට සුදුසු පිරිසක් මුල් අවස්ථාවේදී පත්කළත්, ඔවුන්ව ඉවත් කරමින් ඒ වෙනුවට මේ වෙනකොට තමන්ගේ හෙංචයියලා පත්කරමින් ඉන්නවා. මේගොල්ලෝ මොකක්ද මේ කරමින් ඉන්නේ? අපි ඒක තේරුම් ගන්න ඕනේ. එතකොට ඔවුන් මේ කරන දේ සහ බිමල් රත්නායකලා කියන දේ එකට එකතු කරලා අපිට බලන්න සිද්ධ වෙනවා මේ රට කොයි අතටද යන්නේ කියන එක. ඒකෙදී බිමල් රත්නායක පැහැදිලිවම කියනවා අපිට ආණ්ඩු බලය ලැබුණා, පාර්ලිමේන්තු බලය ලැබුණා, විධායක බලය ලැබුණා, නමුත් අපිට රාජ්ය බලය ලැබුණේ නෑ කියලා. මේගොල්ලෝ රාජ්ය බලය කියලා විශ්වාස කරන්නේ මොකක්ද? රාජ්ය බලය කියලා මේගොල්ලෝ විශ්වාස කරන්නේ මේ රාජ්ය සේවය, රාජ්ය යාන්ත්රණයේ ඉන්න පිරිස කොහොමටත් කොයි ආණ්ඩුව ආවත්, ආණ්ඩු බලය වෙනස් වුණත් රාජ්ය සේවකයෝ රාජ්ය යාන්ත්රණය ක්රියාත්මක වෙන එක ක්රමයක් තියෙනවා. අද සිද්ධ වෙමින් තියෙන්නේ එක පැත්තකින් නීතිපති දෙපාර්තමේන්තුවට නීතිපතිවරයාට එක පැත්තකින් ප්රහාරය එල්ල කරනවා. අනිත් පැත්තෙන් රටේ ප්රධාන මර්මස්ථානවලට, ආයතනවලට ජනතා විමුක්ති පෙරමුණේ කාඩර් එක අනුයුක්ත කරමින් ඉන්නවා. ඒ වගේම විදේශ සේවයට, තානාපති කාර්යාලවලට ජනතා විමුක්ති පෙරමුණේ කාඩර් එක පත්කරමින් ඉන්නවා. දැන් මේ රටට වෙන්න යන්නේ මොකක්ද? පැහැදිලිවම ඒ ඒ ක්ෂේත්රවල, ඒ ඒ හැකියාව තියෙන මිනිස්සු පත් නොකර, ඒවා කඩාගෙන වැටුණට පස්සේ ඒවා නැවත ගොඩනගන්න කොයි තරම් කාලයක් ගතවෙනවද? මොකද ආණ්ඩු වෙනස් වුණාට අපිට කිසිම ප්රශ්නයක් නෑ. ගෝඨාභය රාජපක්ෂ තුනෙන් දෙකක් අරගෙන ආණ්ඩු හැදුවට, ඒක ඉතාම පොඩි කාලයකින් සාමාන්ය තත්ත්වයට පත්වුණා. මොකද රාජ්ය යාන්ත්රණය ඉදිරියට යන්න අවශ්ය පිරිස ඒ රාජ්ය යාන්ත්රණය ඇතුළේ ඉන්න නිසා.
නමුත් මේ කරමින් ඉන්නේ මොකක්ද? මේ කරමින් ඉන්නේ සම්පූර්ණම රාජ්ය යාන්ත්රණය බිඳවැට්ටවීමේ මහා කුමන්ත්රණයක එක කොටසක්. මොකද රාජ්ය යාන්ත්රණය සෑම ක්ෂේත්රයකටම විහිදිච්ච එකක්. මොකද එහෙම විහිදිලා තියෙන නිසා තමයි යම් ආපදාවක් වෙච්ච වෙලාවක රාජ්ය යාන්ත්රණය හරහා ගිහිල්ලා තමයි රට පුරාම අපිට යම්කිසි මෙහෙයුමක් කරන්න පුළුවන්කම ලැබෙන්නේ. නමුත් අද මේගොල්ලෝ උත්සාහ කරනවා ජනතා විමුක්ති පෙරමුණේ බොල්ෂෙවික් පක්ෂයේ ක්රියාකාරී සාමාජිකයෝ ටික මේ තැන්වලට ස්ථානගත කරලා රාජ්ය යාන්ත්රණය පැහැර ගන්න. ඒක නිසා තමයි තමයි නීතිපතිවරයාට ගෙදර යන්න කියලා නොකියා කියන්නේ. මේ රාජ්ය යාන්ත්රණයේ ඉහළ ඉන්න පුටු ටික ඔක්කොම හිස් කරලා ජනතා විමුක්ති පෙරමුණේ බොල්ෂෙවික් පක්ෂයේ සාමාජිකයන්ගෙන් පුරවන්න උත්සාහ කිරීමක් තමයි මේ පේන්න තියෙන්නේ. ඔවුන් මේ යන ගමන ඉතාම බියකරු ඉරණමකට රට ගොදුරු කරන තත්ත්වයක්. මොකද මේකේ එක සීමාවක් පැන්නට පස්සේ මේ රටේ ජනතාව තවදුරටත් මේ දේවල් බලන්න සූදානම් වෙයි කියලා මම විශ්වාස කරන්නේ නෑ. කලින් හිටපු ධනේෂ්වර නායකයන්ටත් වඩා ඉතාම නරක විදියට තමයි මොවුන් බලය අයුතු ලෙස පාවිච්චි කරන බව පේන්න තියෙන්නේ. ඒ නිසා මේ රටේ ජනතාවගෙන් අපි ඉල්ලා සිටිනවා මේ පිළිබඳ ඉතා සංවේදී වෙන්න කියලා. මොකද මේක රටේ රාජ්ය යාන්ත්රණය විනාශ කිරීමේ කුමන්ත්රණයක්. ඒ සඳහා රටේ ජනතාව ඉඩ නොදිය යුතුයි කියන කාරණාව මතක් කරන්න කැමැතියි.
kelum jayasumana යූටියුබ් නාලිකාවෙනි
