ඔටිසම් රෝගයෙන් පෙළෙන 14 හැවිරිදි දරුවෙකුට පොලිස් නිලධාරින් පිරිසක් අමානුෂීය ලෙස පහර දීමේ සිදුවීමක් සම්බන්ධයෙන් විමර්ශන ආරම්භ කොට ඇති බව පොලිස් මාධ්ය ප්රකාශක කාර්යාලය සඳහන් කරයි.
ඉකුත් මැයි 25 වෙනිදා තාරික් අහමඩ් නැමැති මෙම ඔටිසම් රෝගයෙන් පෙළෙන දරුවා නිවෙස අසල වෙළඳසැලක් වෙත ගොස් ඇති අතර දර්ගා නගර්හි පිහිටි අඹගහ මංසන්ධිය අසල ස්ථාපිත පොලිස් මුරපොළේ රාජකාරියේ නියුතු නිලධාරින් පිරිසක් ඔහුව අල්ලා ගෙන අත් ගැට ගසා අමානුෂීය ලෙස පහර දෙන ආකාරය අසල තිබූ සීසීටීවී කැමරාවල සටහන්ව ඇත.
සිය දරුවාට පොලිස් නිලධාරින් විසින් පහර දෙන බවට දැන ගන්නට ලැබීමත් සමග දරුවාගේ පියා වන ඒ.එච්.එම්. වසීර් නමැත්තා එම ස්ථානයට ගොස් ඇති අතර ඒ යන විටත් දරුවාගේ අත් ගැට ගසා තිබු බවත්, ඔහුට දරුණු ලෙස පහරදී තිබු බවත් හෙතෙම සදහන් කර තිබේ.
මුලදී මෙම පැමිණිල්ල බාර ගැනීමට පොලිසිය කටයුතු කර නැතත් පසුව පහරදීම සම්බන්ධයෙන් ප්රදේශය භාර උසස් පොලිස් නිලධාරීන්ට ලිඛිතව සිදුකළ පැමිණිල්ලක් අනුව විමර්ශනයක් ආරම්භ කොට ඇත.
කෙසේවෙතත් මෙම වීඩියෝ පටය සමාජ මාධ්ය ජාලාවන්හි ප්රචාරය වීමත් සමග පාර්ශ්ව රැසක් පොලීසියේ එම පහරදීමට එරෙහිව සිය විරෝධය පළ කොට තිබේ.
හිටපු මන්ත්රී නාමල් රාජපක්ෂ මහතා ට්විටර් පණිවුඩයක් තබමින් සදහන් කොට ඇත්තේ තරික් අහමඩ් හට කළ මෙම අමානූෂීක පහරදීම තමන් තරයේ හෙළා දකින බවත්, සිදුකරන විමර්ශනයන්ට සම්පූර්ණ සහාය පළ කරන බවත්ය. එමෙන්ම කොරෝනා මර්දනයේදී විශාල මෙහෙයක් සිදු කළ පොලිසිය මෙවැනි සිදුවීමකට සම්බන්ධ වීම පිළීබදව කනගාටුව පළ කරන බවද රාජපක්ෂ මහතා සදහන් කොට ඇත.
මීට අමතරව ලෝක පූජිත ක්රිකට් ක්රීඩක කුමාර් සංගක්කාරද සිය ට්විටර් ගිණුමේ සටහනක් තබමින් මෙම පහරදීම හෙළා දැක ඇත. මේ සම්බන්ධයෙන් විමර්ශනයක් සිදු කළ යුතු බවත්, මෙවැනි අමානුෂික පහරදීම්වලට ඉඩ නොතැබිය යුතු බවත් සංගක්කාර ප්රකාශ කොට ඇත.
