දරුවෝ කියන්නේ මවුපියන්ගේ ජීවිතය වගේ. හැම දරුවෙක් ගැනම අම්මට, තාත්තට තියෙන්නේ ඒ වගේ හැඟීමක්. එහෙම නොවෙන අවස්ථාවක් ගැන අහන්න දකින්න ලැබෙන්නේ ඉතාම කලාතුරකින්. අම්මලා තාත්තලා හැම දෙයක්ම කරන්නේ කියන්නේ තමන්ගේ දරුවන්ගේ යහපත වෙනුවෙන්. (Sri Lanka Latest News)
මේ දිනවල පාසල් නිවාඩුව. ඒ හින්දා දරුවන් ගතකරන්නේ නිදහස් කාලයක් කිව්වොත් නැවැරැදියි. බොහෝ වැඩිහිටියන් තමන්ගේ දරුවන්ට පාසල් නිවාඩු කාලයේ නිදහසේ පාඩුවේ සෙල්ලම් කිරීමට ඉඩහැර තිබීම සාමාන්ය දෙයක්.
පසුගිය දිනක තංගල්ල කඳුරපොකුණ පාරේ තහංචිවැව ප්රදේශයේදී සිදුවෙන්නට ගිය මහා විනාශයක් වළක්වාගත් පුංචි පුතෙකුගේ වීර ක්රියාවක් ගැන අහන්නට ලැබුණා.
බොහෝ විට තමන්ගේ ඥාතීන් ජීවත් වන්නේද අසල්වාසී නිවෙස්වලයි. තම මවුපියන්ට හොර රහසේ එම ඥාති නිවෙස්වලට යාම බොහෝ පුංචි දරුවන්ගේ පුරුද්දක්. 10 හැවිරිදි කුඩා දියණියක්ද තම මවුපියන්ට හොර රහසේම නිවෙසින් පිටව අසල්වාසී ඥාති නිවෙසට පයින් ගමන් කරන්නට වුණා. ඇයට අනතුරක් වේවි කියා කිසිවකු තුළ කිසිදු සැකයක් බියක් ඇති නොවන්නට ඇත්තේ අසල්වාසීන් කෙරෙහි තිබූ විශ්වාසය නිසා වන්නට ඇති. නමුත් මවුපියන්ද තම දියණිය පිළිබඳ මීට වඩා අවධානයෙන් පසුවන්නට තිබුණු බව මේ කතාව අසන ඕනෑම අයකුගේ සිතට නැගෙන්නේ නිරායාසයෙන්මයි.
පසුගිය 17 වැනි දින මේ දියණිය අසල්වාසී ඥාති නිවසට ගමන් කරන්නට වුණේ තමාගේම වයසේ පසුවන තවත් මිතුරියක් එම නිවසේ වාසය කරන නිසයි. ඇය තම ගෙදර සිට ඥාති නිවසට ගමන් කළේ ඉතාම නිදහස් ලෙසයි. නමුත් මේ දැරිය පයින් ගමන්කරන බව දැනගත් පාපතර තරුණයෙක් මග බලමින් සිට තිබුණේ දැරියව තම ග්රහණයට ගැනීමේ අරමුණෙන්. මේ බව වෙනත් කිසිවකුත් දැනසිට තිබුණේ නැහැ. පුංචි දියණිය පැමිණි මග හරස් කළ මේ පාපතර තරුණයා දැරිය දෙසට එක්වරම කඩාවැදී ඇයව මාර්ගයෙන් ඉවතට රැගෙන යන්නට කටයුතු කළේ දැරිය විලාප නගද්දීයි. දැරියට විලාප නගනවා හැරෙන්නට කරන්නට වෙනත් දෙයක් ඉතිරිව තිබුණේ නැහැ. දැරිය ඔහුගෙන් මිදීමට උත්සාහ දැරුවත් ඔහුගෙන් මිදීමට ඇයට කිසිදු හැකියාවක් ලැබුණේ නැහැ. මේ සල්ලාල පාපතරයා දැරියව අපහරණයට ලක්කිරීමට සැරසෙනවාත් සමගම සිදුව තිබුණේ ඔහු නොසිතූ දෙයකි. දරුවෙකුට ඕනෑම කරදරයකදී මතක් වෙන්නේ වෙන කවුරුවත් නොව තමන්ට පණමෙන් ආදරය කරන අම්මාය. මේ දැරියත් ‘අම්මේ අම්මේ’ යනුවෙන් කෑමොරදී කෑ ගසන්නට වුණා. දැරියගේ එම කෑගැසීම කුරුඳුපොකුණ ගමේ 15 හැවිරිදි පුතෙකුට ඇසී තිබුණේ වෙළෙඳසලට යන අතරතුරදියි. ඒ අවස්ථාවේ ඔහු සමග ඔහුගේ මිතුරකුද සිට තිබුණා. ඔවුන් යන ගමන නවතා දැරිය කෑගසන හඬ නැගෙන ඉසව්ව ගැන විපරම් කරන්න වුණා.
ඒ අනුව මේ දරුවන් දෙදෙනාට දැකගන්නට ලැබුණු දෙයින් ඔවුන්ට ඇස් අදහා ගන්නට බැරිව ගියා. ඒ මොහොතේ අතට අසුවූ ගල් කැටයක්ද රැගෙන ඒ දෙසට දිවගිය ඔවුන්, ‘අත ඇරපිය ඔය නංගි’ කියා සල්ලාලයා මෙල්ල කරන්නට උත්සාහ දරා තිබුණා. නමුත් සල්ලාලයා ඒ ගැන කිසිදු තැකීමක් කර තිබුණේ නැහැ. එහෙත් දෑරිය බේරා ගැනීමේ වෑයම අත් නොහැරි දරුවන් දෙදෙනාගෙන් එක් අයකු සල්ලාලයාගේ ඇඟට කඩා පැන්නේ ජීවිත අවදානම ගැනවත් නොසිතමිනි. ඒ මොහොතේ සල්ලාලයා දැරිය එක් අතකින් අල්ලාගෙන ඇඟට කඩාපැන්න දරුවා ඉවතට තල්ලු කර තිබුණා. එහිදී මෙම දරුවා මීටර කිහිපයක් දුරට වීසිවී ගොස් ඇදවැටී තිබුණා. ඔහු කළුගල් කැට අහුරක් ගෙන පාපතරයා දෙසට දමාගැසුවත් එය ඔහුට නොවැදුණු තැන දෙවැනි වරද කළු ගලක් ගෙන පාපතරයාට දමාගැසීමට ඔහු කටයුතු කළා. එවිට එම ගල් පහර වැදීමත් සමගම දැරිය පාපතරයාගේ ග්රහණයෙන් මිදී පාර දිගේ දිවයන්නට වුණා. මේ අතර දැරිය බේරාගැනීමට පැමිණි දරුවන් දෙදෙනා පාපතරයා පසුපස පන්නමින් තවත් ගල් පහර කිහිපයක් ඔහු දෙසට එල්ල කර තිබුණා. සල්ලාලයා පලාගිය පසු දැරියව සිය නිවෙසට රැගෙන ගොස් මවුපියන්ට භාරදීමටද මේ පුංචි වීරයන් දෙදෙනා කටයුතු කර තිබුණා.
පාපතරයා සමග පොරබැදීම නිසා දැරියගේ මුහුණේ සීරීම් තුවාල කිහිපයක් සිදුව ඇති ආකාරයද පසුව දැකගන්නට ලැබුණා. දැරිය මේ අනතුරට මුහුණ පාන අවස්ථාවේ ඇගේ නිවෙසේ සිට ඇත්තේ ආච්චි අම්මා පමණි. ආච්චි අම්මා දුටු දැරිය ඇය වැලඳගෙන හඬන්නට වුණා. ඒ අතර ඇයව බේරාගත් නිම්සර නමැති දරුවා දැරියට සිදුවූ සම්පූර්ණ සිදුවීම ආච්චි අම්මාට පවසා තිබුණා. මේ විස්තරය ඇසූ මිත්තණිය ඔහුට මහත් සේ ප්රශංසා කරන්නටත් ස්තුති කරන්නටත් වුණා.
පසුව ආච්චි අම්මා නිම්සර කැටුව තංගල්ල පොලිස් ස්ථානය වෙත ගොස් මේ සිදුවීම සම්බන්ධයෙන් පැමිණිලි කළා. මේ වීර ක්රියාව කර තිබුණේ තංගල්ල කඳුරපොකුණ ප්රදේශයේ පදිංචි හඳුන්හෙත්තිගේ ඉසුරු නිම්සර නමැති 15 හැවිරිදි දරුවායි. ඔහුගේ අත් සහ පාද සීරීමට ලක්ව තුවාල වී තිබුණා. තුවාල ලබා සිටි දැරිය ඒ වන විටත් දැඩි කම්පනයකින් සිටියා. තංගල්ල පොලිස් මූලස්ථානයේ කාන්තා හා ළමා කාර්යාංශයේ නිලධාරීන් දැරිය වහාම තංගල්ල මූලික රෝහල වෙත රැගෙන ගොස් තිබුණා.
තංගල්ල පොලිස් නිලධාරීන් මෙම සිදුවීමට සම්බන්ධ සැකකරු සොයා පරීක්ෂණ සිදුකරන්නට විය. සැකකරුගේ නිවසට ගියත් ඔහු ඒ වනවිටත් නිවසින් පලාගොස් තිබුණා. එහෙත් යොදා තිබූ දැඩි රැකවල් හේතුවෙන් සැකකරුට තංගල්ල පොලිසියෙන් බේරීමට හැකියාවක් ලැබී තිබුණේ නැහැ. පැය කිහිපයක් තුළදී සැකකරු අත්අඩංගුවට ගැනීමට පොලිස් නිලධාරීන්ට හැකිව තිබුණා. අත්අඩංගුවට ගැනීමෙන් අනතුරුව සල්ලාල පුද්ගලයාගේ මව පොලිසියට පවසා ඇත්තේ තම පුතු මානසික ආබාධයකින් පෙළෙන බවයි. එහෙත් ඔහු කිසියම් මානසික ආබාධයකින් පෙළුණත් තවත් දරුවකුගේ ජීවිතය බිලිගන්නට කිසිවකුට අයිතියක් නොමැති බවයි පොලිසිය එම මවට පවසා තිබුණේ. ඇත්තෙන්ම තම දරුවාට එවැනි මානසික ආබාධයක් ඇත්නම් මවක් කටයුතු කළ යුතුව තිබුණේ ඊට හාත්පසින්ම වෙනස් ආකාරයකටයි.
නිම්සර පුතු සිදුකළ වීර ක්රියාව ඇගයීමට ලක් කළ යුතුයි. මේ දැරියට යම් කරදරයක් සිදුවූයේ නම් ඇගේ අනාගතයම අඳුරු වී යෑමට ඉඩ තිබුණා. එම අවදානමෙන් දැරිය මුදාගත් නිම්සර කළේ සැබෑම වීර ක්රියාවකි. අද සමාජයට අවශ්ය වන්නේ නිම්සර වැනි දරුවන්ය. ඒ නිසාම තංගල්ල පොලිසිය නිම්සර පුතුව ඇගයීමට ලක්කරනු ලැබුවේ තවත් දරුවකුට මෙවැනි අකටයුත්තක් සිදු නොවන්නට නිම්සර වැනි දරුවන්ගේ අවශ්යතාව සමාජයට අවධාරණය කරමිනි.
මෙම සිදුවීම සම්බන්ධයෙන් විමර්ශන සිදුකරනු ලැබුවේ තංගල්ල ප්රදේශය භාර ජ්යෙෂ්ඨ පොලිස් අධිකාරී රවීන්ද්ර අඹේපිටිය මහතාගේ උපදෙස් පරිදි පොලිස් පරීක්ෂක ලාල් චන්ද්රසිරි, කාන්තා කාර්යංශයේ හෂිනි දිනූෂා, කාන්තා සැරයන් කාන්ති යන මහත්ම මහත්මීන් විසිනි.
මේ වනවිට පුංචි නිම්සරට සැකකරුගේ පාර්ශ්වයෙන් තර්ජන ගර්ජනද එල්ල වී ඇති බව වාර්තා වේ. එම නිසා තංගල්ල පොලිසිය විසින් සැකකරුගේ පාර්ශ්වයට අවවාද කර ඇත්තේ එවැනි තර්ජන සිදු නොකරන ලෙසයි. ඒ අනුව සැකකරු තංගල්ල පොලිසිය විසින් තංගල්ල මහෙස්ත්රාත් අධිකරණයට ඉදිරිපත් කිරීමෙන් අනතුරුව රක්ෂිත බන්ධනාගාර ගතකර තිබෙනවා.
බොහෝ මවුපියන් තම දරුවන් වැඩිහිටි වයසට පත්වන තෙක් ඇස් මානයේ තබාගන්නවා නම් මෙවැනි අපරාධ වළක්වා ගැනීමට රුකුලක් වනු ඇත. පොඩි දරුවන්ට අනතුරු ගැන වැටහීමක් නැහැ. නමුත් වැඩිහිටියන් තම දරුවන් ගැන මීට වඩා වගකීමෙන් ක්රියා කළ යුතුයි. සොයා බැලිය යුතුයි. මේ සිදුවීමෙන් සමාජයට ලබාදෙන පාඩම එයයි.
නිලන්ති රේණුකා
