ජවිපෙ පළමු වරට ලංකාවේ වැඩිම පාර්ලිමේන්තු මන්ත්රී සංඛ්යාවක් දිනාගත්තේ 2004 මහ මැතිවරණයෙනි. ඒ, මන්ත්රී ආසන 39ක් ලබාගනිමිනි. 2004 මහ මැතිවරණයට ජවිපෙ තරග කළේ ශ්රීලනිපය සමග එක්ව එක්සත් ජනතා නිදහස් සන්ධානය පිහිටුවාගෙනය. ජවිපෙ, ශ්රීලනිපය සමග එක්සත් ජනතා නිදහස් සන්ධානය පිහිටුවා ගත්තේ එවක අගමැති රනිල්ගේ සටන් විරාම ගිවිසුම සහ ජාත්යන්තර මූල්ය අරමුදල සමග ඇතිකරගත් ගිවිසුමට එරෙහිවය. ඒ ගිවිසුම මගින් විශාල වශයෙන් ජනතාව මත වැට් බදු පනවා තිබිණි. සටන් විරාම ගිවිසුමට එරෙහිව ජනතාව ඒකරාශී කරගන්න ජවිපෙ දේශහිතෛෂී ජාතික ව්යාපාරය නමින් ව්යාපාරයක් පිහිටුවා ගෙන තිබිණි. මේ දේශහිතෛෂී ජාතික ව්යාපාරයේ නායකයන් වූයේ ජවිපෙ නියෝජනය කරමින් විමල් වීරවංශ, ලෝක ක්රිකට් ශූර අර්ජුන රණතුංග, ඇල්ලේ ගුණවංශ හිමි සහ සාහිත්යධරයෙක් වූ ගුණදාස අමරසේකරය. මේ දේශහිතෛෂී ජාතික ව්යාපාරය අද ජවිපෙ පිහිටුවාගත් ජාතික ජන බලවේගයේ ආකෘතියකි. ජාතික ජන බලවේගයේ මෙන් දේශහිතෛෂී ජාතික ව්යාපාරයේ හිටියේ කලාකරුවන් සහ බුද්ධිමතුන්ය. ජාතික ජන බලවේගයේ තරුව හරිනි අමරසූරියය. දේශහිතෛෂී ජාතික ව්යාපාරයේ තරුව අර්ජුන රණතුංග විය. එකම වෙනස ජවිපෙ 2004 මහ මැතිවරණයට දේශහිතෛෂී ජාතික ව්යාපාරයෙන් තරග නොකර ශ්රීලනිපය සමග එක්සත් ජනතා නිදහස් සන්ධානයෙන් තරග කිරීමත්, 2024 මහ මැතිවරණයට ජාතික ජන බලවේගයෙන්ම තරග කිරීමත්ය. ජවිපෙ, දේශහිතෛෂී ජාතික ව්යාපාරයේ වීරයා කළේ විමල්වය. ජාතික ජන බලවේගයේ වීරයා කළේ ජවිපෙ නායක අනුරවය. ජවිපෙ, දේශහිතෛෂී ජාතික ව්යාපාරය හැදුවේත් රනිල්ගේ ආණ්ඩුවට එරෙහිවය. ජවිපෙ, ජාතික ජන බලවේගය පටන්ගත්තේ 2019 මෛත්රී-රනිල් ආණ්ඩුවට එරෙහිවය. ජාතික ජන බලවේගය ප්රධාන බලවේගයක් ලෙස ගොඩනැගුවේ 2024 රනිල්ගේ පාලනයට එරෙහිවය.Sri Lanka Latest News
ජවිපෙ 2002-2004 රනිල්ගේ ආණ්ඩුවට එරෙහිව රට පුරා පෙළපාළි, විරෝධතා, සත්යග්රහ පවත්වා රනිල්ගේ සටන් විරාම ගිවිසුමට සහ ජාත්යන්තර මූල්ය අරමුදල සමග ඇතිකරගත් ගිවිසුමට එරෙහිව රටම එකට එකතු කළේය. ජවිපෙ ශ්රීලනිපය සමග ගිවිසුම් අස්සන් කළේත් සටන් විරාම ගිවිසුමෙන් සහ මූල්ය අරමුදලේ ගිවිසුමෙන් ශ්රීලනිප-ජවිපෙ පිහිටුවන ආණ්ඩුවෙන් ඉවත් වෙන බවට වූ කොන්දේසියට එවක ජනාධිපති චන්ද්රිකා එකඟ කරගෙනය.
2004 ජවිපෙට තරග කරන්න ශ්රීලනිපය දුන්නේ අපේක්ෂකයන් සීමිත ප්රමාණයකි. ජවිපෙ එම අපේක්ෂකයන් හරහා ලංකාවේ මැතිවරණ ඉතිහාසයේ දැවැන්ත පෙරළියක් කළේය. ගම්පහ මනාප ඡන්ද ගණන් කරද්දී බණ්ඩාරනායකවරුන්ගේ බළකොටුව වූ ගම්පහින් බණ්ඩාරනායකවරුන්ගේ ඔටුන්න හිමි කුමාරයා වූ අනුර දෙවැනි තැනට වැටුණි. ගම්පහ එක වූයේ විජිත හේරත්ය. අනෙකුත් දිස්ත්රික්කවලත් ශ්රීලනිප පතාකයන් පරදා ජවිපෙ අපේක්ෂකයන් දිස්ත්රික්කවල නොම්මර එක විය. ඇත්තටම 2024 වගේම 2004දීත් ශ්රීලනිප පාක්ෂිකයන් ඡන්දය දුන්නේ ජවිපෙටය. ශ්රීලනිපය ජවිපෙ පිහිටෙන් බලයට ආවේය.
2004 චන්ද්රිකාගේ එක්සත් ජනතා නිදහස් සන්ධාන ආණ්ඩුවේ ජවිපෙ ඇමැතිවරු හතරක් වූහ. අනුර කුමාර කෘෂිකර්මාන්ත ඇමැති විය. ලාල්කාන්ත ග්රාමීය ආර්ථික ඇමැති විය. චන්ද්රදාස විජේසිංහ ධීවර ඇමැති විය. විජිත හේරත් සංස්කෘතික ඇමැති විය. බිමල් රත්නායක, සුනිල් හඳුන්නෙත්ති, සමන්ත විද්යාරත්න, නිහාල් ගලප්පත්ති ඔවුන්ගේ නියෝජ්ය ඇමැතිවරු විය. ජවිපෙ සමග ගිවිසගත් පරිදි චන්ද්රිකා මූල්ය අරමුදල සමග රනිල් අස්සන් කළ ගිවිසුමෙන් ඉවත් වූවාය. ලෝක බැංකුව ලංකාවේ කාර්යාලයත් වසා දමා යන්නට ගියේය. චන්ද්රිකා සටන් විරාම ගිවිසුමෙන් ඉවත් වූයේ නැත. ඒත් සටන් විරාම ගිවිසුම යටතේ සාම සාකච්ඡා ආරම්භ කරන්න ඇය උනන්දුවක් දැක්වූයේ නැත. රනිල්ගේ ආණ්ඩු කාලයේම එල්.ටී.ටී.ඊ.ය සාම සාකච්ඡාවලින් ඉවත් වීම ඇය ප්රයෝජනයට ගත්තාය. ජවිපෙ මෙයින් සතුටට පත්විය. එහෙත් ඒ වනවිට ජවිපෙ ප්රධාන හතුරා වූ යූ.ඇන්.පී.ය සහ හෙළ උරුමය සටන් විරාම ගිවිසුමෙන් ඉවත් වන බවට වූ පොරොන්දුව ජවිපෙ කඩකිරීම ගැන ජවිපෙට චෝදනා කරන්නට විය.
2004 දෙසැම්බරයේ සුනාමියෙන් පසු චන්ද්රිකා නෝර්වේ සහ ජාත්යන්තර ප්රජාවේ මැදිහත් වීම මත විදේශ ආධාර ගන්න එල්.ටී.ටී.ඊ.ය සමග සුනාමි සහන මණ්ඩලයක් ඇතිකරන්න තීරණය කළාය. මේ වෙනකොටත් ජවිපෙ දේශපාලන මණ්ඩලය තුළ චන්ද්රිකා සටන් විරාම ගිවිසුමෙන් ඉවත් නොවීම සම්බන්ධයෙන් වාද විවාද හටගෙන තිබිණි. ඇය එල්.ටී.ටී.ඊ.ය සමග සුනාමි සහන මණ්ඩල ගිවිසුම අස්සන් කරන්න ගිය විට ජවිපෙ දේශපාලන මණ්ඩලය ගිනියම් විය. ඇය සුනාමි සහන මණ්ඩල ගිවිසුමට අස්සන් කළොත් තමන්ට ඒ ආණ්ඩුවේ සිටීම අමාරු බවට ජවිපෙ දේශපාලන මණ්ඩලය තීන්දු කළේය. ඔවුහු චන්ද්රිකාගේ ආණ්ඩුවෙන් ඉවත් වෙන්න තීරණය කළහ. රනිල් අටවපු සටන් විරාම ගිවිසුම් උගුලේ හිර නොවී ජවිපෙ සිය දේශපාලන කන්යාභාවය ආරක්ෂා කරගත්තේ එසේය. ජවිපෙ චන්ද්රිකාගේ ආණ්ඩුවෙන් ඉවත් වුණා පමණක් නොව, සුනාමි සහන මණ්ඩලයට එරෙහිව උසාවි ගියේය.
එදා රනිල් අටවපු සටන් විරාම ගිවිසුමට එරෙහිව රටම අවුස්සා ශ්රීලනිපය සමග එක්ව බලය ගත් ජවිපෙ මෙදා රනිල් අටවපු මූල්ය අරමුදල ගිවිසුම නොහොත් අයි.එම්.එෆ්. ගිවිසුමට එරෙහිව රටම අවුස්සා තනියම ජනාධිපතිකමත් ආණ්ඩු බලයත් ගෙන ඒ ගිවිසුම් උගුලෙන් ගැළවෙන්න බැරිව ඒ ගිවිසුම රනිල් අස්සන් කරපු කොන්දේසි යටතේම ක්රියාත්මක කරමින් සිටී.
අනුර සහ ජවිපෙ රනිල්ගේ අයි.එම්.එෆ්. ගිවිසුමෙන් ඉවත් වන බව කීවේ නැත. නමුත් ගිවිසුම වෙනස් කර ගිවිසුමෙන් ජනතාව මත පනවා ඇති අහිතකර බදු ඉවත් කරනවා කීහ. ජවිපෙ වගේම සජිත් සහ සමගි ජන බලවේගයත් මේ කතාවම කීහ. 2024 ජනාධිපතිවරණයේදී අනුරට ලක්ෂ 56ක් සහ සජිත්ට ලක්ෂ 43ක් ඡන්දය දුන්නේ අයි.එම්.එෆ්. ගිවිසුම ජනතාවට හිතකර ලෙස වෙනස් කරවා ගන්නටය. අයි.එම්.එෆ්. ගිවිසුම එලෙසම ක්රියාත්මක කරනවා කී රනිල්ට ලැබුණේ ලක්ෂ 22කි. ගිවිසුමට එරෙහිව ඡන්දය ඉල්ලා නාමල් රාපක්ෂත් ලක්ෂ 3ක් ගත්තේය. දිලිත් ජයවීරත් 1,22,396ක් ගත්තේ ගිවිසුමට එරෙහිව ජනතා මතයක් හදලාය. එතකොට කෝටියකට වැඩිය ලංකාවේ ජනතාව අයි.එම්.එෆ්. ගිවිසුම වෙනස් කරන්න ඡන්දය දී ඇත.
‘ඇයි ජාතික ජන බලවේග ආණ්ඩුව මේක අයි.එම්.එෆ්. එකට කියන්නේ නැත්තේ..?’
2005 මහින්ද ජනාධිපති වුණේ ජවිපෙ 2005 චන්ද්රිකා-එල්.ටී.ටී.ඊ. ගිවිසුමට එරෙහිව ආණ්ඩුවෙන් ඉවත් වී සිය දේශපාලන කන්යාභාවය ආරක්ෂා කරගෙන ගිවිසුම් විරෝධයට මහින්ද එකඟ කරවාගෙන මහින්දව කරේ තියාගෙන ඡන්ද සටන කළ නිසාය. ජවිපෙ ඔළුව නමාගෙන චන්ද්රිකාගේ ආණ්ඩුවේ හිටියා නම් 2005 ජනාධිපතිවරණයට ජවිපෙ යන්නේ සිංහයෝ මෙන් නොව හීලෑවුණු පූස් පැටියන් වගේය.
අද ජනාධිපති චන්ද්රිකා හෝ මහින්ද නොව ජවිපෙ නායකයාමය. ජවිපෙ ආණ්ඩුවෙන් ඉවත්ව යද්දී චන්ද්රිකා රනිල්ගේ ගිවිසුම ආරක්ෂා කළ ලෙස අද රනිල්ගේ අයි.එම්.එෆ්. ගිවිසුම ආරක්ෂා කරන්න ජවිපෙ නායකයාට සහ ජවිපෙට සිදුව තිබේ. ඒ, දේශපාලන කන්යාභාවය ගැන නොහිතාය.
