ත්රිපෝෂ කියන්නේ මිනිස්සුන්ගේ හදවතේ තියෙන නමක්. පුංචි කාලේ කාපු ත්රිපෝෂ තාමත් අපට මතකයි. ත්රිපෝෂ රසට සමහර අය තාමත් ආදරේ කරනවා. ත්රිපෝෂ කියන්නේ ආගමක්. දරුවෝ ලැබෙන්න නොහිටියත් සමහර විට ත්රිපෝෂ ටිකක් කන්න, ත්රිපෝෂ ටිකක් හොයාගන්න, ත්රිපෝෂ ටිකක් ඉල්ලගන්න හුඟක් දෙනෙක් ලොකු ගේමක් දෙනවා. (Sri Lanka Latest News)
ත්රිපෝෂ සමාගම වහන්න යනවා කියන කතන්දරෙත් එක්ක නැත්නම් ත්රිපෝෂ සමාගම විකුණන්න යනවා කියන කතන්දරෙත් එක්ක බොහෝ දෙනෙක් තැතිගත්තා සහ ඒ ගැන කලබල වුණා. මේ ගැන පාර්ශ්ව දෙකක් කතා දෙකක් කියනවා. එතකොට අපිට කොයි පාර්ශ්වය කියන කතාව පිළිගන්නවද, කොයි පාර්ශ්වය කියන කතාව නොපිළිගන්නවද කියන එක ගැන හිතන්න වෙලා තියෙනවා. ත්රිපෝෂ සමාගම විකුණන්නේ නැහැ කියලා මුදල් අමාත්යාංශය පහුගිය දවසක නිල වශයෙන් ප්රකාශයක් නිකුත් කරලා තිබුණා. හැබැයි 2024 සැප්තැම්බර් මාසේ 27 වැනිදා අංක 2403/53 දරන ගැසට් නිවේදනයෙන් ත්රිපෝෂ සමාගම ඈවර කරන්න හෝ වෙනත් සමාගමකට ඒකාබද්ධ කරන්න ආණ්ඩුව තීන්දු කරලා තිබෙන බව තමයි පහුගිය දිනෙක දේශපාලන වේදිකාවේ කියැවුණේ. 2024 සැප්තැම්බර් 27 තමයි මේ ගැසට් නිවේදනය නිකුත් කරලා තියෙන්නේ. ගැසට් නිවේදනයේ අංකය 2403/53. එතකොට මේ විදියට ගැසට් නිවේදනයක් නිතුත් කරලා තියෙනවද කියලා අපි ආණ්ඩුවෙන් අහනවා. මේ අංක හරිද? දේශපාලන වේදිකාවේ කියපු අංකයි අපි ඔබට ඉදිරිපත් කළේ.
ඉතින් මේ විදියේ අංකයක් සහිතව ගැසට් නිවේදනයක් නිකුත් කරලා තියෙනවා නම් ගැසට් නිවේදනයක් නිකුත් කළාටත් පස්සේ ඒ ගැසට් නිවේදනය රිවස් කරන්න නැත්නම් ආපහු ගන්න යම් අමාත්යාංශයකට නිල නිවේදන නිකුත් කරලා පුළුවන්ද? ගැසට් නිවේදනයක් නිකුත් කළාට පස්සේ එම ගැසට් නිවේදනය සම්බන්ධයෙන් ප්රකාශයක් නිකුත් නොකර මුදල් අමාත්යාංශය නිවේදනයක් නිකුත් කරනවා සීමාසහිත ත්රිපෝෂ සමාගම සම්බන්ධයෙන් පළවන ඇතැම් පුවත් වැරැදි බවට. ඉතින් මේ විදියට ඒ වගේම දරුවන්ට ත්රිපෝෂ ලබාදීමේ වැඩසටහන වඩාත් ඵලදායී ලෙසින් ඉදිරියටත් ක්රියාත්මක කරන බව ඔවුන් ප්රකාශයට පත්කරලා තිබෙනවා.
දැන් සජිත් ප්රේමදාස ඇතුළු විපක්ෂ දේශපාලන කණ්ඩායම විසින් කරන මේ හෙළිදරව්ව වැරැදි නම් ඒ අයට විරුද්ධව පියවර ගැනීමට වහාම කටයුතු කළ යුතුයි. මවුවරු 6,64,920කගේ සහ දරුවන් 9,25,172කගේ පෝෂණය අනතුරේ බවයි සජිත් ප්රේමදාස මේ හෙළිදරව්ව කරමින් ප්රකාශ කළේ. ඇත්තටම මේ විදියේ තීන්දුවක් ගත්තද? තීන්දුවක් ගත්තේ නැද්ද? තීන්දුවක් ගත්තා නම් දැන් එම තීන්දුව ආපහු ගන්න කළ යුතුව තියෙන්නේ මාධ්ය ප්රකාශ නිකුත් කිරීම හෝ ඒ පිළිබඳ විශේෂ ප්රකාශ නිකුත් කිරීම නෙවෙයි. එම ගැසට් නිවේදනය ආපහු කැඳවන එක. ගැසට් නිවේදනයක් ආපසු කැඳවීමට නිල වශයෙන් කරන්න තියෙන වැඩපිළිවෙළ පහුගිය කාලේ අපි දිගටම දැක්කා. මොකද අපි දන්නවා ලංකාවේ මේ විදියට ගැසට් නිවේදන ආපසු කැඳවලා හොඳට හුරු පුරුදු ආණ්ඩු තමයි ඉන්නේ. ඒ නිසා මෙම ගැසට් නිවේදනය ආපසු කැඳවීම සම්බන්ධයෙන් අපිට කියන්න තියෙන්නේ තවත් වතාවක් තවත් ගැසට් නිවේදනයක් නිකුත් කරලා අපි කලින් නිකුත් කරපු ගැසට් නිවේදනය බලාත්මක නැති බව ප්රකාශයට පත්කිරීම තමයි ආණ්ඩුවක් කළ යුත්තේ.
දැන් මෙතැන තියෙන ප්රශ්නය තමයි රටකට මේ වගේ දේවල් අලෙවි කරන්න සිද්ධ වෙනවා. සමහර දේවල් විදේශ සමාගම් වෙත පවරා දෙන්න සිද්ධ වෙනවා. ඒකට හේතු වෙන්නේ අපේ රටේ මූල්යමය අර්බුද ආවට පස්සේ රට කරගෙන යන්න බැරුව ගියාම රට බංකොළොත් වුණාම රටේ යම් යම් සම්පත් විදේශීය සමාගම් වෙත අලෙවි කරන්න, පවරා දෙන්න, කාලයකට පාවිච්චියට ගන්න විදියට දීලා ආයෙත් ගන්න බලාපොරොත්තුවෙන් කුලියට දෙන්න, බද්දට දෙන්න සිද්ධ වෙනවා. ඒ විදියට ලංකාවේ බොහෝ තැන්වල, බොහෝ දේපළවලට කරන්න සිද්ධ වුණා. ඒ සමහර දේවල් ඉතා අත්තනෝමතික විදියට සිද්ධ කළා. සමහර දේවල් යම් යම් මූල්ය ලාභ මත සිදුකළා. අපි දන්නවා මේ වෙනකොට ප්රශ්නයක් තියෙනවා ත්රිකුණාමල නගරයේ තෙල් ටැංකි සංකීර්ණය වගේ දේවල් සම්බන්ධයෙන්. මේක ඉන්දියානු සමාගමකට අලෙවි කරලා තියෙන බවට ලොකු ගැටලුවක් තියෙනවා. ඒ වගේම අපි දන්නවා වරායේ යම් යම් පාර්යන්ත සම්බන්ධයෙන් මේ වෙනකොට ගැටලුකාරී තත්ත්වයක් ඇතිවෙලා තියෙනවා. හම්බන්තොට වරාය සම්බන්ධයෙන් ගැටලුකාරී තත්ත්වයක් නිර්මාණය වෙලා තියෙනවා. එප්පාපල තියෙන පොස්ෆේට් නිධිය, ඉල්මනයිට් නිධිය සම්බන්ධයෙන් අපේ රටේ කතාබහට ලක්වෙන කාරණා සිද්ධ වුණා.
මේ සම්බන්ධයෙන් මුල් කාලයේ සටන් කළේ, විරෝධතා ව්යාපාර දියත් කළේ ජනතා විමුක්ති පෙරමුණ. දැන් ජනතා විමුක්ති පෙරමුණට තමයි ආණ්ඩුව තියෙන්නේ. ඒගොල්ලෝ තමයි රට කරන්නේ. ජනාධිපතිවරයා එදා ජනතා විමුක්ති පෙරමුණේ හිටපු ප්රබලතම ක්රියාකාරීම පුද්ගලයෙක්. ඔහු ජවිපෙ නායකයා. ඉතින් ඒ නිසයි අපි මේ කියන්නේ. ජවිපෙ නායකයෙක්ගේ ආණ්ඩුවක් යටතේ තවදුරටත් ලංකාවේ සම්පත් විකුණන එක සම්බන්ධයෙන් අපිට ප්රශ්නයක් තියෙනවා. මොකද අපි දන්නවා විකුණන එවුන් ගැන ප්රශ්නයක් තිබුණු නිසයි අපි ජවිපෙ ආණ්ඩුව පත්කරගත්තේ. නරක මිනිස්සු අයින් කරලා, හොඳ මිනිස්සුන්ව දාගත්තේ. රටට යම් හොඳ දෙයක් කරාවි යැයි කියන අනුර කුමාර දිසානායක සම්බන්ධයෙන් විශ්වාසයක් අපි ඇතිකරගත්තේ. ඔහු ඇත්තටම හොරකම් නොකරපු දේශපාලකයෙක් වශයෙන් ඉලක්කගත කරලා ඇඟිල්ල දිගුකරලා කියන්න වැරැදි නොකරපු මිනිහෙක්. ඒ නිසා තමයි අපි ඔහු ජනාධිපතිවරයා ලෙස භාරගන්නේ. ඔහුට අපි ආදරේ කරන්නේ.
ඒ නිසා ජනාධිපතිතුමනි, පුංචි කාලේ මතකයන් එක්ක තියෙන ත්රිපෝෂ සමාගමත් එක්ක නම් සෙල්ලම් කරන්න එපා. ඔබ කරන දේ හැබෑවටම කියන්න. රට දැනුවත් කරන්න. අපි දන්නවා. සමහර වෙලාවට මුළු රටම කැමැති තීරණ ගන්න බැහැ. මුළු රටම ආසා තීරණ ගන්න බැහැ. සමහර තීරණ ගන්න සිද්ධ වෙනවා ආන්දෝලනාත්මක තීරණ. සමහර තීරණ ගන්න සිද්ධ වෙනවා අප්රසිද්ධව. ප්රසිද්ධ තීරණ අරගෙන රටවල් කරන්න බැරි බව අපි දන්නවා. ඒ නිසා ඔබතුමා තීරණයක් ගන්නවා නම් ඒක එළිපිට කියන්න. හැංගි හොරා කරන්නේ නැතුව. මොකද හැංගි හැංගි වෙස් බැන්දට නටන්න වෙන්නේ එළිපිට.
ජීවන පහන් තිළිණ
