අරලිය සමූහ ව්යාපාරයේ අධිපති ඩඩ්ලි සිරිසේන මහතා උනවටුන සංචාරක කලාපයේ සිදුකරන මහාපරිමාණ අනවසර ඉදිකිරීම් වහා නතර කරදෙන මෙන් ඉල්ලා ජනාධිපති අනුර කුමාර දිසානායක මහතාට ලිඛිතව දැනුම් දුන් බව සමස්ත ලංකා සුළු හා මධ්ය පරිමාණ සංචාරක ව්යාපාරිකයන්ගේ එකමුතුවේ සභාපති සමීර ද සිල්වා මහතා පැවැසීය.Sri Lanka Latest News
මෙම ලිපිය පසුගිය 02 වැනිදා ජනාධිපති ලේකම් කාර්යාලයේදී ලබාදුන් බව ඒ මහතා කීය.
මේ නිසා උනවටුන සංචාරක පාරාදීසය රටට අහිමි වීමේ අවදානමක් ඇති වන බවත්, මේ ආකාරයේ අනවසර ඉදිකිරීම් සිදුකිරීමේදි බරපතළ පාරිසරික ප්රශ්න ගණනාවක් ඉදිරියේදී ඇතිවන බවත් ඒ මහතා කීය.
දැනටමත් සමහර රාජ්ය ආයතනවල සහයෝගය ඇතිව මෙම ඉදිකිරීම් මේ වනවිටත් සිදුකරමින් පවතින නිසා මෙම මහා පරිමාණ විනාශය නතර කර උනවටුන සංචාරක කලාපය රැක දෙන ලෙස ඉල්ලා මෙම ලිපිය ජනාධිපතිවරයාට යොමුකළ බව ඒ මහතා ප්රකාශ කළේය.
මෙයට වගකිව යුතු රාජ්ය ආයතනද අදාළ ව්යාපාරිකයාට සහාය දක්වනවා. මෙම මහාපරිමාණ ව්යාපාරිකයා උනවටුන සංචාරක කලාපයේ පොදු ජනතා දේපළ තම බූදලක් ලෙස භාවිත කරන බවත් මේ ආකාරයට අවසරය දී ඇති රාජ්ය ආයතන සම්බන්ධයෙන්ද පරීක්ෂණයක් සිදුකරන ලෙසත් එම ලිපියෙන් ඉල්ලා සිටි බව සමස්ත ලංකා සුළු හා මධ්ය පරිමාණ සංචාරක ව්යාපාරිකයන්ගේ එකමුතුවේ සභාපති සමීර ද සිල්වා මහතා වැඩිදුරටත් පැවසීය.
