‘88-89 යුගය සම්බන්ධයෙන් සමගි ජන බලවේගය නගන අවලාදාත්මක චෝදනාවලට උත්තර නොදී ජේ.වී.පී.ය මේ යන ගමන වැටිලා තියෙන්නේ ධනේශ්වර පන්තිය එක්ක සන්ධානයකට’ යැයි පෙරටුගාමී සමාජවාදී පක්ෂයේ ලේකම් කුමාර් ගුණරත්නම් මහතා පැවසීය. (Sri Lanka Latest News)
නුගේගොඩ පිහිටි එම පක්ෂ මූලස්ථානයේ දී පැවැති ප්රවෘත්ති සාකච්ඡාවකදී හෙතෙම මේ බව කියා සිටියේය.
එහිදී අදහස් දැක්වූ කුමාර් ගුණරත්නම් මහතා,
‘මේ වෙලාවේ අපිට පේන දෙයක් තමයි සමගි ජන බලවේග වේදිකාවේ තමන්ගේ ප්රතිවාදියා විදියට ජනතා විමුක්ති පෙරමුණ නම්කරමින් ඉන්නවා. එතකොට 88-89 කාලය සම්බන්ධයෙන් විවf්චනයක් එල්ල කරමින් ඉන්නවා. අපිත් සක්රීයව සම්බන්ධ වුණු මෙම කාලය සම්බන්ධයෙන් නගන අවලාදවලට පිළිතුරු නොදී මුණිවත රකිමින් තමයි ජනතා විමුක්ති පෙරමුණ දැන් යන්නේ.’
‘අපි දන්නවා ජේ.ආර්. ජයවර්ධන 78දී විශාල මර්දනයක් එක්ක තමයි ඔවුන්ගේ 17 වසරක පාලනය පවත්වාගෙන යන්න මැදිහත් වුණේ. රට ජාතිවාදී යුද්ධයකට මගපෑදීම, උතුරේ සංවර්ධන සභා ඡන්ද කොල්ලය, යාපනය පුස්තකාලය ගිනිතැබීම, ශිෂ්ය ව්යාපාරය මර්දනය කිරීම, ජනමත විචාරණයක් ගෙනල්ලා ජනමතය කොල්ලකෑම වගේ දැවැන්ත මර්දනකාරී වැඩපිළිවෙළක් එක්ක තමයි ජේ.ආර්. පාලනය පවත්වාගෙන ගියේ.’
‘එහෙම කොල්ලකාරී පාලන ක්රමයකට එරෙහිව තමයි 88-89දී ජනතා විමුක්ති පෙරමුණ විදියට ඒ අරගලයට මැදිහත් වුණේ. අපි දන්නවා දේශපාලන ව්යාපාරයක් විදියට අපිට එහි යම් යම් දේවල් පිළිබඳ ස්වයං විවේචන තියෙනවා. හැබැයි ඒ ඇතිවුණු තත්ත්වයට වගකියන්න ඕනේ රනිල් වික්රමසිංහලා පවා නියෝජනය කරන ලද කොල්ලකාරී පාලනය. හැටදහසක් ජනතාව ජීවිත පරිත්යාග කරමින් කරන ලද එම අරගලය පිළිබඳ එල්ල කරන චෝදනාවලට උත්තර නොදී ජේ.වී.පී.ය මේ යන ගමන වැටිලා තියෙන්නේ ධනේශ්වර පන්තිය එක්ක සන්ධානයකට කියන එක පැහැදිලියි…’ යනුවෙන් පැවැසීය.
