තණ්හාවෙන් භරිත වෙච්ච මිනිස්සුන්ට ජීවිතේ ඇත්ත කතාව කියලා දෙන අපූරු තැනක්…
අප රටේ තිබෙන ආරණ්ය සේනාසන අතරින් එක් සුවිශේෂ සෙනසුනක් පිළිබඳවයි මේ ලිපියෙන් ඔබට කියන්නේ. මෙම සෙනසුන පිහිටා තිබෙන්නේ හම්බන්තොට දිස්ත්රික්කයේ මත්තල ප්රදේශයේ. එහි නම ‘මල් අස්න බුදුරුවගල ආරණ්ය සේනාසනය’යි.(Sri Lanka Latest News) එහි භාවනානුයෝගීව පිළිවෙත් පුරන ස්වාමින්වහන්සේ නමක් අපවත් වූ විට උන්වහන්සේගේ දේහය ආදාහනය නොකර විශේෂ කුටියක තැන්පත් කර තැබීම මෙම සෙනසුනේ විශේෂත්වයයි.
මල් අස්න බුදුරුවගල ආරණ්ය සේනාසනයේ වැඩසිට අපවත්වූ හිමිවරුන් විශාල ප්රමාණයකගේ දේහයන් අදටත් එහි වූ විශේෂ කුටිවල දැකගන්නට ලැබෙනවා. දිරාපත්ව, ඇටකටු මතුවූ එම දේහයන් දකින ඕනෑම කෙනකුට මනුෂ්ය ශරීරයේ යථා ස්වභාවය ගැන අංශු මාත්ර හෝ අවබෝධයක් ඇති කරගැනීමට හැකියාව ලැබෙනවා. බොහෝ දෙනකු අසා දැක නැති මෙම අපූරු ස්ථානය ගැන කියැවෙන තොරතුර අපි උපුටා ගත්තේ Trip Pisso යූටියුබ් නාලිකාවෙන්.
දැන් අපි ඇවිත් ඉන්නේ මල් අස්න බුදුරුව ගල ආරණ්ය සේනාසනයේ මෘත ශරීර තැන්පත් කර ඇති ස්ථානයට. එකිනෙකට යාවෙන සේ නිර්මාණය කර ඇති එම කුඩා කුටීරවල එක් පැත්තකට වීදුරුවක් සවිකර තිබෙනවා. ඒ, මෘත දේහය දිරාපත් වන ආකාරය පිටතින් බලන කෙනකුට පැහැදිලිව දැකගන්නට ලැබීම සඳහායි. සෑම කුටීරයකම ස්වාමින්වහන්සේ නමකගේ නමක් සඳහන් කර ඇති අයුරුද දැකගත හැකියි. ඉන් කියැවෙන්නේ එම කුටීරයේ තැන්පත් කර ඇත්තේ අදාළ නම සහිත ස්වාමින්වහන්සේගේ දේහය බවයි.
මෙම මෘත ශරීර තැන්පත් කිරීම පිළිබඳ වැඩිදුර තොරතුරු අපට සඳහන් කළේ අපට එහිදී මුණගැසුණු ස්වාමින්වහන්සේ නමක්.
‘මේ සෙනසුනේ වැඩසිටින ස්වාමින්වහන්සේ නමක් අපවත් වුණාම උන්වහන්සේගේ දේහය මේ වීදුරු කුටියක තැන්පත් කරනවා. රැවුල් කොණ්ඩා කපලා තමයි තැන්පත් කරන්නේ. එම්බාම් කරන්නේ නැහැ. අඩියක විතර අළුහුණු තට්ටුවක තමයි දේහය තැන්පත් කරන්නේ. දවස් 21ක් යනතුරු දේහයෙන් ඕජස් ගලනවා. කොණ්ඩා රැවුල් පවා වැවෙනවා. දවස් 21 වෙද්දී දර ගොඩක් වගේ වෙනවා.
ලොව්තුරා බුදුරජාණන් වහන්සේ ජීවමාන කාලේ යම් කෙනෙක් මියගියාම ආදාහනය කළේ නෑ. දේහය රෙදිකඩක ඔතලා අමු සොහොනට ගෙනිහින් දැමීම තමයි කළේ. ඒ දේහය දිහා බලාගෙන පිළිකුල් භාවනාව වඩලා එකල බොහෝ ස්වාමින්වහන්සේලා මාර්ගඵල ලැබුවා. එක රැයක් එළිවෙද්දී අරහත්වයට පත්වුණා ඇතැම් ස්වාමින්වහන්සේලා. නමුත් අද අමු සොහොන් නැහැ. ඒ වෙනුවට තියෙන්නේ ආදාහනාගාරය. එහෙමත් නැත්නම් අඩි 6ක් යට වළදැමීම. ඒ නිසා, මෙහි වැඩසිටින ස්වාමින්වහන්සේලාට ජීවිතයේ යථාර්ථය අවබෝධ කරගන්න උපකාර පිණිස තමයි මල් අස්න ආරණ්ය සේනාසනයේ නායක ස්වාමින්වහන්සේ තීරණය කළේ අපවත් වන ස්වාමින්වහන්සේලාගේ දේහයන් මේ විදියට තැන්පත් කරන්න ඕනේ කියලා.
මේ ස්ථානය ගිහි පැවිදි බොහෝ අය ඇවිල්ලා දැකබලාගෙන යනවා. නමුත් සමහරු නම් එන්න බයයි. හොල්මන් තියෙනවා කියලා සමහරු කියනවා. ඒ නිසා හවස 6න් පස්සේ කවුරුවත් මෙතැනට එන්නෙ නෑ. මෙතැන ලයිට් නෑ. අඳුරු ස්වභාවයෙන්ම තමයි නිතරම තියෙන්නේ. සමහර මෘත ශරීර තියෙනවා අවුරුදු 15ක් විතර පරණයි. ඒ සිරුරු දිරාගිහිල්ලා ඇට සැකිල්ල විතරයි තියෙන්නේ.
එක ස්වාමින්වහන්සේ නමකගේ දේහයක් තියෙනවා. උන්වහන්සේ හවස 5ට විතර වැවට නාන්න ගිය අතරේ අලියෙක් පහර දීලා තමයි අපවත් වුණේ.
වවුල්ලු එහෙම ඉන්නවා. ගුප්ත බවක් තමයි හැම වෙලාවෙම මේක ඇතුළේ තියෙන්නේ. අපටත් දවසක සිදුවෙන්නේ මේ මෘත දේහවලට වෙලා තියෙන දේම තමයි. ඒක නොදැන කටයුතු කරන හින්දා තමයි අද අපේ රටේ මේ තරම් අපරාධ වැඩිවෙලා තියෙන්නේ. තණ්හාවෙන් භරිත වෙලා හම්බකරන මිනිස්සු පිරිසක්නේ රටේ ඉන්නේ. මැරෙන්නේ නෑ කියලා හිතාගෙන. එවැනි අයට මේක හරි වැදගත් වෙනවා. මම හිතනවා ඒ නිසා, මෙවැනි තැනක් හැම පන්සලකම තියෙන්න ඕනේ කියලා. ජීවිතේ යථා ස්වභාවය හැමෝටම දැකගන්න පුළුවන් එතකොට.
Trip Pisso යූටියුබ් නාලිකාවෙනි.
