ලංකාවේ ජනතාව අමාරු, අවදානම් තත්ත්වයක සිටින බවත් සමස්ත ජනතාව දරිද්රතාව මන්දපෝෂණය හා නිරාහාරයෙන් සිටින බවත් එයට හේතුව 2021 වස්තු භංගත්වය බවත් අරගලයෙන් කරන ලද ඉල්ලීම මත සමගි ජන බලවේගය ශ්රේෂ්ඨාධිකරණය හමුවට ගොස් මේ රට බංකොලොත් කළ පුද්ගලයන් නම් වශයෙන් අනාවරණය කර ගැනිමට හැකිවුවත් මේ වන තෙක් ඔවුන්ට ලබා දෙන දඩුවම් සම්බන්ධයෙන් රජය කිසිදු පියවරක් නොගෙන ආර්ථික ඝාතකයන් ආරක්ෂා කරමින් සමස්ත ජනතාවට දඩුවම් ලබා දෙමින් කටයුතු කරන බව සමගි ජන බලවේග පාර්ලිමේන්තු මන්ත්රී කබීර් හෂීම් මහතා අද (11) පාර්ලිමේන්තුවේදී පැවසීය.
ඒ මහතා මේ බව කියා සිටියේ අද පාර්ලිමේන්තුවේ පැවැති ජීවන වියදම ඉහළ යාම සහ මන්දපෝෂණ තත්ත්වය වළක්වා ගැනීම සඳහා වන විවාදයේදී අදහස් දක්වමිනි. එහි දී අදහස් දැක්වූ සමගි ජන බලවේග පාර්ලිමේන්තු මන්ත්රී කබීර් හෂීම් මහතා කියා සිටියේ දේශීය ණය ප්රතිව්යුහගත කිරීමේ දී සුපිරි ධනවතුන් ආරක්ෂා කරමින් වැඩ කරන ජනතාවගේ අර්ථ සාධක අරමුදලට බදු ගැසූ බවත් බදු ප්රතිපත්තිය තුළ දී පවා සුපිරි පොහොසතුන් ආරක්ෂා කර සාමාන්ය ජනතාවට අධික බදු ප්රතිපත්තියක් ක්රියාත්මක කරන බව යි.
මේ රටේ පොදුජනතාව රට බංකොලොත් නොකළ බවත් රට බංකොලොත් කළේ ආණ්ඩුවේම පුද්ගලයන් බවත් ඔවුන් අයි. එම්. එෆ්. එකේ නිර්දේශ යැයි පවසමින් බදු ගසමින් ජනතාව පීඩාවට පත් කරන බවත් හෙතෙම පැවසීය.
