ආර්ථික අර්බුදය නිසා 2022 මාර්තු මාසයේ සිට ලංකාවේ පවුල් 34,48,000කට ආසන්න සංඛ්යාවකගේ ආදායම් පහළ ගොස් ඇති බව ජන හා සංඛ්යාලේඛන දෙපාර්තමේන්තුවේ වාර්තාවලින් අනාවරණ වන බව පේරාදෙණිය විශ්වවිද්යාලයේ ආර්ථික විද්යා සහ සංඛ්යාන අධ්යයන අංශයේ මහාචාර්ය වසන්ත අතුකෝරල මහතා ‘මව්රට’ට පැවැසීය. (Sri Lanka Latest News)
ඒ අනුව සමස්ත ගෘහ ඒකකවලින් 60.5%ක ආදායම් පහළ යෑමක් පෙන්නුම් කරන බවද ඔහු සඳහන් කළේය.
වැඩිම ආදායම් පහළ යෑමක් පෙන්නුම් කරනු ලබන්නේ වතු අංශයෙන් වන අතර, ඒ තුළ සිටින ගෘහ ඒකක 2,70,000ක ප්රමණයකින් 1,70,000කට ආසන්න ප්රමාණයක ආදායම පහළ යෑමක් පෙන්නුම් කරනු බවද සඳහන්ය.
දෙවැනුව ග්රාමීය ජනතාවගේ ආදායම් පහළ යෑමක් පෙන්නුම් කරන අතර, ලංකාවේ ග්රාමීය ජනගහනය මිලියන 16.7කි. එය මුළු ජනගහනයෙන් 79%ක් බවද සඳහන්ය.
ග්රාමීය ප්රදේශවල ගෘහ ඒකක 45,00,000කට ආසන්න ප්රමාණයක් තිබෙන අතර, එයින් 27,00,000කට වඩා වැඩි පවුල් සංඛ්යාවක ආදායම් පහළ ගොස් ඇති බව හෙළිව තිබේ.
රටේ නාගරික ජනගහනය මිලියන 3.6ක් පමණ වේ. ඒ තුළ පවුල් 9,50,000කට ආසන්න වශයෙන් සිටින අතර, එම පවුල්වලින් 5,00,000කට වැඩි ප්රමාණයකගේ ආදායම් පහළ යෑමක් පෙන්නුම් කරන බවයි මහාචාර්යවරයා වැඩිදුරටත් පැවැසුවේ.
ප්රේමලාල් විජේරත්න
