රටක් තුළ සුබසාධන රාජ්ය අත්යාවශ්ය දෙයක් බවත් සුබසාධන රාජ්ය තුළින් ආරක්ෂක දැලක් නිර්මාණය වන බවත් එය සමාජ ආරක්ෂණ දැල ලෙස හදුන්වන බවත් ඒ හරහා ජන සමාජයේ අහිංසක, අසරණ, කොන්වූ, වරප්රසාද නොලත්, සවිබල නොගත් කොට්ඨාසවලට පැතිකඩ ගණනාවකින් ශක්තිය ලබා දීම සිදුවන බවත් විපක්ෂ නායකවරයා පැවසීය. Sri Lanka Latest News
1996 අංක 28 දරන පනත, 2003 සංශෝදිත පනත, 2004 ආබාධිත ප්රජාව වෙනුවෙන් ජාතික ප්රතිපත්තිය, 2014 ජාතික ක්රියාකාරි සැලසුම මෙන්ම 2015 ජාත්යන්තර ප්රඥප්තියට අනුගත වීම යනාදීය සිදු වුවත් රට තුළ නීති පද්ධතිය ශක්තිමත් විය යුතු බවත් විපක්ෂ නායකවරයා පැවසීය.
2012 සංගණනයෙන් සියයට 8.7ක් එනම් ලක්ෂ 16කට වැඩි ප්රමාණයක් ආබාධිත ප්රජාව සිටින බවට හෙළිදරව් වී ඇති බවත් නව සංගණනයෙන් යාවත්කාලීන දත්ත ලබා ගත හැකි බවත් පැවසූ විපක්ෂ නායකවරයා කියා සිටියේ ක්රිකට් ක්රීඩාව වෙනුවෙන් 225 දෙනාම එකතු වූවා සේ 225 දෙනාම එකට එකතු වී ආබාධිත පුද්ගලයන්ගේ විශේෂ අයිතිවාසිකම් මූලික අයිතිවාසිකමක් ලෙස ස්ථාපිත කළ යුතු බවයි.
විපක්ෂ නායක සජිත් ප්රේමදාස මහතා මේ බව කියා සිටියේ අද (4) පාර්ලිමේන්තුවේ දී ආබාධිත පුද්ගලයින් සඳහා වූ පාර්ලිමේන්තු සංසදයේ විශේෂ උත්සවය අමතමිනි.
මේ සඳහා නව ආණ්ඩුක්රම ව්යවස්ථා සංශෝධනයක් සිදුවිය යුතු බවත් මූලික අයිතිවාසිකම් පරිච්ඡේදයට මෙය ඇතුළත් කර එය මූලික සිවිල් අයිතිවාසිකමක් බවට පත් කළ යුතු බවත් පැවසීය.
1988 රාජ්ය පරිපාලන චක්රලේඛය අනුව රජයේ රැකියා ලබා දීමේ දී අවම වශයෙන් යම් ප්රතිශතයක් ආබාධිත පුද්ගලයන් වෙනුවෙන් ලබා දිය යුතු වුවත් ඒ දේ මේ වන විට ක්රියාත්මක වන බවට සෙවිය යුතු බවත් විපක්ෂ නායක සජිත් ප්රේමදාස මහතා මෙහි දී පැවසීය. එය සිදු නොවන්නේ නම් රාජ්ය පරිපාලන ක්ෂේත්රය තුළින් මානව අයිතිවාසිකම් උල්ලංඝනය වීමක් සිදුවන බවත් විපක්ෂ නායකවරයා තවදුරටත් අවධාරණය කළේය.
රටේ ආබාධිත ප්රජාවට යම් අගතියක් ගැටලුවක් තිබේ යැයි පිළිගන්නේ නම් එම අඩුපාඩුවට සරිලන ආකාරයට රාජ්ය සුබසාධන යාන්ත්රණයේ දැල සකස් විය යුතු බවත් පැවසූ විපක්ෂ නායකවරයා කියා සිටියේ ආබාධිත ප්රජාව වෙනුවෙන් පෙනී සිටින විවිධ සංවිධාන එක මතයකට පැමිණිය යුතු බවත් එය දේශපාලන පොර පිටියක් නොවිය යුතු බවත් ය. මේ ගැටුම 2007 සිට සිදුවූ නිසා හරි පනතක් ගෙන ඒමට නොහැකි වූ බවත් පැවසු විපක්ෂ නායකවරයා කියා සිටියේ සමාජ සුබසාධන අමාත්යාංශය මෙවැනි ඉදිරි ප්රගතියක් කරා යාමට ලබා නොදෙන බව යි. එබැවින් මේ විෂය රටේ ජනාධිපතිවරයා හෝ අගමැතිවරයා යටතට යා යුතු බවත් ආබාධිත ප්රජාවගේ ගැටලුවලට බහුවිධ ක්රමවේදයක් අනුගමනය කර රජයේ සියලුම ආයතන සම්බන්ධීකරණය කරන විසදුම් සපයන වැඩපිළිවෙළකට යා හැකි බවත් විපක්ෂ නායක සජිත් ප්රේමදාස මහතා මෙහි දී වැඩිදුරටත් පැවසීය.
එසේම මේ දේවල් හරියට සිදුවෙනවාද යන්න සොයා බැලීමට කොමිෂන් සභාවක් සහ ජනාධිපති කාර්යසාධන බලකායක් ඇති කළ යුතු බවත් රටේ ජනතාව මුහුණ දෙන බදු සූත්රවලට ආබාධිත ජනතාව ලක් නොකර ඔවුන්ට විශේෂ වරප්රසාද ලබා දිය හැකි බදු සූත්රය වෙනස් කළ යුතු බවත් ඊට අමතරව ආබාධිත ප්රජාව තාක්ෂණයෙන් දැනුමෙන් සන්නද්ධ කළ පුද්ගල කුසලතාව වැඩි කළ යුතු බවත් විපක්ෂ නායකවරයා මෙහි දී අවධාරණය කළේය.
