“දූෂිත ශ්රී ලංකා ක්රිකට් ආයතනයේ සභාපති ඇතුළු නිලධාරී මණ්ඩලය ඉවත් කිරීම” සඳහා ආණ්ඩු පක්ෂය සහ විපක්ෂය ඒකාබද්ධව ගෙන එන යෝජනාව අද (නොවැ. 9) පාර්ලිමේන්තුවේදී ඡන්ද විමසීමකින් තොරව ඒකමතිකව සම්මත විය.Sri Lanka Latest News
ක්රීඩා, යෞවන කටයුතු හා වාරිමාර්ග අමාත්ය රොෂාන් රණසිංහ පාර්ලිමේන්තුවේදී ඊයේ (නොවැ. 8) ආන්දෝලනාත්මක ප්රකාශයක් කළ අතර එම කරුණුවලට අනුව ක්රිකට් පාලක මණ්ඩලයට විරුද්ධව පාර්ලිමේන්තුවේ යෝජනාවක් සම්මත කළ යුතු බවට විපක්ෂ නායක සජිත් ප්රේමදාස සඳහන් කළේ ය.
ඒ අනුව, ඒ පිළිබඳව අවසන් තීරණයක් ගැනීම සඳහා තීරණාත්මක විවාදයක් අද දිනය පුරා පාර්ලිමේන්තුවේදී පැවැත්විණි.
ඡන්ද විමසීමට පෙර පාර්ලිමේන්තුව ඇමතූ ක්රීඩා අමාත්ය රොෂාන් රණසිංහ සඳහන් කළේ, ජාතික ජන බලවේගයේ මන්ත්රීවරුන් සභාව තුළ දක්නට නොමැති බව ය.
“ජාතික ජන බලවේගය හැර, ජනතා විමුක්ති පෙරමුණ හැර අනෙක් පක්ෂ ඔක්කොම ඉන්නවා. එතුමන්ලා මේකට එකඟ ද මොකක් ද කියන එක අපි දන්නේ නෑ. මේ රටේ ම මිනිස්සුන්ට ක්රීඩාවේ ප්රශ්නයක් තියෙද්දී ජනතා විමුක්ති පෙරමුණට විතරක් ක්රිකට් එක හොඳ වුණා ද කියන එක මට ප්රශ්නයක්.”
ඔහු වැඩිදුරටත් සඳහන් කළේ, ජනතා පරමාධිපත්යයේ මතයට අනුව ඉල්ලා සිටින්නේ, ශ්රී ලංකා ක්රිකට් ආයතනයේ නිලධාරීන්ට ගෞරවාන්විතව ඉල්ලා අස්වන ලෙස බව ය.
අද පැවති විවාදය අතරතුරදී නාගරික සංවර්ධන හා නිවාස අමාත්ය සහ අාණ්ඩු පක්ෂයේ ප්රධාන සංවිධායක ප්රසන්න රණතුංග අදහස් දක්වමින් සඳහන් කළේ, ජනතා විමුක්ති පෙරමුණේ අරමුදලට ෂම්මි සිල්වා මුදල් ලබා දී ඇති බවට තමන්ට තොරතුරු ලැබී ඇති බව ය.
