කොටි (එල්ටීටීඊ) සංවිධානයේ නායක වේළුපිල්ලේ ප්රභාකරන්ගේ දියණිය වන ද්වාරකාගේ යැයි පැවසෙන වීඩියෝවක් මේ වනවිට සමාජ මාධ්ය ජාලාවල සංසරණය වෙමින් පවතින බව ඉන්දීය මාධ්ය වාර්තා කොට ඇත.Sri Lanka Latest News
එම මාධ්ය පෙන්වා දෙන්නේ ද්වාරකා සහ ඇගේ සැමියා වන ‘දයාබර රාජ්’ මුහුදු මාර්ග ඔස්සේ ශ්රී ලංකාවට පැමිණ ඇති බවය.
මොවුන් දෙදෙනා ඉන්දියාවේ රාමේෂ්වරම් මණ්ඩපම් සරණාගත කඳවුරේ ආරක්ෂාව යටතේ සිටි බවත්, හොර රහසේ පාරුවකින් ශ්රී ලංකාවට පැන ගොස් ඇති බවත් DT NEXT පුවත් වාර්තාවේ දැක්වේ.
එම පලායාම පිළිබඳව තමිල්නාඩු පොලිස් නිලධාරීන් දැනගත්තේ පලාගිය කාන්තාව ඝාතනයට ලක්වූ එල්.ටී.ටී.ඊ නායක ප්රභාකරන්ගේ දියණිය වන ද්වාරකා ලෙස දැක්වෙන වීඩියෝවක් ලංකාවේ සමාජ මාධ්යවල පළවීමෙන් පසුව බව එහි වැඩිදුරටත් සඳහන්ව තිබේ.
කේ. දයාබර රාජ් සහ ඔහුගේ බිරිඳ ‘උදයකලා’ ලෙස හඳුනාගෙන ඇති ශ්රී ලාංකික යුවළ තමිල්නාඩු සරණාගත කඳවුරක සිට ඇති අතර 2016 වසරේදී තිරුචි විශේෂ කඳවුරේ සිටි රාජ්, රාමනාථපුරම්, මණ්ඩපම් හි පිහිටි විශේෂ නිරෝධායන කඳවුරේ තම පවුල නීති විරෝධී ලෙස රඳවා තබාගෙන සිටින බවට චෝදනා කරමින් දින නියමයක් නොමැතිව උපවාසයක් ආරම්භ කර ඇත.
ඔහුගේ ඉල්ලීමට අනුව, මදුරාසි මහාධිකරණයේ මදුරෙයි විනිසුරු මඩුල්ල විසින් ජාත්යන්තර පොලිසියට අවශ්යව සිටින රාජ් නැමැත්තා පැය 24 පුරා ආරක්ෂක ආවරණයක් නොමැති මණ්ඩපම් කඳවුරට මාරු කරන ලෙස රජයට නියෝග කොට ඇත.
“මේ දෙන්නා ඉන්න තිබුණේ ආදායම් දෙපාර්තමේන්තුවේ අධීක්ෂණය යටතේ. නමුත් උදයකලාගේ වීඩියෝවක් මේ වනවිට මතුව තිබෙනවා. එම වීඩියෝවේ ඇය විස්තර කර තිබුණේ මියගිය කොටි නායක ප්රභාකරන්ගේ දියණිය වන ද්වාරකා ලෙසයි,” යනුවෙන් මූලාශ්ර DT Next වෙත පවසා ඇත.
ප්රවෘත්ති වාර්තාව අනුව මෙම යුවළ ඔවුන්ගේ දරුවන් තිදෙනා සමඟ වසර දෙකකට පමණ පෙර හොර රහසේ මණ්ඩපම් කඳවුරෙන් නීතිවිරෝධී තොටුපළකින් පිටව ගොස් ඇත.
