ලංකාවේ ජනතාවට මොන තරම් හොඳ පොදු පහසුකම් ලබා දුන්නත් සමහර කණ්ඩායමක් ඉන්නවා, ඒවා හරියට පාවිච්චි කරන්න දන්නේ නැහැ. උදාහරණයක් විදියට අලුත් බස් එකක්, කෝච්චියක් දැම්මාම සතියක් යන්න ඉස්සෙල්ලා ඒවයේ සීට් ඉරනවා. බලිකුරුටු අඳිනවා. කෑලි ගලවන් යනවා. ඉස්සරහා සීට් එකේ උඩ කකුල තියාගෙන යනවා. ඒකට කියන්නෙ විනයක් නැතිකම කියලා. හැබැයි පසුගිය කාලෙ සමාජ මාධ්ය ජාලවල රැල්ලක් හැදුණා රටේ විනය තියෙන පිරිසක් බිහිකරන්න. ඒකට මූලිකත්වය ගත්තෙ තරුණ පිරිස්. මේ වගේ වැරැදි කරන, විනය නැති අයගෙ ඡායාරූප සමාජමාධ්ය ජාලවල පළ කරලා එහෙම නොකරන තැනට ඒ තරුණ පිරිස් වැඬේ අරගෙන ගියා. ඒ නිසාම ඒ සිදුවීම්වල යම් පාලනයකුත් දැකගන්න ලැබුණා.
ඒ කොයිහැටි වෙතත් පසුගිය සතියෙ සමාජ මාධ්ය ජාලවල මේ වගේම තවත් පින්තූරයක් පළවුණා. සිද්ධිය වෙලා තිබුණෙ ශ්රී ලංකා බටහිර ඉන්දීය කොදෙව් දෙවැනි එක් දින තරගයේදී. සූරියවැව මහින්ද රාජපක්ෂ ක්රීඩාංගණයේ පැවැති මේ තරගය බලන්න ආපු කොටපොළ ප්රාදේශීය සභාවෙ මන්ත්රිවරු දෙන්නෙක්ගෙන් එක් අයෙක් තමන්ගෙ කකුල ඉස්සරහ සීට් එක උඩ තියාගෙන ඉන්න දර්ශනයක් තමයි ඡායාරූපයෙන් පේන්න තිබුණෙ.
එය නැරැඹීමට පැමිණ සිටි මාතර දිස්ත්රික්කයේ කොටපොළ ප්රාදේශීය සභාවේ මන්ත්රී සංජය ක්රිෂාන්ත මහතා ඇතුළු ප්රාදේශීය සභා සභාපතිවරු, මන්ත්රිවරු විශාල පිරිසකට මේ සඳහා ආරාධනා ලැබී තිබිණි. එම ක්රිකට් තරගය නැරැඹීම සඳහා ගිය සංජය ක්රිෂාන්ත මන්ත්රිවරයා තමයි මෙහෙම වාඩි වී සිටි ස්ථානය ඉදිරිපිට තිබෙන ආසනයකට පාදයක් තබාගෙන සිටියේ. මන්ත්රිවරයා අසල ප්රාදේශීය සභාවේ උප සභාපති සංජීව අරුක්ගොඩ මහතාද සිටින බවද දර්ශනගතව තිබුණා. ඒ වගේ ස්ථානයකදී ඉදිරිපස අසුනට පාදයක් තබාගෙන සිටීම සුදුසුද යන්න ගැන ‘මව්රට’ කොටපොළ ප්රාදේශීය සභා මන්ත්රි සංජය ක්රිෂාන්ත මහතාගෙන් විමසුවා. ඔහු ඒ ගැන අසද්දී බොහොම කාරුණිකව සඳහන් කර සිටියේ මෙවැන්නක්,
වැරැද්දක් වුණා; මම සමාව ගත්තා – මන්ත්රී සංජය
‘මම විතරක් නෙවේ දකුණේ ප්රාදේශීය සභාවල විශාල පිරිසකට මේ ක්රිකට් තරගය නැරැඹීමට ආරාධනා ලැබිලයි තිබුණෙ. ඒ නිසා අපිත් තරගය බලන්න ගියා. දෙවැනි ඉනිම තරග කරද්දී තමයි අපි ඒ නැරැඹුම් මැදිරියට ඇතුළු වුණේ. ක්රීඩා ලෝලීන් ප්රීති ප්රමෝදව කෑ ගසන විට අපිත් ඒ අයට සවියක් දුන්නා. ඒ වෙලාවේ හිඳගෙන සිටි මට මොනවද වූයේ කියල දැනුණෙ නැහැ. මගෙ අතින් වුණු ඒ වැරැද්ද ගැන ෆේස්බුක් එකේ ඡායාරූප සමඟ පළවුණාට මම ඒ ගැන සියලු දෙනාගෙන්ම සමාව ගත්තා. ඇරත් මම සිටියෙ මැති ඇමැතිවරුන් සඳහා වෙන්වුණු කොටසක නොවෙයි. මේ වගේ සුළු දේවල් ලොකු කර අපට පහරගහන්නෙ අපේ ප්රතිවාදී අයයි. මේ අවස්ථාවේ මම සමඟ අපේ ප්රාදේශීය සභාවේ උප සභාපති සංජීව අරුක්ගොඩත් හිටියා.
කවුද ඕක කිව්වෙ: කියපු කෙනා මට කියන්න – මන්ත්රී සංජීව
‘ඒ ගැන ‘මව්රට’ සංජීව අරුක්ගොඩටත් කතා කළාම ඔහු අපෙන් ඇහුවේ කවුද ඒ බව කීවේ කියලයි. ඒ විතරක් නෙවෙයි එයාගෙ ජංගම දුරකතන අංකය දුන්න කෙනා කවුද කියලා අපෙන් ප්රශ්න කරලා දුරකතනය විසන්ධිකරලා නොම්මරය දුන්න අය හොයන්න යනව කීවා.
මේවාට තරහ අරන් හරියන්නේ නැහැ – කොටපොළ සභාපති
එතැනින් නොනැවැතී ‘මව්රට’ කොටපොළ ප්රාදේශීය සභාවේ සභාපති දයානන්ද අබේවික්රම මහතාගෙන්ද මේ ගැන විමසුවා. ඔහු ලබාදුන්නේ කාරුණික උත්තරයක්.
‘මමත් ඒ ක්රිකට් තරගය බලන්න ගියා. මම නම් හිටියේ ඔය කියන මන්ත්රිවරයා සිටි තැනට ටිකක් ඉහළ කොටසකයි. මම තරගය බැලුව මිසක් මේ වගේ සිද්ධියක් දැක්කෙ නැහැ. මම මේ ගැන දැක්කෙ ෆේස්බුක් එකෙන්. ඔයවගේ දේවල්වලට තරහ අරන් හරියන්නෙ නැහැනෙ.
ප්රේමලාල් විජේරත්න
