දූෂණ විරෝධී පනත් කෙටුම්පත සදහා ඡන්දය විමසීම එළැඹෙන 19වන දා පැවැත්වීමට නියමිත ය.Sri Lanka Latest News
එහිදී, තමන්ගේ මන්ත්රීවරුන්ට, ඔවුන්ගේ අභිමතය පරිදි පනත් කෙටුම්පතට පක්ෂව හෝ විපක්ෂය ඡන්දය ලබා දීම සදහා පක්ෂය අවසර දී තිබෙන බව එම පක්ෂයේ මහලේකම් සාගර කාරියවසම් මහතා පවසා තිබේ.
ඔහු මේ බව පවසා ඇත්තේ, ඩේලි මිරර් පුවත්පත සමගයි.
පනත් කෙටුම්පතේ ඇතැම් වගන්ති පිළිබදව එකගවිය නොහැකි තත්ත්වයක් පවතින බව පක්ෂ මහලේකම්වරයා පවසා තිබේ.
විශේෂයෙන්ම, අල්ලස් සිදුවීමක් සම්බන්ධයෙන් එල්ල වී තිබෙන හුදු පැමිණිල්ලක් මත, මහේස්ත්රාත්වරයෙකුගේ අවසරයකින් තොරව අත්අඩංගුවට ගැනීමට ඇති හැකියාව සම්බන්ධයෙන් තමන්ට ගැටළුවක් පවතින බව පොහොට්ටු පක්ෂ මහලේකම්වරයා පවසයි.
මේ සම්බන්ධයෙන් වූ පොහොට්ටු පක්ෂයේ සංශෝධන අධිකරණ අමාත්යවරයා වෙත ඉදිරිපත් කළද, ඔහු එම සංශෝධන ප්රතික්ෂේප කර තිබෙන බව වාර්තා වේ.
අධිකරණ අමාත්යවරයාගෙන් මේ පිළිබදව ඩේලි මිරර් පුවත්පත විමසූ විට ඔහු පවසා ඇත්තේ, දූෂණ විරෝධී පනත සම්මත වීම වැලැක්වීමට කිසියම් බලවේගයක් කුමන්ත්රණය කරමින් සිටින බවයි.
මේ අතර, සමගි ජන බලවේගයද දූෂණ විරෝධී පනතට සංශෝධන ඉදිරිපත් කර තිබේ.
ඔවුන්ගේ ප්රධානම තර්කය වී ඇත්තේ, ඉදිරිපත් කර තිබෙන දූෂණ විරෝධී පනත අතීතයට බලපාන බවක් නොපෙනෙන බවයි. ඒ අනුව, අතීතයටද මේ පනත බලපාන බවට වූ වගන්තියක් පනතට ඇතුළත් කරන ලෙස ඔවුන් ඉල්ලා සිටියි.
එවැනි විශේෂ වගන්තියක් නොතිබුනද, පනත සම්මත වුවහොත්, එය අතීතයටද බලපාන බව අධිකරණ අමාත්යවරයාගේ අදහසයි.
