කප්පම් ගත් ප්‍රබල ඇමැතිගේ හා ‌ප්‍රකට දේශපාලන ව්‍යාපාරිකයකුගේ හඬපට එළියට (රාජ්‍ය රහස්)

පහුගිය දිනවල රටේ ප්‍රධානම මාතෘකාව බවට පත්ව තිබුණේ රන්ජන් රාමනායකගේ හඬපටය. හැම තැනම කතාවට ලක්වුණේත්, සමාජ මාධ්‍යවල ප්‍රධාන තැනක් ගෙන තිබුණේත් රන්ජන්ගේ හඬපටවල තිබුණු කතාය. නමුත් මේ වන විට රන්ජන්ගේ හඬපට පවා පරාජයට පත්කරන මහත් ආන්දෝලනාත්මක හඬපට කිහිපයක් ඉදිරි දින කිහිපය ඇතුළත රටට හෙළිදරව් කිරීමට එක්තරා විශේෂ පුද්ගලයකු සූදානම්ව සිටින බව ආරංචිය. ඒ වෙන කවුරුවත් නොව ඇවන්ගාඞ් සභාපතිවරයා වූ නිශ්ශංක සේනාධිපතිය.
ඒ අනුව සේනාධිපති හෙළිකිරීමට යන්නේ එසේ මෙසේ කතාවක් නොව තමන් අත්අඩංගුවේ සිටියදී හිටපු ආණ්ඩුවේ ප්‍රබලයන් දෙදෙනකු තමන්ගෙන් කප්පම් ඉල්ලූ ආකාරය දැක්වෙන හඬපටය. එම කප්පම්ද එසේ මෙසේ ගණන් නොව කෝටි 5, කෝටි 10 ආදියේ ගණන්වලින් යුත් අති දැවැන්ත මුදල් කන්දරාවන්ය. ඊට ඉකුත් ආණ්ඩුවේ ප්‍රබල අමාත්‍ය ධුරයක් දැරූ එජාපයේ දකුණ නියෝජනය කරන ප්‍රබල අමාත්‍යවරයකුද, හිටපු ප්‍රබලම අයකුගේ ව්‍යාපාරික සහෝදරයකුද සම්බන්ධව සිටින බව මෙම හඬපට තුළින් එළියට පැමිණීමට නියමිතය. අදාළ එජාප දේශපාලනඥයා සේනාධිපතිගෙන් ලබාගත් අදාළ කප්පම් මුදල් තවමත් ගෙවා නොමැති අතර යටකී ව්‍යාපාරිකයා නම් සේනාධිපති සිරගතව සිටියදී තමන් ලබාගත් කප්පම් මුදලින් නැවැත කෝටි පහක මුදලක් සේනාධිපතිට ලබාදී ඇති බවද දැනගන්නට ඇත. මේ දෙදෙනාම අදාළ කප්පම් මුදල් රැගෙන ඇත්තේ සේනාධිපතිට එරෙහිව පැවැත්වෙන පරීක්ෂණ යට ගැසීමේ පොරොන්දුව මත බවද ආරංචිය.
මේ සියලු තොරතුරු මේ වන විට සේනාධිපති හඬපට සමඟද රහස් පොලිසියට භාරදී අවසානය. එමෙන්ම බන්ධනාගාරයේ සිට ඇප ලැබීමෙන් පසුව පිටතට පැමිණි සේනාධිපති මේ සියලු තොරතුරු ජනාධිපතිවරයාටත්, අගමැතිවරයාටත් ලබාදී ඇති බවක්ද දැනගන්නට ඇත. කෙසේ වෙතත් සේනාධිපති මුලින් මුලින් මෙම සංවාද පටිගත කර නොමැති වුවද පසුව අදාළ කප්පම් ගැනීම සම්බන්ධයෙන් බලධාරීන් දැනුවත් කිරීමෙන් පසුව ඔහුට උපදෙස් ලැබී ඇත්තේ මෙම සියලු සංවාද පටිගත කරන ලෙසටය. ඒ අනුව සේනාධිපති මෙම දේශපාලන ප්‍රබලයාගේත්, ව්‍යාපාරික ප්‍රබලයාගේත් සංවාද පටිගත කොට ඇති අතර, ඉදිරි දින කිහිපය ඇතුළත එළියට ඒමට නියමිතව ඇත්තේ එම සංවාදයන්ය.