මැයි 18 “දෙමළ ජන සංහාර අනුස්මරණ දිනය” ලෙස කැනඩා පාර්ලිමේන්තුව පසුගිය වසරේ දී ඒකමතිකව සම්මත කරගෙන තිබේ.
ඒ අනුව, දෙමළ ජන සංහාර අනුස්මරණ දිනය යෙදී තිබුණු ඊයේ දිනයේ දී කැනඩා අග්රාමාත්යවරයා යුද්ධයෙන් මියගිය දෙමළ ජාතිකයන් සිහිපත් කරමින් විශේෂ නිවේදනයක් නිකුත් කර තිබුණි.
සිවිල් යුද්ධයෙන් මිය ගිය පුද්ගලයන්ගේ සහ දිවිගලවා ගත් තැනැත්තන්ගේ අයිතිවාසිකම් වෙනුවෙන් පෙනී සිටීම කැනඩාව කිසිදිනෙක අත් නොහරින බව අග්රාමාත්ය ජස්ටින් ටෲඩෝ මහතා පවසයි.
මීට වසර දාහතරකට පෙර, සිවිල් යුද්ධයේ අවසන් අදියරේ දී සිදු වූ දහස් සංඛ්යාත ජීවිත හානි පිළිබදව අද දිනයේ දී සිහිපත් කරන බව පවසන අග්රාමාත්යවරයා, කැනේඩියානුවන්ගේ හදවත්, යුද්ධයෙන් මිය ගිය දහස් සංඛ්යාත දෙමළ ජාතිකයන්, දිවිගලවාගත්තවුන් සහ අහිමිවීමේ වේදනාවෙන් පීඩාවත් පත්ව සිටින ඔවුන්ගේ ආදරණීයයන්ගේ හදවත් සමග සදාකාලිකවම බැදී පවතින බවද පවසයි.
ලංකාවේ පැවති සිවිල් යුද්ධයෙන් පීඩාවට පත් දෙමළ ජාතිකයන්ගේ වේදනාත්මක කතා රට පුරා සෑම ප්රදේශයකින් ම තමන්ට අසන්නට ලැබුණු බව පවසන අග්රාමාත්යවරයා, එම කතා කිසි දිනෙක තමන්ට අමතක කළ නොහැකි බව කියයි.
ලංකාව, මානව හිමිකම් ආරක්ෂා කළ යුතු බවට වන යෝජනා ජගත් මානව හිමිකම් කවුන්සිලයට ඉදිරිපත් කිරීමේ දී කැනඩාව ප්රමුඛතම කාර්ය භාරයක් ඉටු කරන බව අග්රාමාත්ය ජස්ටින් ටෲඩෝ පවසයි.
ලංකාවේ සිදු වී තිබෙන මානව හිමිකම් උල්ලංඝණය කිරීම් සදහා දක්වන ප්රතිචාරයක් ලෙස ශ්රී ලංකා රජයේ නිළධාරීන් සිව් දෙනෙකුට එරෙහිව කැනඩාව මේ වන විටත් සම්බාධක පනවා ඇති බවද අග්රාමාත්යවරයා සිහිපත් කරයි.
දෙමළ ඩයස්පෝරාව, සිය රටේ ආර්ථිකයට දක්වා තිබෙන දායකත්වය කැනඩා අග්රාමාත්යවරයාගේ පැසසුමට ලක්ව තිබේ.
ලංකාවේ සිවිල් යුද්ධයේ බලපෑම පිළිබදව අධ්යයනය කරන ලෙස ද අග්රාමාත්යවරයා සියළු කැනේඩියානුවන්ගෙන් ඉල්ලා සිටියි.
