සුද්ද විදපු පළමුවැනි ගල

ලංකාවේ දුම්රිය මාර්ග පද්ධතියේ තියෙන ආකර්ෂණීයම දේ අතර ප්‍රධානම තැනක් බිංගෙවල් සඳහා හිමි වෙනවා. මේ බිංගෙවල් අතරින් වැඩි ප්‍රමාණයක් හමුවෙන්නේ උඩරට දුම්රිය මාර්ගයේදී. හැබැයි උඩරට දුම්රිය මාර්ගයේ හමුවෙන මුල්ම බිංගෙයට නම් කොළඹ ඉඳන් ඒ තරම් දුරක් යන්න ඕනෑ නැහැ. ප්‍රධාන දුම්රිය මාර්ගයේ පළමු බිංගෙය හමුවන්නේ මීරිගම හා අඹේපුස්ස අතරේ පිහිටි බෝතලේ දුම්රිය ස්ථානයට ආසන්නයෙන්.

දුම්රිය මාර්ගයේ දුර මිනුම් ක්‍රමය අනුව කොළඹ ඉඳන් මේ බිංගේට තියෙන දුර සැතපුම් 32යි දම්වැල් 44 කියලා සටහන් වෙනවා. මේ බිංගෙයි දිග අඩි 247ක් ලෙසත්, පළල අඩි 14ක් ලෙසත්, උස අඩි 18ක් ලෙසත් සඳහන් වෙනවා. ඒ වගේම ලංකාවේ ඇති උසින් වැඩිම බිංගෙවල් දෙකෙන් එකක් විදියටත් මේ බිංගෙය සැලකෙනවා.

අශ්ව ලාඩමක හැඩය පෙන්නුම් කෙරෙන මේ බිංගෙය ඉදිවෙලා තියෙන්නේ 1863 වසරේදී. ප්‍රධාන මාර්ගය ද්විත්ව දුම්රිය මාර්ගයක් බවට පත් කිරීමේදී මේ බිංගෙයට සමාන්තරව තවත් බිංගෙයක් ඉදි වෙලා තියෙනවා. ලංකාවේ අංක 01 හිමි වෙලා තියෙන මේ බිංගෙයට ළඟින්ම පිහිටලා තියෙන බෝතලේ දුම්රිය ස්ථානය උප දුම්රිය ස්ථානයක් විදියටයි සැලකෙන්නේ. කොළඹ කොටුව සිට ගත් විට ප්‍රධාන මාර්ගයේ අංක 28 වැනි දුම්රිය ස්ථානය විදියට තමයි බෝතලේ සැලකෙන්නේ. බෝතලේ බිංගෙයි ඉතිහාසය ලංකාවේ දුම්රිය ඉතිහාසයේ උපත තෙක්ම දිව යන එකක් වුණත්, බෝතලේ දුම්රිය ස්ථානයට නම් ඒ තරම් පැරැණි ඉතිහාසයක් නැහැ. 1980 වර්ෂයේදී තමයි ශ්‍රී ලංකා දුම්රිය දෙපාර්තමේන්තුවට අයත් ප්‍රධාන මාර්ගයේ උප දුම්රිය ස්ථානයක් විදියට බෝතලේ උපත සිද්ධ වෙලා තියෙන්නේ. බෝතලේ දුම්රිය ස්ථානයේ සංකේතය BTL විදියටයි දැක්වෙන්නේ.

ඊළඟ වාරයේ බෝතලේ පහු කරගෙන ප්‍රධාන මාර්ගය දිගේ දුම්රියෙන් කොහේ හරි යද්දී මේ බිංගේ ගැන තොරතුරු ටිකත් මතක් කර ගන්න.
මලිදු කවිෂ්ක