කොරෝනා රෝගයට බඳුන්ව නව වැනි රෝගියා මිය ගිය පසු අපි මේ කතාව නැවත අසමින් සිටිමු. ඔබ මේ ලිපිය කියවනා මොහොත වන විටද ඒ මරණ සංඛ්යාව වැඩි නොවී තියේවායි අපි ප්රාර්ථනා කරමු. නමුත් කිසිවෙක් නොමැරෙන මිනිස්සු නොවේ. අපි සැවොම කවදා හෝ මරණයට මුහුණ දිය යුතුය. එය කවදා කෙළෙස කොහොම කොතැන සිදුවේදැයි අප කිසිවෙක්ට නිර්ණය කළ නොහැක. සමහර මරණාසන්න රෝගයක පෙළෙනා කෙනෙක් කිසිදා නොසිතූ ලෙස අනතුරකින් මිය යා හැක. සමහර විට හදිසි අනතුරකින් රෝහල් ගත වූ අයෙක් මියයන්නේ හෘද්යාබාධයකිනි. සුනාමිය අපේ මිනිසුන් තිස්දහකට වඩා ගෙන ගියේය. යුද්ධය නොසිතූ බොහෝ දිනවල මරණය රැගෙන ආවේය. අරණායක පස් යටට ගම් හතරක් යටවිය. මීතොටමුල්ල කුණු කන්දත් එහෙමය. ඊළඟට අප්රේල් 21 සිදුවීමය. උදේ ලස්සනට ඇඳ පැලඳ පල්ලි ගිය අහිංසක මිනිස්සු තවම ගේ දොරවලට ගොඩවුණේ නැත. බත් මාළු පිනි කුස්සිවල එහෙම්මම බලා උන්නේය. සමහර ගෙවල් දොරගුළු අරින්නට කෙනෙක්වත් ඉතිරි නොකර මරණය ඔවුන් සොයා ආවේය. මරණයේ හැටි එහෙමය.
මේ වතාවේ මරණය ඔබ මා සොයා එන්නේ වෙන වෙස් මූණක් දාගෙනය. මේ ලියනා තප්පරය වන විට ලෝකයේම කොරෝනා මරණ ලක්ෂ තුනකට ආසන්නය. ඒ මරණ ගොන්නට ලංකාවේ ජීවත් වූ ලාංකිකයන් නව දෙනෙක්ද එක්ව තිබේ. නමුත් ඒ මරණ “අපේ මිනිස්සු” යැයි එකම සිතකින් සමරන්නට අපි රටක් ලෙස සූදානම් නැති මුත් කොරෝනාවට ජාති ආගම් කුල වර්ග බේද නැති බව පමණක්වත් ඔබට වැටහේවා යි ප්රාර්ථනා කරමු.
නමුත් පළමු මරණයේ සිටම අපි අර්බුදයකට මුහුණ දුන්නෙමු. ඒ අවසන් කටයුතු කිරීමේ ප්රශ්නයකටය. ඒ සඳහා නිශ්චිත ක්රමවේදයක් ලෝක සෞඛ්ය සංවිධානය සිය නිල නිවේදනයක් ලෙස රටවලට එව්වේය. එසේම රටට දැනුවත් කිරීමම ආණ්ඩුවේ මෝඩකමක් බව, ආණ්ඩුවේ ප්රබල ඇමැතිවරයෙක් හා සමග නිවේදකයෙක් විරාමයක කී රහසක් පහුගිය දිනෙක රහසින් පිට විය.
“ඕක වෙනස් කරලා දැම්මා නම් ඉවරයිනෙ” ඔහු කීවේ ය.
ඒ අතර පළමු මරණය සිදුවිය. ඔහුගේ මළසිරුර ඉතාම ඉක්මනින් ආරක්ෂක විධි විධාන යටතේ කොටිකාවත්ත මුල්ලේරියාව ආදාහනාගාරයේ දී පිලිස්සුවේය. ඒ පිලිස්සූ අය අප සමග ඒ ගැන වරක් කීවේය.
“දොස්තර මහත්තුරු ඇවිල්ලා අපිට ලෙක්චර් එකක් වගේ එකක් දුන්නා. මේ ලෙඬේ ගැන, මේ ලෙඬේ බෝ වෙන හැටි ඒ වගේම මේ ලෙඬේට අදාළ විෂබීජ ගැන කියලා දුන්නා. ඒ විෂබීජය කොච්චර වෙලා තියෙන්න පුළුවන්ද කියලත් කිව්වා.”
මළසිරුර පුලුස්සන අවස්ථාවේ එක් අයෙක් පමණක් ආ බවත් ඔහු කීවේය.
“එක්කෙනෙක් ආවා. එයා ඇවිල්ලා අපිත් එක්කත් කතා කළා. මොනවද වෙන්න ඕන කියලා ඇහුවා. අපි කිව්වා මොනවවත් වෙන්න දෙයක් නෑ කියලා.”
“අපි ඒ සිරුර පිච්චුවා. මේක සෙල්සියස් දාහකට විතර රත්වෙන නිසා අළු වුණාට පස්සෙ විෂබීජ මොනවවත් තියෙන්නෙ නෑ, කිව්වා” ඔහු තවදුරටත් කීවේය.
නමුත් දෙවැනි මරණයත් සමග මේ කතාව අර්බුදයක් බවට පත් විය. දෙවැනි මරණය මීගමුව මඤ්ඤොක්කා හේන ආදාහනාගාරයේදී පුලුස්සනා විට පවුලේ කිසිවෙක් සහභාගි නොවූ බව ලංකාවේ රූපවාහිනි නාළිකාවක කියවුණේය.
“අපිට තාත්තාගෙ භූමදානෙ කරන්නවත් අවස්ථාවක් ලැබුණෙ නෑ, අපි අපේ කනත්තෙන් අඩි 8ක වළක් කපලා සූදානම් කරල තිබුණෙ. මාලිගාවත්තෙ කනත්තකත් උවමනා නම් සූදානම් කරල තිබුණා. අපි පවුලෙ කිහිපදෙනෙක් ඉඳලවත් අවසන් කටයුතු කරන්න අපිට බැරිවුණා, කාටවත් එහෙම වෙන්න එපා, පරිස්සම් වෙන්න. මහ රෑ අපි දන්නෙත් නෑ මිනිය ආදාහනය කරලා. කාටවත් වරදක් කියන්නෙ නෑ.
මොනවා කියන්නද තේරෙන්නෙ නෑ, අසරණයි. දෙරණ නිව්ස්වලට යනවා දැක්කා අවසන් කටයුතුවලට පවුලෙ කවුරුත් ආවෙ නෑ කියල. මට කෑ ගහල කියන්න හිතුනා තාත්තාව අපි තනිකළේ නෑ අදාහනය කළා අපි දන්නෙත් නෑ කියලා.”
මේ මීගමුව රෝහලේ දී මියගිය පුද්ගලයාගේ පුතා ‘තානිස්’ ඒ මරණය ගැන කී කතාවයි. ඔවුන් කියන්නෙ ආදාහනය ගැන ඔවුන් නොදැන සිටි බවයි.
මුස්ලිම්වරුන් සාමාන්යයෙන් සිය මියගිය සිරුර පුලුස්සන්නේ නැත. එය ඉස්ලාම් ආගමික අදහසකි. නමුත් ඔහු පලිස්සුවේය. ඔහුගේ සිරුර අවසන් වරට දකින්නටවත් කිසිම අයෙක්ට ඉඩක් ලැබුණේ නැත. විවිධ තර්ක විතරක් මැද ජාතිවාදය යළි කරළියට ආවේය. හකීම්ලා සිය ආගමානුකූලව අවසන් ගමක් ඉල්ලූ විට බන්දුල ගුණවර්ධන කීවේ එය දේශපාලන පොරොන්දුවක් බවය. කී විදියේ අවුලක් තිබුණමුත් කතාව ඇත්තය. මරණය කාටත් පොදු නම් අවසන් කටයුතුවලට බේදයක් අවශ්ය නැත. අනික් කාරණාව මේ ජාති ආගම් නැති ව්යසනයකදී ජාති කුල මොනම දේකටවත් අවශ්යයද නැත.
නමුත් නවවෙනි මරණයත් සමග ආයෙත් මේ කතාබහ කරළියට ඇවිල්ලා තිබේ. ඒ ගැන විවිධ පාර්ශ්ව විවිධ අදහස් පළකරන තැනටම කතාබහ අද වෙනකොට ගිහිල්ලාය. එයට හේතු වෙලා තියෙන්නේ එක මරණයකට පාංශුකුලයක් පවා දෙන්නට අවසර දීමත්, නවවැන්නාට ඒ කිසිම වරප්රසාදය නොලැබීමත් එක්කය. අපේ හමුදාපතිතුමා කියනා විදියට මී උණ හැදුණ වීරෝදාර රණවිරුවාගේ අවසන් කටයුතු කළෙත් ඒ විදියටය. ඔහුට අවසන් ගමන පුරුදු ගම් දොර මාවතක් දිගේ ගොස්, දන්නා කියන අය සමග එක සුසානයක නිදන්නට අවසර ලැඹුණේ නැත. එහෙමනම් මේ මියයන අයටවත් අපි සමානාත්මතාවයකින් සලකන්න පුරුදු වෙනවා නම් ඒක බොහෝම වටිනා දෙයක් බව අලුතෙන් කියා දිය යුතු නැත.
හිටපු පාර්ලිමේන්තු මන්ත්රී එස්.එම්. මරික්කාර් මේ ගැන සමාජ ජාල ඔස්සේ අදහස් දක්වලා තිබුණේය.
“ඒ ජනතාවට ගෞරවනීය ලෙස ජීවත් වීමේ අවස්ථාව ඔබ නොදුන්නට කමක් නෑ, ඔවුන්ට ගෞරවනීය ලෙස අවසන් ගමන් යන්න අවස්ථාවක් දෙන්න” ඔහු කියා තිබුණේය.
“නව වැනියට මිය අයට අවසන් ගෞරවය දැක්වීමේ අවස්ථාව හම්බුණේ එක පුතෙක්ට විතරයි. ඒ පවුලේ අයට ඒ අවස්ථාව ලැබුණෙ නෑ”
කියනා නිමිත්ත මත ඔහු කතා කර තිබුණේය. සමගි ජන බලවේගයේ නායක සජිත් ප්රේමදාසත් ට්විටර් පණිවුඩයක් නිකුත් කරමින් මේ වගේ අදහසක් කියා තිබුණේය. ඔහු කියන්නෙ මනුස්සයෙක්ගෙ ජීවිතයේ අවසාන අයිතිය විදියට සලකනා ගෞරවනීය අවසානයක් පිළිබඳ ප්රශ්න කරන තැනකට රට පැමිණ තිබීම ගැටලුවක් කියලාය.
ඒ වගේම ජවිපෙ හිටපු මන්ත්රී බිමල් රත්නායක ඡායාරූප කීපයකුත් යොදාගෙන ට්විටර් පණිවුඩයක් නිකුත් කර තිබුණේය.
“මව්වවරුන් දෙදෙනෙක්ගේ අවසන් නික්ම යාම”
ලෙස ඔහු සඳහන් කර තිබුණේය. ඔහු ඒ ගැන ඉතාම කනගාටුවට පත්වෙන බවක් කියන අතර මේ දෙදෙනාගෙන් එක මවක වෙනුවෙන් ආගමික වතාවත් කරනා අයුරුත්, ඒ වටා පිරිසකගේ අවසන් සමුගැන්මත් අනික් අයගේ හුදෙකලා සමුගැන්මත් ඒ පින්තූරවල තිබේ. මේ එක් අයෙක් සිංහල වීමත් අනික් අය මුස්ලිම් වීමත් මේ වෙලාවේ සලකනවා යැයි හිතන්නට තරම් අපි අවාසනාවන්ත නැතැයි හිතමු. නමුත් බිමල්ගේ ට්විටර් පණිවිඩයට රටෙන් ඉල්ලනට සිදුව ඇත්තේ,
“සැමට සමාන අවසන් ගමනකි”
අපි එය ඉල්ලන්නට තරම් අවාසනාවන්තය.
OIC එක කනගාටුව පළ කරයි
මේ අතර රටවල් 58ක් නියෝජනය කරන ස්ලාම් සහයෝගිතා සංවිධානයද ඉකුත් අඟහරුවාදා නිවේදනයක් නිකුත් කරමින් මුස්ලිම් ජනතාව ඉලක්ක කරමින් ගෙනයන මාධ්ය ප්රචාර සම්බන්ධයෙන් සිය කනගාටුව ප්රකාශ කිරීමට කටයුතු කර තිබේ. මුස්ලිම් ජනතාව කොරෝනා වෛරසය රට තුළ පැතිරවීමට කටයුතු කර ඇති බවට රැගෙන යන ප්රචාර හෙළාදැක ඇති ඔවුන්, මුස්ලිම් ජනතාවගේ සිරුරු ආදාහනය කිරීම සම්බන්ධයෙනුත් කරුණු සඳහන් කරමින් මෙම නිවේදනය නිකුත් කිරීමට කටයුතු කර තිබේ.
අපි අවස්ථාවක් දුන්නා- IDH රෝහලේ විශේෂඥ අධිකරණ වෛද්ය නිලධාරි වෛද්ය චන්න පෙරේරා
කොරෝනා නවවන මරණය සම්බන්ධයෙන් අපි IDH රෝහලේ විශේෂඥ අධිකරණ වෛද්ය නිලධාරි වෛද්ය චන්න පෙරේරා මහතාගෙන් විමසීමක් කළෙමු. එහිදී හෙතෙම සඳහන් කර සිටියේ මෙම තැනැත්තා කොරෝනා රෝගය හේතුවෙන් මියගිය බවත්, රෝහලේ කාමරයකදී දේහය දැකබලා අවශ්ය ගෞරව දැක්වීමට පවුලේ ඥාතීන්ට අවස්ථාව දුන් බවත්ය. ඒ අනුව පුතා, මස්සිනා සහ මව්ලවිවරයකු එම අවස්ථාවට සහභාගි වූ බව වෛද්යවරයා සඳහන් කර සිටියේය. ආදාහනය කටයුතු සිදුකරන ස්ථානයට පවා ඔවුන්ට යෑමට අවස්ථාව සලසා තිබූ බවද අධිකරණ වෛද්ය නිලධාරිවරයා සඳහන් කර සිටියේය.
ඥාතීන් දෙදෙනෙකුට බලන්න දෙන්න පුලුවන්: නීතිය ඒකයි- ජ්යෙෂ්ඨ නියෝජ්ය පොලිස්පති නීතිඥ අජිත් රෝහණ
මේ සම්බන්ධයෙන් ජ්යෙෂ්ඨ නියෝජ්ය පොලිස්පති නීතිඥ අජිත් රෝහණ මහතාගෙන් කළ විමසීමකදී හෙතෙම සඳහන් කර සිටියේ දේහයට අවශ්ය ගෞරව දැක්වීම සඳහා පවුලේ ඥාතීන් දෙදෙනකුට විශේෂ ගැසට් නිවේදනයකින් දැනුම්දීම් කර ඇති බවකි.
ජීවන පහන් තිලිණ
