පිළිකාකාරක පොල්තෙල් මාෆියාවක් රටේ ඇති බවත්, අවුරුද්දට ආණ්ඩුව ජනතාවට දෙන තෑග්ග මෙම පිළිකාකාරක පොල්තෙල් බවත් විපක්ෂ නායක සජිත් ප්රේමදාස මහතා පැවසීය.
63වන සත්කාරය විපක්ෂ නායක ජංගම සේවයට තිස්සමහාරාම කාවන්තිස්සපුරදී එක්වෙමින් පැවසීය.
එහිදී ඒ මහතා මෙසේද කීය.
“ගිය අවුරුද්දේ සිංහල දමිල අලුත් අවුරුද්ද සැමරුවේ කොරෝනා එක්ක. මෙවර 2021සිංහල දමිල අලුත් අවුරුද්ද සමරන්න වෙලා තිබෙන්නේ පිලිකාකාරක පොල්තෙල් සමඟ සහ පොල්තෙල් ආදේශක සමඟ. ඔබතුමන්ලා දන්නවද මේ ආණ්ඩුව යටතේ මේ රටට මෙට්රික් ටොන් දහස් ගණනක් පොල්තෙල් සහ පොල්තෙල් ආදේශක,නිකං නෙමෙයි පිළිකාකාරක ආදේශක අපේ රටට ගෙන්වලා තිබෙනවා. මේවා හොර පාරෙන් ගෙන්නලා තියෙන්නේ. සෞඛ්ය අමාත්යංශයේ ඒ අදාල අංශයෙන් මේ ගෙනාපු පොල්තෙල් සහ ආදේශක නිසි ප්රමිතියක් නොතිබීම තුළ ,පිලිකාකාරක හැටියට හඳුන්වා ගැනීම තුළ ඒවා තහනම් කළා. තහනම් කරපු වෙලාවේ සමාගම් කිහිපයක් එකතු වෙලා අර පොල් තෙල් සහ පොල් තෙල් ආදේශක පිරිපහදු කරලා ප්රමිතිකරණ ආයතනයට දීලා ප්රමිති කරන ආයතනයෙන් සහතික ලබාගෙන ,ඒ විතරක් නෙමෙයි ,රේගුව මෙච්චර බරපතළ ප්රශ්නයක් තිබියදීත් ඒ ඒ සමාගම් වල ගුදම් වල මේ නුසුදුසු පොල්තෙල් හා ආදේශක ගබඩා කරන්නට අවසරය ලබා දීලා ,දැන් මොකද්ද වෙලා තියෙන්නෙ ?
පිලිකාකාරක පොල් තෙල් හා පොල් තෙල් ආදේශක දැන් වෙළඳපොළට නිකුත් වෙලා හමාරයි. එතකොට මෙවර සිංහල දමිල අලුත් අවුරුද්ද අපි සමරන්නේ පොල්තෙල් මාරයාත් එක්ක සටන් වැදීමක් තුළ. කෑම පිගාන එනකොට මේක මාරයාගේ පිගාන වෙයිද දන්නේ නෑ. දැන් මිත්රවරුනේ මේ රටේ ජනතාව මේ ආණ්ඩුව පත් කරපු එක හේතුවක් මොකක්ද ? මේ පොහොට්ටු පුද්ගලයෝ කිව්වා පොහොට්ටුව එන්නේ සිස්ටම් එක හදන්න. ව්යුහය හදන්න.ක්රමවේදය හදන්න . දැන් මොකද්ද වෙලා තියෙන්නේ ? ආණ්ඩුව වගේම සිස්ටම් එකත් ෆේල්. සිස්ටම් එක කඩාවැටිලා. ක්රමවේදය කඩාවැටිලා. ලොකුවට කිව්ව යුද්ධෙ දිනපු අපිට මේ රට සෞභාග්ය කරා ගෙන යෑම එතරම් මහලොකු දෙයක් නෙමෙයි කියලා. දැන් මොකද්ද වෙලා තියෙන්නේ ?
යුද්ධය දිනපු ආණ්ඩුව අපේ රටේ ජනතාවට මහා භයංකාර ,ප්රමිතියෙන් තොර පොල් තෙල් හා පොල් තෙල් ආදේශක , පිළිකා කාරකයන් තිබෙන ඒ පොල් තෙල්, පොල් තෙල් ආදේශක වෙළඳපොළට නිකුත් කරලා. දැන් රටේ ජනතාවට තිබෙනවා කෝවිඩ් මාරයා සමඟ සටනක් කරන්න. ඊට අමතරව සිංහල දමිල අලුත් අවුරුද්දේ මේ ආණ්ඩුව රටට ලබාදෙන සුබාරංචිය තමයි කෝවිඩ් මාරයාත් ඇතුළුව පොල්තෙල් මාරයා එක්කත් සටන් වදින්න කියලා . මං අහන්න කැමතියි තමුන්නාන්සේලාගෙන් මෙච්චර 69 ලක්ෂයක් ඡන්දෙ දීලා ජනාධිපතිවරණයේ, 68 ලක්ෂයක් ඡන්දෙ දීලා මහමැතිවරණයේ. නිකමට පොඩ්ඩක් හිතන්න ,කොම්පැනි කාරයෝ ආරක්ෂා කරගන්නට , කොම්පැනි කාරයන්ට මුදල් උපයන්නට මෙහෙම රටේ ජනතාව බිලි දෙන එක සාධාරණද?
දැන් මේ පිළිකා පිළිකාකාරක පොල් තෙල් සහ ආදේශක වෙළඳපොළට නිකුත් කිරීම තුළින් සමාගම් කීපයක් කෝටි ප්රකෝටි ගණන් ලාභයක් ලබලා තියෙනවා. මුදල් ලබලා තියෙනවා. හැබැයි නිකුත් කරපු පිලිකාකාරක පොල්තෙල් සහ ආදේශක නිසා ජනතාවගේ ජන ජීවිත අනතුරේ.
මිත්රවරුනි ,මෙච්චර සෞඛ්ය බලධාරීන් සහ රජයේ සෞඛ්ය අමාත්යාංශය එපයි කියද්දි ,හොඳ නැතෙයි කියද්දි ,ප්රමිතියෙන් බාලයි කියද්දි ,පිළිකාකාරක තිබෙනවා කියද්දී මොකක්ද ආණ්ඩුව කළේ ? ආණ්ඩුවයි, රේගුවයි, ප්රමිති ආයතනය යි කොහොමහරි මේව අර කොම්පැනිකාරයන්ට ලබාදීලා ,කොම්පැනි කාරයෝ වස විස අඩංගු පොල්තෙල් සහ ආදේශක වෙළඳපොළට නිකුත් කරලා හමාරයි.
මේ වෙනකොට මේ රටේ ජනතාව ඒවා මුදලට අරගෙනත් ඇති ,අරගෙන පාවිච්චි කරලත් ඇති. පාරිභෝජනය කරලත් ඇති. මෙහෙම තත්ත්වයක් තුළ රටේ ජනතාවට සිද්ධ වෙනවා ඉදිරියේදී මහා අන්තරාදායක තත්ත්වයකට මුහුණ දෙන්න.
දැන් ඔබ සියලු දෙනාම දන්නවා ලෙඩරෝග දිහා බැලුවහම පිළිකා රෝගය කියන්නේ මහා භයානක රෝගයක්. බොහෝ පිළිකාවන් වලට බේත්හේත් නෑ. ඒවා හොඳ කරන්නට බැහැ. පිළිකාවක් හැදුනාම බොහෝ අවස්ථාවලදී එක දෙයක් නියතයි. ඒ තමයි මරණය.
දැන් මේ රජය මොකද්ද කරලා තියෙන්නේ? බාල පොල්තෙල් සහ බාල ආදේශක ,පිලිකාකාරක පොල්තෙල් සහ ආදේශක හොර පාරෙන් වෙළඳපොළට නිකුත් කරලා ,හොර සහතික හදලා ,හොර සහතික හදන්න රාජ්ය ආයතන මැදිහත් කරවලා , කොම්පැනි කාරයෝ කිහිප කිහිපදෙනෙක් පෝසතුන් බවට පත් කරන්න අද කටයුතු කරලා තිබෙනවා.
දැන් අද එළිපිටම කියන්න පුළුවන් අර සීනි වලින් ගහපු සමාගමක් අද මේ පොල්තෙල් මාරයා ව්යාපෘතියට සම්බන්ධයි. මේ අවස්ථාවේ ආණ්ඩුවත් උත්තර දෙන්නට ඕන ,මේ වගේ පහත් ආණ්ඩුවක් පත් කරපු 69 ලක්ෂයත් දැන් උත්තර දෙන්නට ඕන. දැන් උත්තර බඳින්න වෙලාව ඇවිල්ල තියෙන්නේ. මහලොකුවට පත්කරගත්තා සිස්ටම් එක හදන ආණ්ඩුවක්. දැන් තියෙන්නෙ system breakdown. දැන් ව්යුහයත් කඩා වැටිලා. රටත් කඩාවැටිලා. කොරෝනා මාරයාත් ඉන්නවා ,දැන් පොල් තෙල් මාරයාත් ඉන්නවා .
ආන්ඩුවේ වගකීම මිතුරනි මට පේන ආකාරයට මිනිසා ජීවත් කරවීම නෙමෙයි ,මිනිසා ඉක්මනින්ම මාරයා කරා රැගෙන යෑම. මේ රජය හදන්නේ මේ වගේ බාල වැඩ තුළින් මේ රටේ ජනතාව මරණ මංචකය කරා ගෙනයන්න.
